Read lokele Tomo Ya Batomomu 8 Bible Online

Tomo Ya Batomomu 8 - lokele bible

Tomo Ya Batomomu 8

¹Likongolomu lifi liakolaka ko lise-ao ndoya ende bato ba Etanda nda Yelusaleme; batotina, sakolo ngo ko Batomomu, lomelesomo nda biese ya Yudea la Samalia.

²Bato bamɔi ba bɔfɔɔmu loila Setefano okaömb’inde, iyo loleel’inde lileeli lifi lia ewa.

³Nde Saulo lobebesa Etanda, inde lɔkaɔtɛ ndakɔ la ndakɔ, inde losulyaka iyo okakɛs’iyo nda bɔnyɔlɔlɔ.

⁴Limɔ bato ebamelesomoko loketeta ndokanangole Mboli Ilau.

⁵Nde Filipo lɔkɛkonda bokenge wa Samalia okatel’iyo boekï wa Masiya.

⁶Bikuke ya bato lolailaka la botema ɔmwito inango sha Filipo ani bokakä iyo l’ani bɛnɛk’iyo ndembe ya bisisho eyakelak’inde.

⁷Eoka belimo ya bɔwɛwɛ losokwa end’iyo la beulo ya likama la bato wike ebalɛmbɛtɛkɛ l’eba bikoti losäsolomoko säso,

⁸yaaka to linɛngina lifi nda okenge ona.

⁹Boto ɔmɔi ako Simona ayalaka omao nda bokenge ko oso, oyakelaka bisisho yosisimwesa bato ba Samalia la inde loonga la bato mbo ende boto wa lokuku lofi.

¹⁰Batotina lowɛlɛmɛ end’inde, ko ebafi la ebakɛkɛ, iyo mbo— Boto-yo ende bofoka wa Mungu ebotangomu Wesesi.

¹¹Iyo lowɛlɛmɛ end’inde eoka ko La mbile yumwa inde losisimwesak’iyo ko la bisisho yande.

¹²Kongo ko akambesaka Filipo okambes’iyo Mboli Ilau ya Bɔkɔta wa Mungu l’eya lina lia Masiya Yesu, iyo loimela la iyo lolufiomo batolome la batomali.

¹³Limɔ ango Simona angɛnɛ loimela, inde lolufiomo limɔ inde lowatema la Filipo, la ɛnɛkɛ Simona ndembe ya bisisho eyakelomoko inde lomwaala.

¹⁴Okakä Batomomu ebayalaka nda Yelusaleme mbo bato ba Samalia basoaela lioi lia Mungu, iyo lotoma Petelo la Yoane end’iyo.

¹⁵Ongoma iyo loya, iyo losomboel’iyo mbo bɔlɛkɛ Bolimo Botanu,

¹⁶eoka bokakwi ende boto angɔmɔi; balufiomokö kongo nda lina lia Yesu.

¹⁷Lamao Batomomu lotel’iyo besamba nda botö la iyo lɔɔlɔ Bolimo Botanu.

¹⁸Nde ɛnɛkɛ̈ Simona mbo Bolimo Botanu bosofomo iyo ko la lotalio loa besamba ya Batomomu, inde lotamb’iyo bieto, inde mbo—

¹⁹Faka to imi imɔ isosha-si mbo oyakatalieke’mi otalia inde besamba yami, ona ɔlɛkɛ Bolimo Botanu.

²⁰Nde Petelo loonga lande mbo— Bieto yaɛ bisɛɛsɛlɛkɛ amamwito laɛ angɛnɛ, eoka otangi nde mbo otoɔlɔ lifi lia Mungu ko la bieto.

²¹Oti la likaɔ, angoko botiko nda loasɔ-lo, eoka botema waɛ botiengane chaa nda baiso ba Mungu.

²²Eokao kalanganaka nda loasɔ-lo loaɛ lobe, sombolaka Ngɛnɛ Mungu mbo eluwa lisangi lia botema waɛ limɛsɛlɔmɔkɔ,

²³eoka isɔɛnɛ mbo wende la bololo wa shungu nda botema la mbo osokandakomo nda njasɔ ibe.

