Read lokele 1 Timoteo 2 Bible Online

1 Timoteo 2 - lokele bible

1 Timoteo 2

¹Isotafelak’ino oso to, mbo osomboleke, ömbeke, olɔmbɔkɔlɛkɛ ko la kelekele, loasɔ loa bato ba kanda bitotina,

²la eoka ya bɛkɔta l’ebasotaliomo l’isosha, litina mbo boyaeli wasu boyaleke la lilatemi la liɔngɛsu la lilitesi lia Mungu la bato lisanga.

³Ongoma lole lolau la losokuliomo nda baiso ba Mungu Bouwesi wasu,

⁴oyalɛmbi mbo bato batotina buwesomoko la mbo biyeleke ko nda liluwani lia wewe.

⁵Eoka Mungu ende ko Ɔmwito la Ikomya atiteni ya Mungu la bato ko Ɔmwito kongo, ako Boto ko Masiya Yesu,

⁶oyafak’Inde angɛnɛ kwa liendoli lia batotina la inango-si sianangolomoko nda lisho elioengana.

⁷Imi nd’atomoko bonangoli la Botomomu nda likuwa-li, isoonga ko momongo, itite lolanga, ko ndoekekesa bato ba tukela ya wenda njasɔ ya lilendelu l’eya wewe.

⁸Isosanga to mbo batolome batolakeke oso nda lisomboli nda tukela bitotina, ani batoilaka besamba betanu l’angwɛnɛ lisomi la tofenya;

⁹la mbo batomali bawateke bisinda yoengana la wɛlï la limama la sɔni, inga to la swee ya belowa, la bisinda ebile la bɔfɛkɔ wa falata, la tokɛikɛli, la bisinda ya loketi lofi,

¹⁰kongo ko bayaleke la boyaeli la bekeeli bilau kwa aondu nde la batomali ebasoaolela likuwa lia Mungu.

¹¹Botomali ayaleke la lilitesi lia boeki la tau la liikami sefinɛnde

¹²itikulye botomali ndoekesa nda ɛsɔngɔmɛlɔ ango ndokomya batolome, kangä ndoyala tau.

¹³Eoka Adamu akelomoko oto oso, limɔ Awa mbisa;

¹⁴la Adamu atialimbomoko, kangä otomali nd’alimbomoko mbo akweke nda bobe.

¹⁵Nde batomali buwesomoko ngo ko nda lioti lia bana, eya to mbo bekɔkɔmɛlɛ nda lilendelu la losamɔ la botanu ebowatemani la limama.