Read lokele 1 Batesalonika 2 Bible Online

1 Batesalonika 2 - lokele bible

1 Batesalonika 2

¹Bitungani yami, ino angɛnɛ to nd’aluwi mbo fɛtɛti eyayak’iso omolo end’ino etiayaka liyëlä,

²kongo ko okak’iso biale finɛ la akelomoko iso sɔni nda Filipoi, kwa aluw’ino, twatendelaka ko la lisungi lia Mungu ndonangoel’ino Mboli Ilau ya Mungu atiteni ya bifembi wike.

³Eoka lifumbesi lia inango shasu liti lia batwanelo, liti lia bɔlɛlɔ, liti ango la bolimbakeli;

⁴kongo ko kwa asokuliomo iso ko la Mungu angɛnɛ ndolendelomo nda linangoli lia Mboli Ilau, ko ani to tosoonga, inga ndoomalesa bato angɛnɛ, kangä Mungu oyatokotakela betema yasu.

⁵Eoka ino nd’aluwi mbo tociaɔngɔlɔk’ino la baoi basu ango ko la litina liololaka yeka yanu, kwa aluwi nde Mungu;

⁶totialukaka lokuku loa bato, angoko end’ino, angoko ende bato basi imɔ, ani twakɔkɔlɔkɔ ndokomya ino la isosha kwa esha Batomomu ba Masiya.

⁷Kongo ko twayalanaka lanu la bɔfɔu kwa bana’oli la kwa nyango oyatokukia bana bande angɛnɛ.

⁸Aniyak’iso oniy’ino ongoma twayalaka la limɛngɔ ndokael’ino, inga ko Mboli Ilau ya Mungu kongo, kangä imɔ ko bawawi basu lisanga, eoka bosoyala ebasamomu lasu.

⁹Bitungani yami, osoenyakela to likuwa lia bonui la likati eliakelakak’iso la ocho la löwa, litina mbo totayala la bolito end’ino ango ɔmɔi, eyanangoelak’iso enangoel’ino Mboli Ilau ya Mungu.

¹⁰Ino nd’aluwi la Mungu imɔ aluwi eoka osɔɛnɛ mbo boyaeli wasu sisi yanu ebimeli wende la botanu la liengani la boti la litwanelo ango limɔi;

¹¹ino nd’aluwi imɔ ko mbo, twafumbesak’ino, boto la boto, kwa atokelaka sango ende bana bande,

¹²twaɔnjɔnjak’ino, twaimak’ino mbo oyalakeke la boyaeli woengana bato ba Mungu oyasot’ino lioi mbo ɔɔtɛkɛ nda Bɔkɔta la nda tala yande angɛnɛ.

¹³Ko l’eoka ya litina-li, iso imɔ totimache ndofaefa Mungu kelekele eoka mbo imelak’ino wɛndi wa Mungu ewokak’ino end’iso, otiaaelaka wao kwa mbo wɛndi wa bato kongo, kangä mbo wende wɛndi wa Mungu wewe la mbo wao bokokelaka likuwa nda betema yanu ebasoimela.

¹⁴Bitungani, ino nd’asokweekela to bitanda ya Mungu ya bato ebasoomana la Yesu Masiya, ebile nda Yudea; mbo ino nd’asookesomo bifembi-ao ko la besamba ya bato ba tukela yanu, kwa aokesomoko iyo ko la besamba ya BaYuda,

¹⁵ebaolaka la Ngɛnɛ Yesu la Batɔndɔli imɔ l’ebasokongoï’iso, ongoma batiomalese Mungu nde bende biyani la bato batotina,

¹⁶ani asokufes’iyo okufes’iso ndoongana la ebati ba tukela yasi mbo buwesomoko, litina mbo ko mbile bitotina baɔlɔɛkɛ ikweelo sha batwanelo bau; kongo ko efango esoosh’iyo nda tuu.

¹⁷Bitungani, eoka mbo tososɛnyana lanu ko mbile sinyo kongo, ko lɔsɛnyano loa bindo ebisoɛnɛlɛ, inga eloa betema yasu, ongoma twalɛmbɛkɛ la yɛmɛ finɛ ndɔɛnɛ biɔmbɔ yanu liasi,

¹⁸eingo, twalɛmbɛkɛ ndoyɛn’ino, ko imi Paulo liasi la liasi, nde Satana akufesaka nd’iso.

¹⁹¿Ndai to koyala iɛli shasu, kwa linɛngina liasu, kwa iyoyo sha iomala shasu, oso wa bɔmbɔ wa Ngɛnɛ Yesu nda bayelo bande, mbo bati imɔ ko ino?

²⁰Eingo, ino wende tala la linɛngina liasu.