Read lokele 1 Batesalonika 3 Bible Online

1 Batesalonika 3 - lokele bible

1 Batesalonika 3

¹Eokao, ani atiakɔkɔlɔkɔ iso ndoumwak’imɔ, twasangaka ndomachana nda Atenai ko iso angɛnɛ,

²la iso lotoma Timoteo, etungani yasu la bokuwi wa Mungu nda Mboli Ilau ya Masiya, litina mbo akɔkɔmɛsɛk’ino la mbo afumbesek’ino nda lilendelu lianu,

³litina mbo boto angɔmɔi wanu ataeyaeya eoka ya bifembi-bi, eoka ino angɛnɛ nd’aluwi mbo lole loasɔ loasu ngo ko ongoma.

⁴La ayalak’iso amamwito lanu, iso lokambes’ino oso mbo totokesomoko bifembi ongoma la kwani bisokweel’ino, kwa aluwi nd’ino.

⁵Eoka ya litina-li, ani itikɔkɔlɛ ndoumwak’imɔ, yatomaka wɛndi ndoluwa ani ayali lilendelu lianu, eoka mbo Bokotakeli atakotel’ino la mbo bonui wa likuwa liasu litayala ko wawa.

⁶Kongo ko kwani asoinwa Timoteo end’iso la asoyaeshel’iso mboli ilau ya lilendelu lianu la losamɔ loanu la asokambes’inde okambes’iso mbo otoenyakel’iso la olau, mbile bitotina, la mbo otoyalaka la yɛmɛ yɔɛn’iso, kwa iso imɔ ko ndɔɛn’ino,

⁷ko la litina-li, Bitungani, betema yasu bisoaesomo se loasɔ loanu la bifembi la tale yanu, ko ol lilendelu lianu,

⁸eoka kwani asok’iso ongoma mba osokɔkɔmɔ fii ende Ngɛnɛ, tokoyali nde la liwawi liyai.

⁹¿Boni to bɔfɔnɔ wa kelekele ebisokɔkɔl’iso ndoinoela Mungu eoka yanu, loasɔ loa limɛngɔ litotina elitoyaimwa lasu eoka yanu nda baiso ba Mungu?

¹⁰La ocho la löwa, totosombokola la sheteseli mbo twɛnɛnɛkɛ lanu l’ɔmbɔ l’ɔmbɔ la mbo tokɔkɔmɛsɛkɛ bina ebisoomelo nda lilendelu lianu.

¹¹Nde Mungu angɛnɛ la Sango wasu, la Ngɛnɛ wasu ako Yesu alongameseke mboka yasu fii ko end’ino;

¹²la Ngɛnɛ aulweseke la atumeseke losamɔ loanu losamakana la elosama batotina imɔ kwa ayali imɔ eloasu end’ino,

¹³litina mbo Inde akɔkɔmɛsɛkɛ betema yanu mbo biyaleke bitanu l’angwɛnɛ ango litwanelo, kangä liengani nda baiso ba Mungu Sango wasu nda bayelo ba Ngɛnɛ wasu ako Yesu, amamwito la ebüchomu bande batotina!