Read lokele Baloma 11 Bible Online

Baloma 11 - lokele bible

Baloma 11

¹Itofela to mbo— ¿Mungu asofeka to bato ba tukela yande? Mbayo! Imi imɔ yende wa Isalaele, yende wa lioti lia Abalayama, wa bofindi wa Benyamina.

²Mungu atifeke bato bande ebaluwanaka lande ko oso. ¿Ango otiluwe elotoonga Lokasa loa Mungu loasɔ loa Eliya? Inde lokatata eoka ya BaIsalaele ende Mungu mbo—

³Ngɛnɛ Mungu, Basoola batɔndɔli baɛ, basoukola bitambelo yaɛ, la itikali ko imi kongo la batoluka fofe ndoyaola’mi.

⁴¿Nde limutoli lia Mungu end’inde lile moni? Mungu mbo— Bakotikali ende’mi bato bilɛfu bosambale ebatiswe balui se ndosemola Baala.

⁵Ko ongoma imɔ nda mbile-ye botüku bosandelu nde se ebosoaomo ko la booto wa Mungu.

⁶Eya to mbo ko la booto, ambo inga eoka ya bekeeli yau; aenaka ongoma, ani booto botifomo lifaefela.

⁷¿Limɔ to moni? Isalaele loomelo lona eloalukak’inde, nde botüku ona ebosoaomo la Mungu iyo lofomo loao, kongo ko ebamɔi lowa bɔsɛnɔ finɛ.

⁸Kwa asɔnɔmɔkɔ nda Lokasa mbo— Mungu asowɛlɛk’iyo bolengelenge nda baiso mbo batɛnɛ la mbo batoka la batoi, ko nda eweuse.

⁹La Dawidi imɔ mbo— Mɛsa olo atolak’iyo elambɔ ekinjweke ilonga, kwa elöngo; Mbo bakweke tolango tokundel’iyo likundo,

¹⁰Baiso bau batufatufeke mbo batɛnɛ la wɛli Ani bɛkɔngɔ yau beinyakameke mbile la mbile.

¹¹Eokao, imi mbo— ¿Basokwa ilango sha lifongolitule angoemal’imɔ liasi? Mbayo, ango sinyo! Kongo ko, ko la litwanelo liau, liuwesi lisoya ende eba tukela yasi mbo BaYuda bokesomoko bokelë.

¹²Eya to mbo litwanelo liau lisofotesa eba wenda bototina, la ilango shau sisofotesa tukela yasi, nde simbi to ani Bayuda batotina basoimela.

¹³Isoonga to nde ende eba tukela yasi, eoka kwa ayali nde imi botomomo ende eba tukela yasi, isotalia sumbu likuwa liami tala,

¹⁴mbo yefɔlɔ sumbu bokelë wa eba lioti liami angɛnɛ la mbo bamɔi bau buwesomoko.

¹⁵Eoka eya mbo lofeko loau lootwanesa eba wenda la Mungu liasi, ongoma lonyangelomo loau loisoeshela eloeta, loko mbo loiko losokwa nda liwa?

¹⁶Eya to bɔtɔ̈mɔ wa lituma büchomo ende Mungu, simbi to litotina koküchomo; eya mbo wili büchomo, simbi to beta imɔ ko ongoma.

¹⁷Ango beta bimɔi beunakomo nda isandu, limɔ aɛ ako bota w’isandu sha lokonda kɔtɛsɔmɔ nda lifa lia yao ya bokuma, limɔ beta bitotina koyala la wili ɔmwito, kokaana bofoka wa bülu w’isandu, otakemëke loasɔ loa beta.

¹⁸Nde botakema nda loasɔ-lo, luwaka mbo aɛ otisuche wili, kangä wili nd’atokɔkɔmɛsɛ aɛ.

¹⁹Boonga to mbo— Beta lounakomo mbo imi yɔtɛsɔmɔkɔ nda lifa lia yao.

²⁰Bolau to, nde yao lounakomo eoka basolengela lilendelu, aɛ angɛnɛ osokɔkɔmɔ ko l’eoka ya lilendelu. Eokao oyalëke la bɔmɛtɔ, kangä la bɔwa.

²¹Eoka eya to Mungu angomɛsɛlɛ beta eyakondaka nda isandu angɛnɛ, asa kɔni Inde angomɛsɛlɛ aɛ.

²²Tɛnɛkɛ to booto wa Mungu la imɔ ko efango yande; atotulunga ebasokwa se, nde end’aɛ ko booto wa Mungu ani otokɔkɔmɔ nda booto wande, nde aenaka ongoma ani aɛ kotinyomo.

²³Ebamɔi imɔ bemachaka litefoli liau, iyo koɔtɛsɔmɔ ndowachomo nda isandu eoka Mungu atokɔkɔlɔ ndowach’iyo nda bokuma liasi.

²⁴Eya to mbo aɛ watinyomo nda isandu sha lokonda ndokawachomo nda bokuma wa isandu sha tuma, eoka ongoma ende efinole, simbi to beta ina kowachomo nda isandu sha yao angɛnɛ.

²⁵Kongo ko, bitungani, itilɛmbɛ mbo oyaleke botutuku nda loasɔ-lo eloisami sumbu litina, mbo otayala la bɔmɛtɔ, eoka boseno wa betema bosounda sumbu BaIsalaele ko nda akɔtɛkɛ eba tukela yasi ndɔɔlɔlɛsɛ lisangi lia Mungu,

²⁶limɔ BaIsalaele batotina beuwesomoko. Kwa loasɔnɔmɔkɔ nda Lokasa mbo— Boendoli ekuswaka nda okenge wa Siona, Atosokola litefoli lia Mungu ende bana ba Yakobo;

²⁷Elo loyalaka nde ngɛla yami end’iyo, Ani isosokoel’iyo batwanelo bau.

²⁸Nda loasɔ loa Mboli Ilau bende biyani ko l’eoka yanu, nde loasɔ loa mbo basoaaomo, basosamomo ko l’eoka ya batata.

²⁹Lifaefi la likomyi lia Mungu liotaka bato lioi, liao angokikolomo imɔ.

³⁰Kwa ino angɛnɛ watefokolaka Mungu oso, nde kwani osokelakomo booto ko l’eoka ya litefoli liau,

³¹ko ongoma iyo imɔ bende la litefoli mbo ko l’eoka ya booto ewakeelomoko ino, iyo imɔ kokeelomo kwani booto.

³²Mungu asokanjaka to batotina nda litefoli ko mbo awɛlɛkɛ iyo yaatotina booto wande.

³³Aina bolundu wa bondanda la wɛlï la liluwani lia Mungu! Eingo ko Boto angokɔkɔlɔ ndoosha litina lia bakomyi bande angoko bɛkɛndɛli yande.

³⁴¿Ndai to aluwi baenyeli ba Ngɛnɛ Mungu? ¿Ndai asotwa lande ikumbɛ?

³⁵¿Ndai asotafaef’Inde bosömbo, mbo ainolomoko wao ko la Inde?

³⁶Eoka bitotina fɛɛ yasokwaka end’Inde, yakelomökö lande la bilainywaka ko end’Inde; tala biomaneke lande ko layalaya! Ongoma.