Read lokele Baloma 10 Bible Online

Baloma 10 - lokele bible

Baloma 10

¹Bitungani yami, yende la limɛngɔ finɛ nda botema la nda lisomboli liami eoka ya bato, bako BaIsalaele, mbo buwesomoko,

²eoka isoaola wewe mbo bende la bofimbi finɛ wolitesaka Mungu, nde angwɛnɛ liluwani to.

³Eoka batialuwaka liengani lia Mungu, nde basoluka mboka yokɔkɔmɛsɛ liengani eliau angɛnɛ la batilitese liengani lia Mungu.

⁴Eoka Masiya nd’atokɔcha Bikela ndoenganesa batotina ebasolendelo Inde.

⁵Mɔsɛ nd’asɔnɔkɔ mbo boto oyatokɔcha Bikela ko la bekeeli inde atoɔlɔ loiko.

⁶Nde liengani elia lilendelu lisoonga mbo— Oongëke nda botema waɛ mbo, ¿Ndai atolila ko nda use? (eoka ndokasulola Masiya se), oongëke mbo—

⁷¿Ndai atokwaka se mbi nda olundu wa ewelo? (ndokatɛmɔlɔ Masiya nda liwa).

⁸Nde losoonga to moni? Mbo liölo lile tina laɛ, nda bɔnɔkɔ waɛ la nda botema waɛ, la liölo lina lile elia lilendelu elisotomo lasu boekï,

⁹mbo eyambo boaola la bɔnɔkɔ waɛ mbo Yesu ale Ngɛnɛ, la boimela nda botema waɛ mbo Mungu asotɛmɔlɔ Inde nda liwa, ani buwesomoko.

¹⁰Eoka boto atoimela la botema ko ndoenganesomo, la atoaola ko la bɔnɔkɔ ko ndouwesomo.

¹¹Lokasa loa Mungu mbo— Batotina ebatolendelo Inde baitookesomo sɔni.

¹²Batitwane to, bako BaYuda la BaHela, eoka Ngɛnɛ ɔmwito ale ko Ngɛnɛ wa yaatotina, oyale to la bofäfä ende batotina ebatosingwaka lina liande.

¹³Eoka mbo— Batotina ebatosingwaka lina lia Ngɛnɛ belauwesomoko.

¹⁴¿Nde batosingwaka lina liande moni ani bakimel’Inde? ¿Batoimel’Inde to moni ani bakoki wɛndi wande? ¿Batoka wɛndi wande moni, ani batitatomo boekï?

¹⁵¿Boekï atotaka wɛndi sakolo ngo ko asotomomo la moni? Kwa asɔnɔmɔkɔ nda Lokasa mbo— Aina bolau mbo basoyanangoel’iso mboli ilau!

¹⁶Kongo ko batotina batialailaka mboli ilau la wɛlï, eoka Yesaya aongaka mbo— ¿Ngɛnɛ, ndai asoimela wɛndi wasu?

¹⁷Ongoma to, liimeli lisoya ko la lioki lia wɛndi la lioki lia wɛndi ko la inango sha Masiya.

¹⁸Kongo ko imi mbo— ¿Mbo bakoki to? Eingo nde— Bamiki bau basoiyela yese bitotina la tonango twau ko nda bako ba wenda.

¹⁹Imi mbo— ¿BaIsalaele angoluwa la wɛlï to? Mɔsɛ nd’aongaka ko kwaala mbo— Imi nd’atookes’ino bokelë loasɔ loa bato ebati ango tukela, Itosomes’ino ko loasɔ loa bato ba mbuwa la bibebe.

²⁰Yesaya nde lotendela ndoonga mbo— Isooshana l’ebatilukeke’mi; isɔɛnɛlɛ ende bato ebatifeleke’mi.

²¹Limɔ inde loonga l’eba Isalaele mbo— Ko nɔngɔ buse tuu isonanoel’ino besamba yami la losamɔ, End’ino bato ba tukela ya litefokoli la tofenya.