Read lokele Baebele 11 Bible Online

Baebele 11 - lokele bible

Baebele 11

¹Lilendelu lile to liluwi lioimela njasɔ ebikokɛsɛkɛl’iso toɛli, la lile liaesi se lia njasɔ ebikɛnɛli kɔni end’iso.

²Eoka ko la liao bangau bakuliomoko la lokuku lolau.

³Ko la lilendelu tosoluwa mbo yaatotina yakelomoko ko la lioi lia Mungu, mbo yao ebisɔɛnɛlɛ bitiakelomoko ko la yao ebisɔɛn’iso la baiso.

⁴Ko la lilendelu, Abele lotambela Mungu litambi elialongaka elia Kaina, ani atangomoko mbo boto wa liengani ko la Mungu oyaaelaka bafaefi bande; ongoma ko l’eoka ya lilendelu, oyawaka akoonga.

⁵Ko la lilendelu Anoka ilomoko nda Use mbo atɛnɛ liwa; litiaoshak’inde eoka Mungu nd’ailak’inde. Eoka ani akilomo nda Use aongelomoko mbo boto oyaomalesaka Mungu,

⁶la aenaka lilendelu boto angokɔkɔlɔ ndoomales’Inde. Eoka loengani la boto oyatoya ende Mungu mbo aimeleke mbo ayali, la mbo atɔɔlɛs’iyo bondanda, bako ebatolukak’Inde.

⁷Ko la lilendelu Noa oyataluwesomoko loasɔ loa ebikɛnɛlɛkɛ, inde lolitesa Mungu, la inde loswa watɔ kwa ndakɔ eoka ndouwesa bofindi wande; ko ongoma inde lofa eba wenda se, la inde ako Noa losangola botiko wa liengani elitosangolomo ko l’eoka ya lilendelu.

⁸Ko la lilendelu Abalayama, ani atomoko lioi, inde losekwa ko la lilitesi okakɛ nda elela eyekaɔlɛk’inde kwa botiko la inde losekwa ani atialuwaka olo atɔkɛ lande.

⁹Ko la lilendelu inde lolimela nda yese eyatikelomoko inde lisakä, kwa bɔɛnda, la inde loyalaka nda kumbo la Isaka la Yakobo ebasanganaka lande nda lisangoli lia lisakä.

¹⁰Eoka inde loluka bokenge ebotoswomo suu nda lionda, Bosweeli la Bɔfɔɔli ngo Mungu angɛnɛ.

¹¹Ko la lilendelu Sala ani atiaak’imɔ wali woota, ambo inde aɔlɔkɔ bofoka woaelo lieme, eoka inde lotang’Inde wolendelomo oyatelak’inde lisakä, ako Mungu.

¹²Ongoma to boto ɔmɔi oyaaka ngo kwa bolyo loota bato wikewike kwa bokamu wa tolonge twa use la kwa boke nda ngɔngɛ ya liyande angotangomo loketi.

¹³E-batotina-ba bawaka ngo ko la lilendelu ani bakakɔchɛlɔmu lisakä, nde iyo lɔɛnɛ liao kwa ilimele sha okenge iyo loinela liao, l’ani iyo loaolaka mbo baaka bɛɛnda la bakɛndi nda wenda-bo;

¹⁴nde bato ebatoonga ani, batoluwesa basi fololo mbo basokalukake yese yasi yolimela ina.

¹⁵Eya to mbo baenyakelaka yese ena olo asekwak’iyo, ani bɛnɛkɛ fofe yoinywa omao.

¹⁶Kongo ko balɛmbɛkɛ finɛ ko yese yolongela, eko eya Use; eokao Mungu atiaokaka sɔni ndotangokomo Mungu wau, eoka Inde lotatonjel’iyo bokenge.

¹⁷Ko la lilendelu, akɔtɔlɔmɔkɔ Abalayama, inde lotamba Isaka kwa litambi liofechomo ani atikelomoko lisakä, inde lotamba wana ɔmwitoto wande;

¹⁸ako inde oyaongelomoko mbo— Ko la Isaka bana batotangomo ebaɛ;

¹⁹eoka inde lotanga mbo Mungu atokɔkɔlɔ ndotɛmɔlɔ ango ebasowa la ainolomoko wana wande kwa mbo asouwa nda liwa.

²⁰Ko la lilendelu Isaka loonga baoi ba lifotesi ende Yakobo la Esau nda njasɔ ebikayeke.

