Read lokele 1 Bakolinto 11 Bible Online

1 Bakolinto 11 - lokele bible

1 Bakolinto 11

¹Isoinel’ino to eoka otoenyakela’mi la baoi batotina bami la ndola bitotina ebisoaekelana’mi ndotel’ino ko yao;

³kongo ko ilɛmbi nde mbo oluweke la wɛlï mbo Masiya ale Botö wa bato batotina, botolome ale botö wa wali wande, Mungu ale Botö wa Masiya.

⁴Botolome ewata yeka yolinjaka botö wande ani atosombola, ango ani atonangola, ambo asotefwesa botö wande la sɔni;

⁵nde botomali oyatosombola, ango atonangola ani atilinjeke botö wande, ambo asotefwesa botö wande la sɔni-lole kwa mbo asomwomo swee ya botö loasɔ loa sɔni.

⁶Ango botomali atilinjeke botö wande, ani bolau ko mbo amweke swee yande, kongo ko eya to mbo lole sɔni ende otomali ndomwomo swee ango ndoyala litunu, atawataka to esinda yolinjaka botö.

⁷Nde botolome ati l’isosha sholinjaka botö eoka ale la bɔfɔnɔ la bɔfɛkɔ wa Mungu nde botomali ale bɔfɛkɔ wa botolome.

⁸Nde otolome atiakelomokö ko ndokuswa ende otomali, kangä otomali nd’akuswaka ende otolome.

⁹La imɔ mbo otolome atiakelomoko litina lia otomali, kangä otomali litina lia otolome.

¹⁰Ko l’eoka-ao lole ende otomali ndolinjaka botö wande kwa ndembe y’isosha la eoka ya bakitomo.

¹¹Nde luwaka imɔ mbo nda lisangi lia Ngɛnɛ wasu botomali atiyale ko inde angɛnɛ kongo, la otolome angoyala ko inde kongo;

¹²eoka kwa asokwaka otomali wa osooso atiteni ya otolome, ongoma to kwani botolome asootomo ko la otomali, la yaatotina bitosokwaka ko ende Mungu angɛnɛ.

¹³Ino angɛnɛ kɔtɔlɔkɔ loasɔ-lo nda betema yanu. ¿Mbo ende to olau mbo otomali asomboleke Mungu ani atilinje botö wande?

¹⁴¿Mbo botolome wa wanganga oyatitene swee aitoka sɔni? ¿Nde botomali eyala la swee bisa biisoyala ko bɔfɛkɔ wande?

¹⁵Swee bifomu nd’otomali kwa yeka yolinjak’inde—

¹⁶Nde e-loasɔ-lo loti loasɔ loa bosho, oyatolɛmbɛ ndowalana nda loao, aluweke mbo iso totikulie beyaeli wasi la Bitanda ya Mungu ko ongoma imɔ.

¹⁷Nde nda loasɔ loa lisɔngɔmi lia Etanda, atofa’mi of’ino likakanelo, itiinel’ino eoka otisɔngɔmɛ la wɛlï kangä la libebesi.

¹⁸Loasɔ loa oso, isooka mbo atosɔngɔmɔ ino nda Etanda, otoatakana botuka la botuka, la im’isoenyela sumbu mbo ende ongoma.

¹⁹Eoka loengani nde mbo wataneke botuka la botuka mbo ebasolembeelomo mbo bengani, baluwomoko wewe.

²⁰Atosɔngɔkɔmɔ ino nda elela ɛmɔi eti to ko ndola Elambɔ ya Ngɛnɛ;

²¹eoka boto la boto atotaɔsɔ eyande yeka kwa elambɔ yande, limɔ ɔmɔi atoka isiyɛ la wasi asokanelo la limwi.

²²¿Monito, mbo oti la ndakɔ olo atola ino bieka la atomwak’ino? ¿Mbo ototefwesa Etanda ya Mungu la otochambola bato ebati la yeka? ¿Iongeke to moni; mbo iinelek’ino? Nda loasɔ-lo iitoinel’ino!

²³Imi nd’afak’ino kwa afaka Ngɛnɛ ofa’mi, loko mbo Ngɛnɛ Yesu nda ocho ona ewawambomoko Inde nda liwa, Inde lounda lituma;

²⁴Inde lofaefa Mungu kelekëlë, limɔ Inde louna liao, Inde loonga mbo— Eli lile bindo yami ebile eoka yanu; kelakaka ani ko ndoenyakela’mi.

²⁵Ko ongoma mbisa yola, Inde lofaef’iyo kɔpɔ, Inde mbo— E-kɔpɔ-ye yende Ngɛla Eyai eyetinyomu nda bakila bami; atomwak’ino kɔpɔ-ye, kelakaka ani ko ndoenyakela Imi.

²⁶Eoka mbile bitotina ebitolak’ino lituma-li la ebitomwak’ino e-kɔpɔ-ye ele ko yota boeki wa litina lia liwa lia Ngɛnɛ wasu konda loyo loasi loande.

²⁷Eokao oyatola lituma-li, ango oyatomwa kɔpɔ-ye la bɔfɔnɔ ebotiengane ambo asoyala la nyongo nda bindo ya Ngɛnɛ la bakila bande.

²⁸Boto atatichaka botema wande angɛnɛ, limɔ aleke lituma la amweke kɔpɔ la bɔfɔnɔ eboöndu olau.

²⁹Eoka oyatola la oyatomwa angoenyela bindo la wɛlï, asola la asomwa lokomyo loande angɛnɛ.

³⁰Ko la litina-li wike banu basolɛlɛ la kambo la bamɔi basoingala tɔlɔ twa liwa.

³¹Nde eya to mbo tokomya betema yasu angɛnɛ wewe, ani iso angofomo se.

³²Kongo ko asokomyomo iso, tosokuchomo la Ngɛnɛ kwa asokuchomo bainɛngɛ mbo totafomo se amamwito la wenda-bo.

³³Ongoma to, bitungani yami, akasɔngɔmɛk’ino ndola Elambɔ, umbakelanaka—

³⁴ango ɔmɔi ewa l’isiyɛ atalaka bieka olo eyande-litina mbo otasɔngɔmɔ ko ndofomo se. Itoaesa njasɔ ebimɔi se, eyekayeke’mi end’ino.