Read lokele 2 Bakolinto 7 Bible Online

2 Bakolinto 7 - lokele bible

2 Bakolinto 7

¹Ino ebasamomu lami, ani afomoko iso e-basakä-ba, totaneseke to betema yasu ndosokokola bɔwɛwɛ bototina wa bindo l’ewa botema lisanga, la tükameseke betema yasu uka ende Mungu la lilitesi la bɔwa.

²Faefaka iso elela nda betema yanu, totikeele boto angɔmɔi wanu bobe, totibebeseke boto angɔmɔi, la totilimbake boto angɔmɔi.

³Itionge ani ndof’ino se; mba, isotaonga oso mbo ino wende nda betema yasu mbo towatemeke nda liwa la nda liwawi imɔ.

⁴Itokambes’ino fololo mbo isotendela ndoomala loasɔ loanu, botema wami bosoaa se suu la bosotuma fuu la lilatemi loasɔ loanu; isoyaimwa yai ani ayali’mi la bifembi imɔ wike.

⁵Eoka ayak’iso nda Makedonia bindo yasu bitiaɛumaka ango sinyo, kangä ko bifembi ya bɛfɔnɔ bitotina, bita la bosho lousa la bɔwa nda botema.

⁶Kongo ko Inde oyatɔɔngɛsɛ eba betema ya bolito, ako Mungu, Inde nd’aɔngɛsɛkɛ betema yasu eoka ya loyo loa Tito end’iso;

⁷inga loasɔ loa loyo kongo, kangä imɔ loasɔ loa liɔngɛsi la limɛngɔ elisok’inde end’ino la asoluwes’inde oluwesa iso eniya yanu, la ngandi eyokak’ino la yɛmɛ yanu yosungak’mi, eokao im’isooka limɛngɔ finɛ.

⁸Ango yeokesak’ino botema wale nda lokasa lona loami, nde kwani itiok’imɔ ikɛnɛnɛ ani yokaka ikɛnɛnɛ nda loao oso, eoka isɔɛnɛ mbo lokasa lona loafak’ino botema wale finɛ, ambo ko mbile sinyo kongo.

⁹Kwani isoka limɛngɔ, inga to eoka ya wale ewokak’ino, kangä eoka mbo wakalanganaka eoka ya wale wa betema yanu; wokaka nde wale ewaeshaka Mungu la ongoma otibebesomo ko loasɔ loasu.

¹⁰Botema wale ebososokwa ende Mungu botoesha likalangani elitofɔɔlɔ liuwesi, likalangani liitoesha ikɛnɛnɛ, kongo ko botema wale ebole la eba wenda-bo botofɔɔlɔ liwa angɛnɛ.

¹¹Tɛnɛ to botema wale ebosoeshel’ino Mungu, mbo bosɔɔlɛs’ino bofiili, aina yɛmɛ yosokola loasɔ nda lokomba, aina lisomi liosoma la bobe, aina bɔwa ndowanga Mungu, aina yɛmɛ ya booto, aina bafumba bokucha bɔfɔɔli wa obe! Nda loasɔ lototina osɔɛnɛsɛ mbo ot’imɔ se nda loao mbo otikulye bɔfɔɔli.

¹²Nde ambo yasɔnɔkɔ lokasa end’ino, inga mbo boto ona w’obe akuchomoko, inga loasɔ loa boto ona oyakelomoko obe, kangä mbo yɛmɛ yanu yokɔkɔmɔ nda likuwa liasu liɛnɛlɛkɛ fololo, yasɔnɔkɔ ongoma ko nda baiso ba Mungu.

¹³Eokao tososungakomo lanu. Nde tososungakomo imɔ liasi eoka ya bootaota wa Tito mbo botema wande angɛnɛ bosɔɔngɔ loasɔ loanu yaatotina.

¹⁴Kwa asoomala’mi loasɔ loanu nda batoi ba Tito, ongoma kwa baoi bami end’ino bende wewe, ongoma to loomalo loasu ende Tito eoka yanu lole imɔ ko wewe.

¹⁵Botema wande bosofɛfɛ la losamɔ end’ino ani asoenyakela lilitesi lianu la bɔwa la linyangi ebiɛnɛk’inde omolo eyanu.

¹⁶Isoyaimwa la limɛngɔ eoka isokɔkɔlɔ ndolendelo ino nda njasɔ bitotina.