²¹Ko la lilendelu, Yakobo ani aaka inde tina lowa, inde loonga baoi ba lifotesi ende ɔmɔi la ɔmɔi wa bana ba Yosefa limɔ inde lotulama likolo lia itumbe shande nda lisomboli.

²²Ko la lilendelu, Yosefa ani atungamak’inde, inde loenyela loasɔ loa liunjwi lia bana ba Isalaɛlɛ la inde lotel’iyo ndola eoka ya bolyo wande.

²³Ko la lilendelu, Mose loisomo ko tengai isatɔ ko l’ebaotak’inde, eoka iyo lɔɛnɛ mbo aaka wana wa litutuku la batiawangaka liti lia bɔkɔta wa Ejipeto.

²⁴Ko la lilendelu, akondaka Mose otowange, inde lofekaka ndotangomo Wana wa boseka wa Falao,

²⁵nde inde loɛtɛmɛlɛ ndokongolomo amamwito la bato ba Mungu, inga to bamɛngɔ ba batwanelo ebatoumwa ko mbile sinyo.

²⁶Atangaka mbo sɔni kwa eya Masiya kolongela lifoka lia likama lia yese ya Ejipeto, eoka inde lololaka bondanda ebokaɔlɛk’inde.

²⁷Ko la lilendelu inde losekwa nda Ejipeto, inga eoka ya bɔwa ndowanga efango ya bɔkɔta, kangä mbo akɔkɔmɔkɔ ko ndowɛlɛ Oyaitɔɛnɛlɛ baiso.

²⁸Ko la lilendelu inde lokela Elambɔ ya Lieti la inde lomɛmyaka bakila mbo Boombesi wa bana ebaotomu oso atamata ango iyo.

²⁹Ko la lilendelu bana ba Isalɛlɛ loleka Eliya ya Balia Batelu kwa mbo boili, nde akotaka eba Ejipeto okela ongoma, iyo lolinda mbi.

³⁰Ko la lilendelu bakula ba bokenge wa Yeliko lowɛlɛmɛ se ani balingelomoko ko bacho osambale.

³¹Ko la lilendelu Lahaba, botomali wa bolëfë, atiasɛɛsɛlɛkɛ amamwito l’eba litefokoli, eoka inde lonyangela totombi la booto.

³²¿Iongeke to bini njasɔ imɔ? Eoka mbile bitoomelo’mi ndotangela njasɔ ya Gideona, l’eya Balaka, l’eya Samisona, l’eya Yɛfɛta, l’eya Dawidi, l’eya Samwele, l’eya bɛtɔndɔli;

³³mbo ko la lilendelu, e-bato-ba bakakalesaka bɛkɔta, iyo bakomiaka njasɔ la liengani, iyo baɔlɔkɔ basakä, bakandaka bɛnɔkɔ ya simba,

³⁴batiamesaka bolengi wa bösä, balɔmwaka fänga ya chaka, baɔlɔkɔ bofoka ani bawaka boleka, bakweloko bewangɔ ya bita, baunaka bikuke ya biyani ya yese yasi.

³⁵Batomali banyangelaka bato bau ebawaka, ko la litɛmwi; bamɔi baunakomoko tokwa tototina nde bafekaka ofaikolomo mbo baosheke lotɛmɔlɔmɔ eloeta.

³⁶Bamɔi bakotelomoko ko la lomuchamucho la likuchaki lia tososola, batomoko bakala la bɛnyɔlɔlɔ;

³⁷Baolomoko ko la fëngu ya batalɛ, batenomoko yaki la besumani, baolomoko la angɔngɔnɔ, bakɛndɛkɛndɛkɛ ani bawati kofo ya bɛkɔkɔ l’eya mbuli, la boeno bofi, nda bifembi biwau, bakelakomoko bobe finɛ.

³⁸bato ba wenda batiaondoko oyalana lau; baeyaeyaka nda baɔmbɛlɛ la nda föngo, la nda basɛkɔ la fowa ya nyɛlɛ.

³⁹La ango batotina-ba baluwanaka la lokuku lolau ko l’eoka ya lilendelu liau, kongo ko batitaɔlɔkɔ kɔni lisakä,

⁴⁰eoka Mungu nd’asotüchel’iso loasɔ lolongela l’olau, mbo bataɔlɔlɔmɔ ko iyo, kangä iso lau lisanga.