Read lokele 1 Yoane 2 Bible Online

1 Yoane 2 - lokele bible

1 Yoane 2

¹E bana bami bakɛkɛ, isosɔnɛl’ino njasɔ-bi mbo otatwanelo; nde eya to mbo boto etwanelo, ani tole la Boongeli woongel’iso ende Sango, ako Yesu Masiya Oyengani,

²la Inde nd’ale Likambi lioendol’iso loasɔ loa batwanelo basu, inga ko eoka eyasu kongo, kangä eoka ya eba wenda bototi.

³Toluwi nde mbo tosolu wak’Inde ko ani asolites’iso bikela yande.

⁴Oyatoonga mbo— Isoluw’Inde, ani atilitese bikela yande, inde ale ngo la lolanga la wewe bot’imɔ nda botema wande;

⁵nde oyatolitesa lioi liande, wewe losamɔ loa Mungu losoengana chaa nda botema wande. Ko la loasɔ-lo tosoluwa mbo toyali nde tɔɔ end’Inde;

⁶boto oyatoonga mbo asokɔkɔmɔ tɔɔ end’Inde, ambo aondu nde ndoyala la boyaeli ewayalaka lande.

⁷Ino basamomu, itisɔnɛl’ino ekela eyai, kangä ekela eyesoumwaka la eyaɔlɔk’ino ko nda liakoli; ekela eyesoumwa yende lioi elisokak’ino.

⁸Nde isosɔnɛl’ino oko ekela eyai, la end’Inde la end’ino lisanga yende ngo wewe, mbo lilima lisowanjwa la löwa loa wewe losoana oko kwani.

⁹Boto oyasoonga mbo ale nda löwa ani asoiyana la booto lande, akoyali ngo ko nda lilima ko kwani.

¹⁰Boto oyasosama booto lande, asoanyema nda löwa la at’imɔ la litina liokwesaka basi likulia.

¹¹Nde boto oyasoiyana la booto lande akoyali kɔni nda lilima la akokɛndɛkɛndɛ nda lilima, aitoluwa olo atɔkɛ lande eoka lilima lisotufesa baiso bande.

¹²Bana bakɛkɛ, isosɔnɛl’ino lokasa eoka batwanelo banu basomɛsɛlɔmɔ ko l’eoka ya lina liande.

¹³Basango, isosɔnɛl’ino lokasa eoka oluwi nde Inde Oyayali ko nda liakoli. Tosenge, isosɔnɛl’ino lokasa eoka osokwesa la osolonga Ewa Bobe. Bana, isosɔnɛl’ino lokasa eoka osoluwa Sango.

¹⁴Basango, isosɔnɛl’ino lokasa eoka oluwi nde Inde Oyayali ko nda liakoli. Tosenge, isosɔnɛl’ino lokasa eoka wende la bofoka finɛ, la lioi lia Mungu likoyali nda betema yanu la eoka osokwesa Ewa Bobe.

¹⁵Osamëke wenda-bo, ango ko biengo ebile nda wenda-bo; eya mbo boto esama wenda-bo, ambo ati la losamɔ loa Mungu nda botema wande.

¹⁶Eoka bitoti ebile nda wenda, biko yɛmɛ ya bindo, la yɛmɛ yolola ebitɔɛnɛ bato la baiso, la tofälä twa liwawi-li, yao-bi bitisekwe ende Sango kangä nda wenda-bo.

¹⁷Wenda-bo bosowanjwa mbao la yɛmɛ ya wao imɔ, kongo ko inde oyatolitesa lisangi lia Mungu atotikala nde ko layalaya.

¹⁸Bana’mi, mbile ya liko esoya to; kwa okak’ino mbo Bofekwani la Masiya atoya, ongoma kwani bafekwani ba Masiya basoyala; ko ongoma tosoluwa mbo mbile ya liko esoya.

¹⁹Basekwak’end’iso nde batiayalaka ebasu, eoka eya to mbo beyalaka ebasu, ani basoumwaka lasu; nde basekwaka end’iso eoka ndwɛnɛsɛ fololo mbo batotina bati ebasu.

²⁰La ino nd’asowɛlɔmɔ ko loücho loa Ewa Botanu, limɔ ino batotina nd’aluwi ebile wewe;

²¹isosɔnɛl’ino lokasa, inga eoka mbo otiluwe wewe, kangä mbo oluwi nde wao la mbo lolanga loti ango loa wewe.

²²¿Ndai to nd’ayali ewa lolanga, sakolo ngo ko inde oyatoanganya mbo— Yesu ati Masiya? Oyatoanganya Sango la Wana, boto ona ende Bofekwani la Masiya;

²³angwɛnɛ boto oyatoanganya Wana, koyala la Sango. Nde oyatoaolela Wana, ale imɔ ko la Sango.

²⁴Nde ebisokak’ino ko nda liakoli, bitikaleke ngo ko lanu; eya to mbo yao ebiokak’ino nda liakoli betikala nda betema yanu, ani ono kotikala tɔɔ ende Wana la ende Sango imɔ.

²⁵La lisakä eliatikelak’Inde etikel’iso liende ngo ko mbo Liwawi lia layalaya.

²⁶Isosɔnɛl’ino njasɔ-bi loasɔ loa bato ebatoengoles’ino.

²⁷Nde loücho elosowɛlɛmɛ ino ko end’Inde, losotikala lanu, la bot’imɔ la boeno mbo boto ekesek’ino; kangä eloande loücho lotoekekes’ino njasɔ bitotina la loao loende wewe, loti lolanga. La kwani asoekesa loao oekes’ino, tikalaka ngo ko end’Inde.

²⁸Kwani, bana bakɛkɛ, yalakaka ngo ko end’Inde, litina mbo akɛnɛlɛk’Inde toyaleke ko la lotendela lolau, angowangatalel’Inde la sɔni nda loyo loande.

²⁹Eya to mbo boluwa mbo ende Wengani, luwaka imɔ ko mbo boto oyakakeleke ko eya liengani, ambo aotomu nde ko lande.