Read lokele 1 Bakolinto 1 Bible Online

1 Bakolinto 1 - lokele bible

1 Bakolinto 1

¹Imi Paulo oyatomu lioi ndoyala Botomomu wa Masiya Yesu ko la lisangi lia Mungu, la etungani ya Etanda ako Sosetene,

²tosotoma liseeli liasu end’eba Etanda ya Mungu eyayali nda Kolinto end’ebasüchomo ko ende Masiya Yesu, ebatomu lioi lioyalaka ebatanu amamwito la batotina ebatosingwaka lina lia Ngɛnɛ wasu ako Yesu Masiya nda bilela bitotina, Ngɛnɛ wau la ewasu lisanga;

³tosotomel’ino bootaota la lilatemi lia Mungu Sango wasu la elia Ngɛnɛ wasu ako Yesu Masiya.

⁴Isofaekefa Mungu kelekëlë eoka yanu ko mbile bitotina loasɔ loa booto wa Mungu ebosofomo ino nda liwatemani lanu la Masiya Yesu,

⁵la eoka mbo osofotesomo nda beyaeli bitotina ko lande, la nda liekesi la nda liluwani,

⁶l’ani inango sha Yesu siakɔkɔmɛsɔmɔkɔ end’ino;

⁷ongoma ino angolengeela lofo angolɔmɔi loa bafi ba Bolimo, ani atolombakelak’ino lɔɛnɛsɔ loa Ngɛnɛ wasu Yesu Masiya,

⁸ako Inde oyatokɔkɔmɛsɛ ino ko nda liko, ani oti la litwanelo nda lise lina lia Ngɛnɛ wasu Yesu Masiya.

⁹Mungu ale wolendelomo, end’Inde oyasot’ino lioi ndosangana la Wana wande ako Yesu Masiya Ngɛnɛ wasu.

¹⁰Bitungani yami, isömb’ino to ko la lina lia Ngɛnɛ wasu Yesu Masiya, mbo bokulianeke ino batotina la mbo bawesani batayala sisi yanu, kangä mbo bowachaneke la nda baenyeli la nda likomyi lia njasɔ yanu.

¹¹Eoka, bitungani yami, bamɔi ba Kuloe basokambesa’mi fololo mbo ino wende la besho.

¹²Imi mbo boto la boto wanu atoonga mbo— Imi yende ewa Paulo. Bamɔi mbo— Nde imi yende wa Apolo; ango ko mbo— Imi ewa Kefa; ango ko mbo— Imi ewa Masiya.

¹³¿Mbo Yesu asoatana? ¿Mbo Paulo aolomokö nda lieka eoka yanu? ¿La walufiomokö nda lina lia Paulo?

¹⁴Isofa Mungu kelekëlë mbo itilufieke boto angɔmɔi wanu sakolo ko Kelisipo la Gayo kongo,

¹⁵mbo boto ataonga mbo osolufiomo ko la eliami lina liko Paulo.

¹⁶(Ambo yalufiakä imɔ ko eba bofindi wa Setefano; nde itiluwe kwa mbo isolufia wasi.)

¹⁷Eoka Masiya atitomeke’mi ndolufia bato, kangä ndonangoel’iyo Mboli Ilau; la inga to la wɛlï wa lioi mbo lieka lia Masiya litayala ko liyaëlä wawa.

¹⁸Eoka lioi lia linangoli lia lieka liende ko ebebe ende ebakosɛɛsɛlɛ, kongo ko end’iso ebasouwesomo liende bofoka wa Mungu.

¹⁹Losotomo to nda Lokasa mbo— Itosɛɛsɛlɛsɛ wɛlï w’ebale la wɛlï, la itosɛɔlɔ liluwani lia eba elälä.

²⁰¿Ewa wɛlï ende to ndai? ¿Botikasa wa Bikela ende ndai? ¿Boto wa ngwasu ende to ndai? ¿Mungu aisotombola wɛlï wa wenda eoka wende ko ebebe?

²¹Eoka ya wɛli wa Mungu to, eba wenda angoluwa Mungu ko la mboka ya wɛli, limɔ Mungu lɔɛnɛ mbo bolau ndouwekesa ebasoimela ko la mboka ya bibebe ya linangoli.

²²BaYuda to nd’atofelaka ndembe ya bisisho; BaHela nd’atolukaka wɛlï,

²³kongo ko iso nd’asonangola Masiya oyaolomökö nda lieka; ende BaYuda liende ko sɔni finɛ, ende BaHela la eba wenda, liende ko ebebe;

²⁴kongo ko ende ebasotomo lioi, la BaYuda la BaHela, Masiya ende ko bofoka wa Mungu la wɛli wa Mungu.

²⁵Eoka ebebe ya Mungu esolongela wɛlï wa balomboki fwaa la botembu wa Mungu bosolongela bofoka wa balomboki.

²⁶Bitungani yami, ɛnɛkɛ to, lotomo loanu lioi ende Masiya, mbo bamyɔ kongo ba wɛlï wa bato basotomo lioi, ko bamyɔ kongo ba bofoka, ko bamyɔ kongo bende bana ba bato b’isosha;

²⁷kongo ko Mungu asoaa bibebe ya wenda-bo mbo atomboleke eba wɛlï, la Mungu asoaa bilɛli ya wenda-bo mbo atomboleke eba bofoka;

²⁸Mungu asoaa mbuwa ya wenda-bo la twao etoti ango la litina, etoti ango yeka mbo asɛlɛkɛ yao ko wawa ko lau ebayali,

²⁹ongoma angwɛnɛ bolomboki koomakala nda baiso ba Mungu.

³⁰Nde ino wende bana bande ko eoka ya Yesu Masiya oyasoya wɛli wa Mungu end’iso, oyasoeshel’iso liengani la litanesi la liendoli;

³¹ongoma to kwa asɔnɔmɔkɔ nda Lokasa mbo— Oyatoomala, aomaleke ko l’eoka ya Ngɛnɛ.