Read lokele Yakobo 4 Bible Online

Yakobo 4 - lokele bible

Yakobo 4

¹¿Bita la bawesani ebayali lanu basekwi nde lonima to? Biisosekwa nda biɛmɛ ebisotukatukana lanu mbo bikakaleseke betema yanu?

²Wende la yɛmɛ ya biengo nde otiɔlɛ, otoola la otololaka nde otikɔkɔlɛ ndosɛlɛ yao, otowesakana, otonana bita; nde otiɔlɛ eoka otifele yao.

³Otofelaka la oitoaela eoka otofelaka nde efinole ko mbo osileseke yao nda yɛmɛ yanu.

⁴Wende bato ba nyongo! ¿Otiluwe mbo lisaɔ lia eba wenda lile wiyani la Mungu? Eokao oyakasangeke osukana lisaɔ lia eba wenda-bo ambo asokwa wiyani la Mungu.

⁵¿Elua otangi nde mbo Lokasa loa Mungu losoonga ko liongëla mbo— Bolimo ewayalesak’Inde nda betema yasu bosolol’iso la bokelë?

⁶Nde Mungu atofaekef’iso booto woetela, kwa asoonga imɔ lokasa mbo— Mungu atofekela eba bɛmɛtɔ, nde atofaekefa eba liɔndwi se ko booto wande.

⁷Eokao litesaka ko Mungu kongo, fekelaka Satana, limɔ atokwel’ino botili.

⁸Sishanaka tina la Mungu, limɔ Inde atosishana tina lanu. Solaka besamba yanu, ino bato ba batwanelo la tanesaka betema yanu, ino ba betema imbale!

⁹Okaka tokɛnɛnɛ, lelaka, wɛlɛkɛ foo se; twɛlɔ etososɛk’ino, tokinjweke ndeli la limɛngɔ likinjweke ko tolöi.

¹⁰Ɔndɔkɔlɔkɔ betema yanu se nda baiso ba Mungu, limɔ Inde elataliak’ino likolo.

¹¹Bitungani, osɛɔkɔlɔnɛ̈kɛ! Oyatosɛɔkɔlɔ etungani, kwa oyatoata loasɔ loa etungani yande, ambo asosɛɔkɔlɔ Bikela la asoataka Bikela. Nde eya mbo boataka Bikela, ambo oti imɔ bolitesi wa Bikela, kangä wataki wa yao.

¹²Oyataka Bikela la Bokomyi wa Bikela ale ko Ɔmwito, ako Inde kongo oyatokɔkɔlɔ ndouwesa la ndosɛɛsɛlɛsɛ bato. ¿Aɛ wende to ndai oyatoataka boyalani laɛ loasɔ?

¹³Tɛnɛ ngo, ino ebatoonga mbo— Ango ko louse, ango lɛlɛngɔ tɔkɛkɛ nda bokenge boko asisa, tolaingalaka omao ko mwaka ɔmɔi okatimbesa bokalala la tolaɔlɔkɔ bondanda;

¹⁴kongo ko wende ebatiluwe kɔni ani atoyala liwawi lianu lɛlɛngɔ. Eoka wende kwa liumba elisɔɛnɛlɛ ko sinyo sha mbile, lamao kosɛɛsɛlɛ.

¹⁵Nda lifa lia baoi bana, ino koonga mbo— Eya mbo Ngɛnɛ ɛlɛmbɛ ongoma, iso koyala la liwawi, iso kokela e-loasɔ-lo, ango ko lona.

¹⁶Nde kwani ino nd’atofaala la bɔmɛtɔ wanu la bɔmɛtɔ bototi-bo bole ko bobe.

¹⁷Eokao, oyatoluwa ko ndokela olau, nde angokela wao, ani lona kotangomo obe end’inde.