Read lokele 1 Yoane 1 Bible Online

1 Yoane 1 - lokele bible

1 Yoane 1

¹Lona eloayalaka ko nda baakoelo, eloaokak’iso, la elwɛnɛk’iso la baiso basu, eloatichakak’iso, la eloamatakak’iso la besamba yasu, loko loasɔ loa Lioi lia Liwawi,

²(liwawi lina liɛnɛsɔmɔkɔ to la twɛnɛkɛ liao la tosokambesa ino la tosonangoel’ino loasɔ loa Liwawi lina lia layalaya eliayalaka ko ende Sango la eliɛnɛsɔmɔkɔ end’iso).

³Lona elwɛnɛkɛ nd’iso la eloaokak’iso, tosonangoela imɔ ko ino, mbo ino imɔ osukaneke lasu lisaɔ; la lisukani-li liasu lile to amamwito la Sango la amamwito la Wana wande ako Yesu Masiya.

⁴Tososɔnɛl’ino njasɔ-bi mbo bootaota wasu bɔɔlwɛkɛ.

⁵Wɛndi ebokak’iso ende Ngɛnɛ la wao ebotonangoel’iso ino wende mbo— Mungu ende Löwa la end’Inde angwɛnɛ lilima ango sinyo.

⁶Eya toonga mbo tososukana lande l’ani tokoyali nda lilima, ongoma tosoonga ko lolanga la toti bato ba wewe;

⁷nde eya mbo tokɛndɛ nda löwa kwa ayali Inde nda löwa, ani tososukana boto la boto lisaɔ, la bakila ba Yesu Wana wande basotanekes’iso batwanelo batotina.

⁸Eya toonga mbo toti la bobe, ani tosolimbakel’iso angɛnɛ la wewe bot’imɔ nda betema yasu;

⁹nde toaola batwanelo basu, Inde nd’ayali wolendelomo la ewa liengani mbo amɛsɛlɛk’iso batwanelo basu la atanekes’iso bitotina ebitiengane.

¹⁰Eya toonga mbo totikeleke batwanelo ani tosof’Inde lolanga la lioi liande lit’imɔ nda betema yasu.