Read lokele Baloma 14 Bible Online

Baloma 14 - lokele bible

Baloma 14

¹Nyangelaka ewa lilendelu lilɛmbu nde inga to ko ndowesana lande eoka ya baenyeli bande.

²Boto ɔmɔi asoimela mbo engani nde ndola bieka bitotina, kongo ko wasi wa bɔlɛmbu atolaka ko yeka ya elanga, angola nyama.

³Oyatolaka asɛɔlɛ̈kɛ wasi oyatile, oyatokilaka yeka afëk’inde se oyatola yeka ena, ani Mungu asonyangela oto ona.

⁴¿Aɛ wende to ndai oyatofa bokuwi wa oto wasi se? Ko Ngɛnɛ ewande kongo nd’atof’inde kwa se, kwa likolo; atofomo nde likolo to, eoka Ngɛnɛ wasu atokɔkɔlɔ ndoemes’inde likolo.

⁵Boto ɔmɔi atotanga nde lise limɔi lisolongela liasi, kongo wasi atangi nde bacho batotina batitwane; nde boto la boto akɔkɔmɛsɛkɛ lienyeli eliande angɛnɛ.

⁶Oyatotanga lise limɔi mbo yenga, asoenyela ongoma ko loasɔ loa Ngɛnɛ; la oyatola yeka, atolaka ko l’eoka ya Ngɛnɛ eoka asofa Mungu kelekëlë, la oyatileke eoka ya Ngɛnɛ, asofa imɔ ko Mungu kelekëlë.

⁷Eoka angwɛnɛ boto wasu oyatoyalaka eoka yande angɛnɛ, la angwɛnɛ boto kowa eoka yande angɛnɛ.

⁸Eoka toyala to la liwawi, ango tosoyala eba Ngɛnɛ; la eya mbo towa, tosowa ko eba Ngɛnɛ; eokao to toyala la liwawi, la towa, twende ango koa eba Ngɛnɛ.

⁹Liende ngo ko la litina-li mbo Masiya awaka la auwaka liasi, mbo ayaleke ko Ngɛnɛ wa eba liwa l’eba liwawi lisanga.

¹⁰¿Aɛ nd’atofa etungani yaɛ se eoka iye? ¿Aɛ nd’atosɛɔlɔ imɔ etungani yaɛ eoka iye? Eoka iso yaatotina totoemakala oso wa kɛka ya likomanyi lia Mungu;

¹¹kwa asɔnɔmɔkɔ loao nda Lokasa mbo— Mungu mbo— Kwa ayali Imi, batotina batoswakela’mi balui se, La bɛnɔkɔ bitotina bitoaolela Mungu mbo Ngɛnɛ.

¹²Ongoma to ɔmɔi la ɔmɔi wasu atokasanoela Ngɛnɛ Mungu loasɔ loande angɛnɛ.

¹³Eokao totakomyianëk’imɔ boto la boto wina lande, nde komyiaka baenyeli banu mbo angotak’imɔ loasɔ nda mboka ya etungani lokwes’inde ango ilango, ango likulya.

¹⁴Isoenyela la isoluwa imɔ ko l’isosha sha Ngɛnɛ Yesu mbo angwɛnɛ yeka eyele bokili ko yao angɛnɛ, sakolo ngo ko end’inde oyatangi nde mbo ende bokili, ambo ende bokili end’inde.

¹⁵Nde eya mbo etungani yaɛ eokesomoko botema wale eoka ya bieka ebitol’aɛ, ani otikɛsɛnɛ lande la losamɔ imɔ; osɛɛsɛlɛsɛ̈kɛ inde ona oyawelomoko la Masiya, ko l’eoka ya bieka eyaɛ.

¹⁶Omachëke mbo eyaɛ bilau bisendakomoko bieo,

¹⁷eoka Bɔkɔta wa Mungu boti loasɔ loa yeka yola kwa yomwa, kangä eloa liengani la lilatemi la bootaota wa Bolimo Botanu;

¹⁸eoka oyatokuwela Masiya la boyaeli-bo inde nd’atoomalesa Mungu, la atokuliomo lokuku lolau ende bato.

¹⁹Eokao to, totutakeke ko njasɔ ya lilatemi la ebitokɔkɔmɛsɛ baina lasu.

²⁰Owɛlɛ̈kɛ likuwa lia Mungu se ko loasɔ loa bieka. Bitotina bisosäsa, angwɛnɛ bokili, kongo ko bobe finɛ ende boto ona oyatokwesa boto se ko l’eoka ya bieka yola.

²¹Bolau ko ndokila nyama ya kanda bitoti la bänä ango yeka yasi imɔ ebitokwesa etungani yaɛ.

²²Lilendelu liaɛ liyaleke nda botema waɛ olo Mungu kongo nd’atɔɛnɛ liao; lɔkɛmɔ lole ende inde oyatikɔkɔlɛ ndofa botema Wande se eoka ya yeka ena eyetangi inde mbo elau.

²³Nde oyatotaka fee, limɔ elaka yeka ena, asofomo se eoka atileke la lilendelu; bitotina to ebiti la liimeli bile ko batwanelo.