Read lokele 1 Bakolinto 7 Bible Online

1 Bakolinto 7 - lokele bible

1 Bakolinto 7

¹Nda loasɔ lona to eloasɔnɔk’ino, bolau woeta bole ko mbo boto angowatema la botomali nda lisɔngɔni.

²Kongo ko kwa asoya belëfë likama, botolome la otolome asɛlɛkɛ ewande wali, la wali la wali asɛlɛkɛ ewande olome.

³Bolome la bolome afaefeke wali wande yao ebiengani la lisɔngɔni, ko ongoma wali ende olome wande;

⁴wali ati ngɛnɛ wa bindo yande angɛnɛ, kangä olome. Ko ongoma bolome imɔ ati ngɛnɛ wa bindo yande, kangä wali.

⁵Ofekelanëke lisɔngɔni, ambo ani osokuliana ongoma ko la mbile sinyo, mbo wɛnɛkɛ fofe ya lisomboli, limɔ mbisa koyalana liasi mbo Satana atasoshel’ino ko la boeno wanu wɔɔngɛsɛ yɛmɛ yanu.

⁶Isoonga ongoma ko ndolɛmbɛl’ino sumbu, inga mbo Mungu nd’ateli nde’mi ekela nda loasɔ-lo.

⁷Kongo imi nd’alɛmbi mbo batotina bayaleke kwa ayali nde imi ko bɔkɔlɔ; nde oto la oto afomu nde boyaeli ewande bolau ko la Mungu.

⁸Ende bɛkɔlɔ la ende ebawelu balome isoonga mbo losoeta la olau ani batikaleke kwa ayali nde’mi angosɔngɔ imɔ;

⁹nde eyambo batikɔkɔlɛ ndofeka yɛmɛ, batasɔngɔkɔ to, eoka ndosɔngɔ esoeta ndofɛfɛ la bolëfë.

¹⁰Ende ebasosɔngɔ isotela ekela, inga to’mi kangä Ngɛnɛ nd’ataka yao, mbo wali angosɛnyana la olome wande—

¹¹nde eya mbo basosila oko ndosɛnyana ani botomali angosɔngɔnɔ imɔ, angoko koinywa liasi ende bolome— la otolome angosokola wali wande.

¹²Ende ebamɔi, imi angɛnɛ nd’asoonga, inga to Ngɛnɛ, mbo ango oto wa Etanda eyala la wali oyatiimele, nde wali ekulia ndoyala lande, ongoma bolome angosokol’inde.

¹³Ko ongoma imɔ, otomali w’Etanda eyala la olome oyatiimele, nde bolome ekulia ndoyala lande, ongoma wali angosɛnyana lande.

¹⁴Eoka botolome oyatiimele asüchomo ko l’eoka ya wali wande, la wali imɔ oyatiimele asüchomo ko l’eoka ya olome wande oyasoimela; aenaka ongoma ani bana banu kokwa bokili wa nyongo, kongo ko basüchomo nda Etanda.

¹⁵Nde oyatiimele ɛlɛmbɛ ndosɛnyana, ambo basɛnyanɛkɛ; nda bɔfɔnɔ-bo wa loasɔ, oto wa Etanda, otomali kwa otolome, atikandomo; Mungu asot’iso lioi mbo toyaleke la lilatemi.

¹⁶¿Wali wa oto, oluwi nde kwa mbo otouwesa bolome waɛ; l’aɛ imɔ bolome, oluwi nde kwa mbo otouwesa wali waɛ?

¹⁷Kongo ko bolau ngo mbo boto la boto ayaleke la boyaeli ewafomoko inde la ani atomoko inde lioi ko la Ngɛnɛ Mungu. Isotela bitanda bitotina ekela-ye ongoma.

¹⁸¿Watinyaka to itombe ani Mungu atak’aɛ lioi? Angosokola imɔ loelo loa itombe. ¿Ndai ayalaka ko losunga ani Mungu atak’inde lioi? Atinyomöko itombe!

¹⁹Itombe sitiyale loasɔ; losunga imɔ lotiyale loasɔ. Kongo ko lilitesi lia Bikela ya Mungu lile nde loasɔ loeta.

²⁰Kwani ayalaka boto la boto nda mbile eyatomoko inde lioi, bolau mbo atikaleke ngo ko ongoma.

