Read lokele Baebele 12 Bible Online

Baebele 12 - lokele bible

Baebele 12

¹Eokao, asolingakelomo iso ongoma la ekuke efi ya ebasoaolela lilendelu liolendela Yesu, toteke belito bitotina se imɔ ko la bobe ebosowatema la bakolo basu, tokweke mangu la winikɔlɔ nda fɔmbi eyesokomielomo iso;

²tokwɛlɛkɛ ngo Yesu bonono oyale Botoli oso la Oyatɔɔlɔlɔ imɔ lilendelu liasu, oyatendelaka liwa lia lieka ko l’eoka ya bootaota ewüchelomoko Inde, oyaolyaka sɔni ya lieka, Inde asoyala se nda bosamba wa olome wa kɛka ya Mungu.

³Enyakelak’Inde oyatendekelaka tofenya tobe twa bato ba batwanelo mbo ino angɛnɛ otaoka itɔɔ la mbo otalewa nda betema yanu.

⁴Nda bita ebisonanak’ino la obe, bafumba banu bakasɛndɔli bakila banu.

⁵Oisoosala baoi ebaongomoko lanu kwa atoimomo bana angɛnɛ? Wana wami, oolyëke liekesi lia Ngɛnɛ Mungu, Olewëke ani atoimakomo aɛ ko lande;

⁶Eoka Ngɛnɛ Mungu atoekekesa la likuchi wana ona oyatosam’Inde, Atokuchaka imɔ bana ebatotangomo ebande.

⁷Tendekelaka to eoka ya likuchi, ko ongoma Mungu asokeel’ino kwa mbo wende bana bande. ¿Oni to wana atikomyomo la sango wande?

⁸Eya mbo otikomyomo kwa atokomyomo bana batotina, ambo ot’imɔ bana wewe, kangä eba nyongo.

⁹Loasɔ loasi imɔ, iso balomboki twende la basango bokomya iso, tosolitekes’iyo, nde simbi to iso kokakalesomo la Sango wa belimo la mbo toyaleke la loiko, eti wa?

¹⁰Basango basu nd’atokuchak’iso ko mbile sinyo kongo, kwa atosang’iyo, nde Mungu nd’atokomya iso mbo toenganeke olau la mbo toyaleke batanu kwa ayali imɔ ko Inde.

¹¹Nda mbile ya lokomyo, lole ngo ko la bomusi, loti la limɛngɔ, nde mbisa ebasoekesomo la loao, batɔɔlɔ bondanda wa lilatemi, boko liengani.

¹²Eokao, ilaka besamba yanu ebisolɛmbɛlɛmbɛ la wangekemesa balui banu ebasotatema,

¹³longamesaka mboka ya batindi banu ko fii, mbo eba bikoti batafelengwana, kangä mbo basäsolomoko.

¹⁴Kotaka ndoyalana la lilatemi, ino la basi batotina, la botanu imɔ; otiyale la wao ani otilɛnɛkɛ Mungu, boto angɔmɔi.

¹⁵Tɛnɛkɛ la wɛli mbo boto angɔmɔi wanu ataomelo booto wa Mungu, la mbo litina lia bololo litaɔ̈tɔ̈ nda betema yanu ndof’ino liwesani, l’ani batotina kobebesomo;

¹⁶la wɛli imɔ mbo boto angɔmɔi atakwelo bolëfë, angoko itomwela kwa ayalaka imɔ Esau oyaungesaka lisakä lia botiko ebokɔɔlɛk’inde, ko la bieka ya lila limwito.

¹⁷Oluwi nde mbo, mbisa ani alɛmbɛk’inde fofe yosangola lisakä lia lifotesi, inde lofekelomo, eoka atiɛnɛkɛ fofe yokalangana, ango kwa alukak’inde yao la foo imɔ.

¹⁸Nde otisishaneke tina la yeka yomatelomo la besamba, eko bösä wa loiloi, la boutuutu la lilima lia ndi la lomba lofi,

¹⁹angoko losongo loa ifonge la limiki lia baölo, la ebokaka liao loombaka mbo bataongelomo lioi liasi imɔ,

²⁰eoka batiakɔkɔlɔkɔ ndotendela liti eliatomoko mbo— Eya ngo nyama komata löngo, yao koolomo ko la batalɛ.

²¹La eoka mbo wɛnɛɛli ona walongaka l’iwaesa, Mose loonga mbo— Isowa bɔwa, isoilima to!

²²Nde ososishana tina la Löngo loko Siona, ngima ya Mungu wa Loiko eko Yelusaleme ya Use, la ende litunda lia likama lia Bakitomo ebasosɔngɔkɔmɔ nda basemoelo,

²³la ende Etanda y’ebaotomoko ko oso ebasotomo baina nda Use, la ende Mungu Wataki wa yaatotina, la ende belimo ya bato ba liengani ebasɔɔlɔlɔkɔ hɔlɔɔ,

²⁴la ende Yesu Bokumi wa Ngɛla Eyai, la imɔ nda bakila ebamɛmyɔmɔkɔ ebatoonga njasɔ bilau yolongela eya bakila ba Abela.

²⁵Tɛnɛkɛ la wɛlï mbo otatefokol’Inde oyasoonga; eya to mbo iyo ana batiakufaka likuchi eoka batefokolak’inde oyaimak’iyo ono nda wenda-bo, nde asa kɔni iso ebasotefwes’Inde omolo nda Use oyasoimak’iso.

²⁶Limɔ limiki liande liatukatukesa nyɛlɛ, nde kwani asotika lisakä mbo— Ko liasi imɔ itotukatukesa litukesa limɔi, inga ko nyɛlɛ kongo, kangä imɔ ko use lisanga.

²⁷Lioi-li liko mbo— Liasi limɔi, lile la litina mbo losokolomo loa yao ebisolɛlɛlɛsɔmɔ, biko yao ebisokelomo kongo, mbo yao ebitilɛlɛlɛsɔmɔ bitikaleke.

²⁸Eokao, asoaelak’iso Yakakaelo ya Bɔkɔta wasu eyetilalɛlɛlɛlɛ, toyaleke la bootaota ebotosung’iso ndoomalesa Mungu la lisemoli la lilitesi la bɔwa;

²⁹eoka Mungu wasu ende bösä wa liambilo.