Read lokele Baebele 7 Bible Online

Baebele 7 - lokele bible

Baebele 7

¹Oyoto’yo, ako Mɛlɛkisɛdɛkɛ, bɔkɔta wa Salema, kanga ya Mungu Oyalongeli, atowanakä la Abalayama, ani ainwak’inde nda liömä lia bɛkɔta la inde loonga lande liölo lia lifotesi;

²la Abalayama lokael’inde likaɔ limɔi nda liu lia findaka eyaindak’iyo. Ayalaka oso Bɔkɔta wa Liengani, lina liande lisosanolomo ongoma, limɔ ale imɔ Bɔkɔta wa Salema, litina mbo— Bɔkɔta wa Liɔngɛsi.

³La sango la nyango wande, la bangau la batata, la baotelo la bawelo bande angoluwana, nde ayalak’inde la bɔfɔnɔ wa Wana wa Mungu, asotikala kanga konda loiko.

⁴Tɛnɛ ngo lokuku loa likama loa oto’yo! Ngau wasu wa oso, ako Abalayama angɛnɛ, lofaefak’inde likaɔ lia liu lia ngwoko ya findaka eyaindomoko.

⁵La bana ba Lewi imɔ ebasɔɔsɔ isosha sha kanga basotelomo ndola yosɔnjaka bakaɔ ba liu ende bato; batɔɔsɔkɔ bao ko ende bitungani yau ebale imɔ ko bana ba ngau ako Abalayama.

⁶Nde oyatiaaka wana wa ngau yau nd’afomoko bakaɔ ana ko la Abalayama, la inde loongel’inde liölo lia lifotesi ani Abalayama nd’aaka ngɛnɛ wa basakä ba Mungu.

⁷Lioi-li litikɔkɔlɛ ndofinyomo la wee, liko mbo— Oy’ɔkɛkɛ nd’atofotesomo ko la oy’ofi.

⁸Ono kwani, ende balomboki ebatowaka ebatɔɔlɔ bakaɔ ba liu, nde omolo nda mbile ena, oyaɔlɔkɔ atangomoko mbo boto wa liwawi lia loiko.

⁹Ele kwa ndoonga mbo Lewi angɛnɛ, oyaɔlɔkɔ bakaɔ, inde nd’akusolaka bao oso ko la Abalayama,

¹⁰eoka ayalaka ko nda bindo ya ngau wande eyatowanaka Mɛlɛkisɛdɛkɛ la Abalayama.

¹¹Nde eya to mbo likɔmɔnyi lia bakanga ba Lewi liaɔlɔlɔkɔ bato nda baiso ba Mungu (eoka mbo bato bafomoko nde Bikela ko la liao), boni to boeno wa kanga yasi ya liluku lia Mɛlɛkisɛdɛkɛ, tinga oyatangomoko kanga ya liluku lia Alona?

¹²Eoka kanga befetekwanesomo, ambo Bikela kofetekwanesomo imɔ lisanga.

¹³Nde Inde oyasoongelomo njasɔ-bi aaka wa tukela yasi, eyetiaaka la boto wokuwela etambelo nda ndakɔ ya Mungu.

¹⁴Losoluwana fololo mbo Ngɛnɛ wasu atɛmwaka nda Yuda la Mose atiaongaka lioi ango limɔi loasɔ loa isosha sha kanga nda tukela ena.

¹⁵Loasɔ-lo losoluwana fololo, nde simbi to mbo kanga yasi asotɛmwa ko la bɔfɔnɔ wa Mɛlɛkisɛdɛkɛ,

¹⁶oyatiafomoko isosha sha kanga ko la ndola ya Bikela ya balomboki, kangä ko la bofoka wa loiko elotilaɔlɔkɔ imɔ.

¹⁷Eoka losoongelomo’inde mbo— Aɛ wende Kanga konda layalaya, ko la liluku lia Mɛlɛkisɛdɛkɛ.

¹⁸Nde ekela ya oso esofangolomo eoka yaaka la bɔlɛmbu la liyaela lifi

¹⁹eoka ekela etiaɔlɔlɔkɔ yeka; kongo ko iɛli esholongela sisoeshomo iso esitosishanes’iso tina la Mungu.

²⁰La lotiaaka ongoma sakolo ko la ekanɔ—

²¹eoka kwaala bafomoko isosha sha kanga l’angwɛnɛ ekanɔ, nde Oyo wa kwani ko la ekanɔ ya Inde oyaongelak’inde mbo— Ngɛnɛ Mungu atinyaka ekanɔ la atilakalanganek’imɔ, mbo Aɛ wende Kanga konda layalaya.

²²Ko l’ekanɔ-ye oyasoyala tuka ya Ngɛla yolongela, ale ko Yesu.

²³Kanga ya kwaala yaaka nde wike, eoka liwa liakufesak’iyo ndoumwaka;

²⁴kongo ko Inde akotikala konda layalaya eoka aitoaekelana isosha sha Kanga.

²⁵Eokao konda layalaya asokɔkɔlɔ ndouwesa ebatosishanaka la Mungu ko lande, ani atoyalaka’Inde la liwawi layalaya ko ndoongekel’iyo.

²⁶Loondu nde lasu ndoyala la Kanga-Eyeti ya bɔfɔnɔ wande, la botanu, ati la bolimbake, ati la loasɔ, asosɛnyana la bato ba batwanelo la asotaliomo tala olikolo lia use.

²⁷Ati ango la boeno botambaka lise la lise litambi loasɔ loa batwanelo bande angɛnɛ oso, limɔ loasɔ loa batwanelo ba bato kwa akelakaka Kanga-Ebieti ina; akelaka nde ano likela limwitoto ani atambaka Inde liwawi liande angɛnɛ.

²⁸Eoka Bikela nd’afaka balomboki isosha shoyala kanga-bieti, kongo ko liölo lia ekanɔ eyayaka mbisa ya Bikela, lisoücha Wana Oyasɔɔlɔlɔmɔ konda layalaya.