Read lokele Tomo Ya Batomomu 28 Bible Online

Tomo Ya Batomomu 28 - lokele bible

Tomo Ya Batomomu 28

¹Uwak’iso yaatotina ongoma, iso loluwa bosanga mbo bosotomo lina liko Melita.

²Bato ba yese ena ebatiaongaka baoi basu, iyo lokeel’iso booto wa likama, iyo loanesa bösä, iyo lonyangel’iso batotina eoka ya bɔtɔkɔ wa mbula la bɔfɛfyɔ.

³Paulo losɔnjaka bangbokale ba tokolokolo la atak’inde twao nda bösä, njɔ lokuswa nda twao eoka ya etao la yao loundana la lingasa liande.

⁴Limɔ ɛnɛkɛ bato ba bosanga njɔ esokakema nda lingasa liande, iyo angɛnɛ loongana mbo— Eingo nde, botolome-yo ende booli wa bato, asouwa nda balia, kongo ko Oyengani atimach’inde ndoika imɔ!

⁵Kongo ko Paulo lɔfɛfɛ njɔ nda bösä, atiokaka lobaba;

⁶nde bato lowɛlɛ Paulo baiso mbo atotɛmɛtɛmɛ ango atokwa se kwu la losingo. Limɔ awɛlɛkɛ iyo baiso ko yumwa batiɛnɛkɛ ango loasɔ lowau losoya end’inde, iyo lokikola lienyeli, iyo loonga mbo Paulo ende mungu.

⁷Nda fangi ena ya bosanga yaaka la bilanga bifi ya Gouverneur ya bosanga ako Pubelio, inde lonyangel’iso nda ndakɔ yande, inde lofaef’iso bɛɛnda bieka bacho basatɔ ko la booto finɛ.

⁸Loaaka nde mbo sango wa Pubelio loingalaka se la etao la bokolö wa bakila, Paulo lɔkɛ okɛnɛ inde, inde losomboel’inde, la ataliak’inde besamba yande, inde louwes’inde.

⁹Lamao eba ngwo basi nda bosanga loyaka, iyo losäsesomo.

¹⁰Iyo loinakel’iso la besombo wike limɔ asokwak’iso liasi la watɔ wa lofofo, iyo lotaka nda watɔ bieka ebisoeno iso.

¹¹Yaaka nde mbisa ya tengai isatɔ eyailak’iso lɔkɛndɔ nda watɔ wa lofofo wa Alesandulia ewayalaka nda bosanga nda mbile ya bɔfɛfyɔ, lina lia watɔ liko Batolome Baasa.

¹²Iso loelama nda bokenge wa Sulakuse, iso loumwa omao ko bacho basatɔ;

¹³asokwak’iso omao, iso lotimbela sumbu ndokaiyela Legio, limɔ lɛlɛngɔ lofofo loa fangi ya Afilika lofofa, loao loiyes’iso lɛlɛngɔ nda elamelo ya Puteoli,

¹⁴olo atowanak’iso la beoto bɛmɔi ebafelak’iso ndotikala lau bacho bosambale.

¹⁵Ongoma iso loiya nda Loma la boili. Beoto ba omao, okak’iyo mboli yasu, iyo loya oyatowana lasu nda eolo ya Liongo lia Apio, nda elela eko Kumbo isatɔ. Limɔ ɛnɛkɛ Paulo wɛn’iyo, inde lofaefa Mungu kelekëlë, inde loyaimwesa botema.

¹⁶Iyak’iso nda bokenge wa Loma, Paulo lomachomo ndoyalaka eyande angɛnɛ amamwito la bosilikani oyalambak’inde.

¹⁷Mbisa ya bacho basatɔ Paulo lota betoli oso ya BaYuda lioi mbo bayeke end’inde, limɔ asɔngɔmɔk’iyo, inde loonga lau mbo— Beoto, ani ititefole bato basu angoko beyaeli ya batata basu, imi nd’akɛsɔmɔkɔ nda besamba ya BaLoma nda bɔnyɔlɔlɔ nda Yelusaleme;

¹⁸iyo ana lokɔtɔlɔ’mi la basangaka ndofaikola’mi eoka batiɛnɛkɛ’mi la litwanelo lioengana la liwa.

¹⁹Nde eoka BaYuda batiakuliaka, ongoma yatinjomoko ndotela Kaisala bosakɔ, nde itiaaka la loasɔ lowanjela eba yese yami angɛnɛ.

²⁰Eoka ya litina-li to, isot’ino lioi mbo yɛnɛk’ino la mbo iongeke lanu, eoka isokandomo la e-bɔnyɔlɔlɔ-bo ko la loasɔ loa iyɛli sha Isalaele.

²¹Limɔ iyo loonga lande mbo— Iso totiɔlɛ lokasa ango lɔmɔi loa Yudea loasɔ loaɛ, la angwɛnɛ ɔmɔi wa beoto yasu woya ono ndotel’iso mboli kwa ndoongana lasu loasɔ lobe loaɛ.

²²Kongo ko tolɛmbi nde ndooka ko end’aɛ ko yao ebisoenyakel’aɛ; eoka nda loasɔ loa e-botuka-bo toluwi nde mbo bosotangokomo obe nda wenda bototina.

²³Iyo lokuliana lande lisho lia lise elikayek’iyo la iyo loya bato wike end’inde nda ndakɔ eyayal’inde; ko la nɔngɔ buse tuu inde losanoel’iyo, la inde lonangoel’iyo loasɔ loa Bɔkɔta wa Mungu, inde lokota ndoimeles’iyo loasɔ loa Yesu ko la Bikela ya Mɔsɛ la Kasa ya Batɔndɔli.

²⁴Bamɔi loimela inangɔ shande nde bamɔi angoimela.

²⁵Ongoma iyo lofenyakana la iyo loakola ndomelana, ani Paulo loonga lau ko liolo-li limɔi mbo— Baoi ebaongaka Bolimo Botanu ende batata banu ko la Yesaya ewa Bɔtɔndɔli bende ko wewe, bako mbo—

²⁶Kɛndɛkɛ ende e-bato-ba, ongaka lau mbo— La batoi ino bokaka, nde angolüwa litina; La baiso, ino botichaka, nde angotɛnɛ swa.

²⁷Eoka betema ya e-tukela-ye bisokwelo itɔka, La batoi bau batooka ko ilao kongo; La basolinja baiso bau ndi, Mbo batɛnɛ la baiso la mbo batoka la batoi, Batalüwaka batina la betema la batakalangana, La mbo itauwes’iyo.

²⁸Eokao luwaka to mbo liuwesi-li lia Mungu lisotomomo ende bato ba tukela yasi, la iyo nd’atokaka liao.

²⁹Aongak’inde ongoma, BaYuda losokwa okafelakana iyo angɛnɛ nda yao.

³⁰Paulo loyalaka ko miaka imbale nda ndakɔ eyakambak’inde angɛnɛ la inde lonyangela batotina ebayaka fɛtɛti end’inde,

³¹inde lotaka boeki wa loyo loa Bɔkɔta wa Mungu la inde loekekesa njasɔ ya Ngɛnɛ Yesu Masiya ko fololo angokufesomo.