²¹¿Wayalaka bɔkɔwa ani watomoko lioi? Otakelëke loao bolenda, kongo ko bokɔkɔlɔ ndoendolomo, wɛnɛkɛ fofe, ambo bolau.

²²Bɔkɔwa oyasotomo lioi la Ngɛnɛ Yesu, ambo ale ko iote sha Ngɛnɛ; ongoma imɔ iote oyasotomo lioi ale ko bɔkɔwa wa Yesu.

²³Wasombomokö la bolïli; oyalëk’imɔ bɛkɔwa ya bato kongo.

²⁴Bitungani yami, kwani ayalaka boto la boto eyatomoko inde lioi, atikaleke ngo ko ani amamwito la Mungu wosungak’inde.

²⁵Nda loasɔ loa baseka, itiɔlɛ ekela ya Ngɛnɛ, nde itof’ino liölo lia loasɔ-lo kwa boto wolendelomo ko l’eoka ya booto wa Ngɛnɛ ende’mi.

²⁶Im’isoenyela to mbo, eoka ya bifembi ebikayeke nda mbile-ye, bolau mbo boto atikaleke ko la boyaeli ebole lande kwani.

²⁷¿Wende la wali? Olukëke fofe yosɛnyana lande. ¿Otiyale imɔ la wali? Olukëk’imɔ wali wasi.

²⁸Nde eyambo bɔsɔngɔ imɔ, liti to litwanelo la boseka esɔngɔnɔ, liti to litwanelo. Kongo ko ebatosɔngɔnɔ bɛnɛkɛ nde bifembi ya liwawi-li la imi nd’alɛmbi ndokufesel’ino yao.

²⁹Litina elitoonga’mi lanu, bitungani yami, lile mbo mbile ebisotikala bit’imɔ yumwa. Ko la yao ebitikali nde, mbo ebasosɔngɔ bayaleke kwa mbo bati la wali,

³⁰ebasolela batayalaka kwa mbo batilele oto, ebasoyaimwaka batayalaka kwa mbo batioke limɛngɔ; ebatɔkɛkɛ bokalala, batayalaka kwa mbo batisɛlɛ bieto,

³¹la ebasofomo isosha nda wenda-bo kwa mbo batikakalese wao, eoka likɔmɔnyi lia wenda-bo likosekwasekwa fwaa.

³²Itilɛmbɛ mbo ino oyaleke la tolöi twa wenda; oyati la wali atokɛsɛlɛ njasɔ ya Ngɛnɛ iyɛli mbo aomaleseke Ngɛnɛ,

³³nde oyale la wali atɔkɛsɛlɛ njasɔ ya wenda iyɛli mbo aomaleseke wali wande,

³⁴ongoma asoeyaeya. Ongoma to la bosanga la boseka batokɛsɛlɛ njasɔ ya Ngɛnɛ iyɛli shoüchel’Inde la bindo la botema lisanga. Nde botomali oyale la olome akokɛsɛlɛ eya wenda iyɛli mbo aomaleseke olome wande.

³⁵Isoongel’ino baölo-ba ko ndofotes’ino, inga ndokufesel’ino, kangä mbo oliteseke likomɔnyi lilau la mbo okuweleke Ngɛnɛ angoeyaeya nda botema.

³⁶Nde eyambo boto etanga nde mbo atikomye boseka wande loasɔ loa liäla la wɛlï ani engani nde ndosɔngɔnɔ eoka mbo boseka asɔfɛtɛ bindo, ambo loti la loasɔ, iyo la liäla basɔngɔnɛkɛ.

³⁷Kongo ko ango boto ekɔkɔmɔ nda botema wande, la ani loasɔ loasi lotitakomyomo, la ani boto ale l’isosha shokela ani, esanga nda botema ndotikala la wana wande ko boseka kongo, lole imɔ ko lolau elosokel’inde.

³⁸Ongoma to, boto oyasosɔngɛsɛ boseka wande asokela olau, la oyatisɔngɛsɛ wana wande asokela bolau woeta.

³⁹Wali asokandomo la olome wande la mbile bitotina ebiyal’inde la liwawi, nde bolome ewa, wali atikandomo imɔ, asɔngɔnɛkɛ oyatosang’inde, ko botolome wa Etanda kongo.

⁴⁰Nde nda botema wami isoenyela mbo etikala ani angosɔngɔmɔ imɔ, eyalaka nde la limɛngɔ; la itangi nde mbo yende imɔ la Bolimo wa Mungu nda botema wami.