Read lokele Liɛnɛsu 15 Bible Online

Liɛnɛsu 15 - lokele bible

Liɛnɛsu 15

¹Limɔ imi lɔɛnɛ esisho yasi nda Use, esisho efi yomwaalomo; bakitomo bosambale loyala la baömä bosambale ba liili, eoka efango ya Mungu etosilela oko nda bao.

²Limɔ imi lɔɛnɛ eliya eyɛnɛli kwa talatala ya wɛ̈li eyesosobiana la bösä, limɔ ebasolonga nyama ena la bɔfɔnɔ wande la loketi loa lina liande, iyo loemala nda ngɔngɛ ya eliya ya talatala, la iyo lounda bakwengu ba Mungu.

³La iyo lochwaka Bɔɛlɛ wa Mose, bɔkɔwa wa Mungu, la Bɔɛlɛ wa Wana wa bɔkɔkɔ, iyo lochwaka mbo— E Ngɛnɛ Mungu wa Bofoka Bototi, bekeeli yaɛ bile bifi yomwaalomo; Baatakeli baɛ bengani nde la wewe, Aɛ Bɔkɔta wa tukela ya wenda!

⁴¿Ngɛnɛ Ndai aitowangak’Aɛ, ndai to aitotalia lina liaɛ tala? Eoka ko Aɛ kongo nd’ale Botanu la tukela ya wenda bototi beyaka, la betulakamel’Aɛ se eoka bakomyi baɛ basɔɛnɛkɛsɔmɔ.

⁵La mbisa yaamao, imi lɔɛnɛ Ndako ya Mungu eyele nda Use loliolomo,

⁶la bakitomo bosambale lotɛmwa ani baundi baömä bosambale. Bawataka bisinda bitanu ebilangalangi la balingakomu nda bokuku ko la bɛkɔli ya mbela.

⁷Limɔ ɔmɔi wa eba liwawi anɛi lofaefa bakitomo bosambale biengo ya mbela osambale, ebitumi fuu ko la efango ya Mungu wa liwawi lia layalaya;

⁸la Einelo ya Mungu lotuma la bolilya wa liineli lia Mungu la bofoka wande, la boto angɔmɔi wokɔkɔlɔ ndɔɔtɔ nda Einelo ya Mungu ko nd’akasileke baömä bosambale ba bakitomo bosambale.