Read lokele 2 Timoteo 3 Bible Online

2 Timoteo 3 - lokele bible

2 Timoteo 3

¹Luwaka nde mbo nda bacho ba liili, mbile biwaü finɛ bilayaka.

²Eoka bato belayalaka la yɛmɛ ya njasɔ yau angɛnɛ kongo, la yɛmɛ ya bieto wike, tofäalä, bɔmɛtɔ, ebatosɛɔlɔ basi, ebaitolitesa ebaot’iyo, ebati la bootaota, ebati la boyaeli botanu,

³ebati la booto, la angwɛnɛ liwa-ngandi, eba tomwatomwa, ebatiluwe ndofekela yɛmɛ yau, ebale la bolengi wa nyama, ebatilɛmbɛ bolau,

⁴ebatowamba baina, eba bofaofao nda njasɔ, ebatofaala la bɔfɛnɔ, ebasami ko bamɛngɔ nde batisame Mungu,

⁵batokweela boyaeli wa basemoli ba Mungu, nde batoanganya bofoka wande nda betema. Taka to bɔfɔnɔ-bo w’ato bɔkɔngɔ!

⁶Bamɔi bau batɔɔndɔkɔkɔ ndokaɔtɔ nda ndakɔ mbo baɔngɔlɛkɛ totomali etosokaka bolito wa njasɔ ibe, la etosofɛfɛ la yɛmɛ ya bɛfɔnɔ wike,

⁷ebatoekaeka liekeëlä, angokɔkɔlɔ ndoosha liluwani lia wewe ango sinyo.

⁸Kwa afekwanaka nde Yane la Yambele ofekwana la Mose, ko ongoma, e-bato-ba batofekwana njasɔ ya wewe; betema yau bisobeba la obe la bati boimelomo nda njasɔ ya lilendelu.

⁹Kongoko baitolonga ndɔkɛ la oso eoka bibebe yau bitoluwana la batotina kwa ayalak’imɔ loasɔ loa bato ana kwaala.

¹⁰Nde aɛ Timoteo, osotuta liekesi liami la wɛlï, boyaeli wami, la yao ebisosangaka’mi, lilendelu liami, liombakeli liami angowa esole, losamɔ loami, la likɔkɔmɛlɛ liami,

¹¹la likongolomu la biale eyokaka’mi, la nda Antiokia la nda Ikonio la Lusetula. Aina bakongolomu ebokaka’mi! Nde Ngɛnɛ lɔɔnɔkɔlɔkɔ’mi nda bao batotina fɛɛ.

¹²Eingo ko, batotina ebasangi ndoyalaka la lilitesi lia Mungu ko la Masiya Yesu nda liwawi-li, bekongolomoko nde;

¹³kongo ko bato babe la balimbakeli batokaetama nda obe, batolimbaka la batolimbokomo imɔ.

¹⁴Nde aɛ angɛnɛ, kɔkɔmɔkɔ nda yao ebisoek’aɛ la ebisoimel’aɛ mbo yende wewe ani asoluwak’aɛ bato ebasoekekes’aɛ,

¹⁵la mbo, ko nda shainɛngɛ shaɛ osoluwa Kasa ya Mungu ebisokɔkɔlɔ ndɔɔlɛs’aɛ liluwani lia lilendelu liolendelo Masiya Yesu.

¹⁶Lokasa lototina losotomo ko la Bolimo wa Mungu la loondu nde ndosungak’iso nda liekesi lilau, la nda boimo la litomboli lia yao ebiti wewe la ndokɔsɔlɔ ebale kwa bainɛngɛ nda liengani,

¹⁷mbo Boto wa Mungu aɔlweke hɔlɔɔ ani asosungomo ndokela bakuwa balau batotina.