Read lokele Tomo Ya Batomomu 4 Bible Online

Tomo Ya Batomomu 4 - lokele bible

Tomo Ya Batomomu 4

¹Aongaka Petelo la Yoane la bato, limɔ BaKanga la Komanda wa ba-polisi ba Ndakɔ ya Mungu la BaSadoke, iyo yaatotina loyaosh’iyo,

²la iyo losoma finɛ eoka batoekesa bato la eoka batokambesa loasɔ loa losokwo nda liwa ko la Yesu.

³Iyo loundesa batomomu, iyo lokand’iyo bɔnyɔlɔlɔ ko nda lɛlɛngɔ eoka buse bosɔkɛ oko litɛlɛ.

⁴Nde wike w’ebokakä inangö, iyo loimela, loketi loa bato loenganaka kwa bilɛfu bɔɔmwi.

⁵Lɛlɛngɔ benyafala yau la biange la batikasa losɔngɔkɔmɔ nda Yelusaleme,

⁶amamwito la Ana ako Kanga eyeti la Kayafa la Yoanane la Alesandelo la ebamɔi ba bɔkɔ̈kɔ wa kanga eyeti.

⁷Limɔ iyo loemesa batomomu atiteni, iyo lofela mbo— ¿Osokela loasɔ-lo ko la boni bofoka la lini lina, bako ino?

⁸Limɔ atumesomoko Petelo la Bolimo Botanu, inde loonga mbo— Benyafala la biange ya bato-ba,

⁹eyambo iso tokɔtɔlɔmɔ louse loasɔ loa liuwesi lia boto wa ɛlɛmɛ la ani asouwesomo inde,

¹⁰ino yaatotina la tukela etotina ya Isalaele, luwaka mbo ende ko nda lina lia Yesu Masiya wa Nasaleta, oyaolak’ino nda lieka, la oyakusolaka Mungu nda liwa, ko lande kongo e-boto-yo aemali oso wanu la bosasu.

¹¹Inde nd’ale Litalɛ elisofekomo lanu baswi, elisoswomo nda botö wa ndakɔ.

¹²Angwɛnɛ imɔ liuwesi ko la wasi eoka angwɛnɛ to lina liasi ose ya use elifomu ende bato la eliengani lasu mbo tuwesomoko.

¹³Ɛnɛkɛ iyo mbo Petelo la Yoane basotendela ndoonga fololo la aluwak’iyo mbo batiaekesomoko la mbo bayalaka ko bato ba okenge, iyo lomwaala; iyo loleembela mbo bayalakaka la Yesu.

¹⁴Nde ɛnɛkɛ̈ iyo boto oyauwesomoko aemali lau, batiayalaka la limutoli lioonga;

¹⁵nde iyo loonga lau mbo baumeke lousa loa ikumbɛ, limɔ iyo lotwana kuko, iyo mbo—

¹⁶¿Tokeleke to iye la bato-ba? Losoɛnɛlɛ to fololo ende bato batotina ebasolimela nda Yelusaleme mbo esisho ya lokuku esokelomo lau la totikɔkɔlɛ ndoanganya.

¹⁷Kongo ko mbo bitafafana imɔ ende bato, tosishek’iyo la boimo mbo bataonga imɔ la boto angɔmɔi loasɔ loa e-lina-li.

¹⁸Limɔ iyo lota batomomu lioi, iyo loimak’iyo mbo bataonga ango sinyo, bataekesa ango nda lina lia Yesu.

¹⁹Kongo ko Petelo la Yoane lomutoel’iyo mbo— Ango engani nde nda baiso ba Mungu, kwa ndokak’ino, kwa ndokaka Mungu, ino angɛnɛ ataka loao,

²⁰nde iso totikɔkɔlɛ ndokufa ndoonga bina ebisɔɛnɛ’iso la ebisok’iso.

²¹Limɔ asishak’iyo liasi la boimo, iyo lofaikol’iyo eoka batiɛnɛkɛ fofe yokel’iyo loasɔ, eoka ya bato ebainakelaka Mungu eoka ya loao eloakelomoko.

²²Eoka boto oyauwesomoko la esisho ayalaka la miaka yoeta kama binɛi.

²³Afaikolomoko iyo, iyo lɔkɛ ende bato bau, iyo lokambes’iyo bina eyaongaka kanga ebieti la biange eonga lau.

²⁴Okakä iyo ongoma, iyo losangana la limiki limɔi ndoinela Mungu, mbo— Ngɛnɛ Mungu, Aɛ wende Bokeli wa use la nyɛlɛ, la balia bafi la bitotina ebiyali nda yao,

²⁵ako Inde oyaongaka la batata basu la bɔnɔkɔ wa bɔkɔwa waɛ ako Dawidi mbo— ¿Bato ba tukela ya wenda batotaka boulu eoka iye; Batoenyaka ko njasɔ ebile wawa? Bɛkɔta ya wenda basotɔngɔmɔ la olenga,

²⁶Benyafala besosɔngɔmɔ likwakulu lia bita Mbo bananeke la Ngɛnɛ Mungu la Masiya wande.

²⁷Wewe, basɔngɔmɔkɔ to nda bokenge-bo ndonana la Wana Botanu waɛ ako Yesu oyüchomoko laɛ, bako Helodi la Pontio Pilato la tukela ya Isalaele la tukela ya wenda,

²⁸ndokela bina eyasangak’Aɛ la bofoka la likomyi liaɛ oso mbo bikelomoko ko mbisa.

²⁹Kwani, Aɛ Ngɛnɛ Mungu tichaka to nganyä yau, lembɛlɛkɛ mbo bɛkɔwa yaɛ baongeke lioi liaɛ la lotendela,

³⁰l’ani atonanola Aɛ bosamba waɛ ndouwesa bato, ndokela tokesa la bisisho ko la lina lia Wana Botanu waɛ ako Yesu.

³¹Limɔ asombolak’iyo, elela olo asɔngɔmɔk’iyo lotukatukesomoko la iyo yaatotina lotumesomo la Bolimo Botanu, iyo lotendela ndonangola wɛndi wa Mungu la lotendela.

³²Botukä wa ebaimelaka baaka la botema la bolimo ko ɔmwito la angwɛnɛ boto woonga mbo yeka eyasɛl’inde yende ko eyande angɛnɛ, nde bitotina yau loomana lau batotina.

³³Batomomu lokambekesa bato mboli ya losokwo loa Ngɛnɛ Yesu nda liwa, ko la bofoka finɛ; booto wa likama wayalaka lau batotina.

³⁴Angwɛnɛ angɔmɔi wau waenoko yeka, eoka batotina ebasɛɛlɛkɛ bilanga kwa ndakɔ, iyo loungesa yao, iyo loesha belïli eyasombak’iyo,

³⁵iyo loyataka yao se oso wa Batomomu, limɔ likao lokaomo ende boto la boto kwa aenganaka la boeno.

³⁶Ongoma Yosefa, oyafomokö lina liasi liko Balanaba ko la Batomomu, (litina mbo— Wana wa lifumbesi) oyaaka wa bɔkɔ̈kɔ wa Lɛwi, boto wa bosanga wa Kupolio,

³⁷inde loungesa elanga eyaaka lande, inde loesha bolïli bototina, inde loyata wao oso wa Batomomu.