²⁴Simona lomutola mbo— Tasomboelaka Ngɛnɛ Mungu loasɔ loami, mbo ango lɔmɔi loa yao ebisoong’aɛ lotayela’mi.

²⁵Asilaka to Batomomu ndokambekesa la ndoongana la bato wɛndi wa Ngɛnɛ Mungu, iyo loinwa nda Yelusaleme la iyo lokanangokole Mboli Ilau nda kenge ya Samalia la mboka.

²⁶Bokitomo wa Mungu loonga to la Filipo mbo— Emalaka, tangwaka la ifitika nda mboka eyesokweli Yelusaleme okakɛ konda Ngasa; ele mboka ya liɔmbɛlɛ.

²⁷Limɔ inde loemala, inde lotangwa. Omao tɛnɛ ngo, boto wa Etiope, Bonyafala wa Bɔkɔta Otomali ako Kandakɛ wa Etiope, aaka bɔfɛnja la ayalaka botingani wa lifoka litotina liande. Ayaka nde ndosemola Mungu nda Yelusaleme,

²⁸la kwani atoinwa eyande ani ayali se nda elutelo ya punda ani atotanga lokasa loa Yesaya ako Bɔtɔndɔli.

²⁹La Bolimo loonga la Filipo mbo— Kɛndɛkɛ okawatema la elutelo-ye.

³⁰Filipo lokwa mangu la inde lok’inde atotanga lokasa loa Yesaya ako Bɔtɔndɔli. Filipo mbo— Otiluwe litina lia loao elokotang’aɛ?

³¹Limɔ inde lomutola mbo— ¿Itokɔkɔlɔ to moni sakolo ko boto atosanoela’mi litina? Inde lofela to Filipo mbo akweke ina okayala se amamwito lande.

³²Botüku wa lokasa ewatangak’inde waaka mbo— Kwa bɔkɔkɔ ebotokɛsɔmɔ okaolomo, La kwa efembeli ya bɔkɔkɔ atoyalaka tau ani atotenakomo fuu, Ko ongoma inde atialiolaka bɔnɔkɔ wande;

³³Ayalak’inde mbuwa, lokomyomo losofekelomo inde; Ndai kota mboli ya fɛtɔ yande Ani liwawi liande lisosokolomo nda wenda-bo?

³⁴Limɔ ewa bɔfɛnja loonga la Filipo mbo— Kambesaka’mi sumbu, ¿Bɔtɔndɔli aongaka ongoma eoka ya ndai; eoka yande angɛnɛ, kwa eoka ya boto wasi?

³⁵Limɔ Filipo loakola ndoonga ko loasɔ elosɔnɔmu nda Lokasa loa Yesaya, la inde lokambes’inde Mboli Ilau ya Yesu,

³⁶la aɛk’iyo nda mboka, iyo loiyela balia, limɔ ewa bɔfɛnja loonga mbo— Tɛnɛ, balia eya! ¿Loni lotokufesa mbo italufiomo?

³⁷Filipo mbo Boimela la botema waɛ bototina, aɛ kolufiomo; inde lomutola mbo— Isoimela mbo Yesu Masiya ende Wana wa Mungu.

³⁸Limɔ inde loonga mbo elutelo esikameke, la iyo yaambale lɔkɛsɛnɛ nda balia, la Filipo la ewa bɔfɛnja; inde lolufya inde.

³⁹Asaɔwak’iyo nda balia, Bolimo wa Ngɛnɛ lɔɔnɔkɔlɔ Filipo la ewa bɔfɛnja atiɛnɛk’inde imɔ liasi, nde inde lotangwa eyande la limɛngɔ finɛ.

⁴⁰Filipo nde lɔɛnɛnɛ nda Asedodo, inde loetaka okanangole Mboli Ilau nda okenge la okenge konda aiyak’inde nda Kaisalia.