Read lokele Liɛnɛsu 9 Bible Online

Liɛnɛsu 9 - lokele bible

Liɛnɛsu 9

¹Limɔ bokitomo wa bɔɔmwi looma ifonge, la imi lɔɛnɛ ilonge esiakwaka se nda nyɛlɛ; la inde lofomo lofungola loa liöndo eliti la tunga;

²la inde loliola liöndo eliti la tunga; limɔ bolilya lokuswaka nda liao, kwa bolilya wa litumbo lifi la liso lia use la buse imɔ lotufaka eoka ya bolilya wa liöndo.

³Limɔ bakelele lokuswaka nda bolilya, bao lomelana nda wenda la bafomoko isosha kwa shao sha tomamowa;

⁴la twao lofomo boimo mbo batabebesa bangala, ango ko chwingi, ango ko tosandu, ko bato kongo ebatisɔlɔnɛsɔmɔ la ndembe ya Mungu nda toangala twau.

⁵La bafomoko isosha shokekes’iyo biale ko tengai bɔɔmwi kongo, inga shoola bato; nde wale ewokes’iyo balomboki wayalaka kwa wao wa imamowa esitoicha boto.

⁶La nda bacho ana, bato belukaka liwa nde batiɛnɛkɛ liao, la beyalaka la yɛmɛ yowa, kongo ko liwa likwakelak’iyo otili.

⁷Bakelele lɔɛnɛlɛ kwa punda ebisotonjomo okanana bita la nda betö iyo lowata yeka kwa toyoyo twa mbela la biɔmbɔ yau loyala kwa biɔmbɔ ya balomboki;

⁸la swee yau loyala kwa swee ya batomali la bainyo bau kwa bainyo ba simba;

⁹la mboso ya bekükü yau loyala kwa betaka ya yeto la elundi ya bafafu bau loyala kwa elundi ya bilutelo ya punda wike ani bitoengaka mangu okakɛ bita;

¹⁰iyo loyala la bekali kwa tomamowa la bainyo nda yao la bofoka wau wobebesa balomboki ko tengai bɔɔmwi loyala ko nda bekali.

¹¹Bale la Bɔkɔta wokakales’iyo, ako bokitomo wa liöndo eliti la tunga, lina liande nda lioi lia BaYuda mbo Abadona, la nda lioi lia BaHela mbo Apolona, litina mbo Bosɛɛsɛli.

¹²Aeko, liömä lia oso lisoeta! Toka kɔni, baömä bambale batoya mbisa!

¹³Limɔ bokitomo wa liambɛ looma ifonge, lamao imi loka limiki lisokuswa nda baseke ba etumbelo ya lifaefi ya mbela eyeyali oso wa Mungu;

¹⁴limiki loonga la bokitomo wa liambɛ oyaundi ifonge mbo— Faikolaka bakitomo banɛi ebakandakomu nda liande lifi liko Eufalate.

¹⁵Limɔ bakitomo banɛi ana ebatakomiomoko ndoumbakela ko saa-ye, la lise-li, la tengai-ye, la mwaka-bo, iyo lofaikolomo mbo boleke botüku wa isatɔ wa balomboki.

¹⁶Loketi loa ebananaka bita ebatalemaka nda punda loko batinda ba batinda ba bilɛfu, imi loka loketi loau.

¹⁷Nda lɔɛnɛsɔ, imi lɔɛnɛ punda la ebatalemaka nda yao, kwa mbo bawataka betaka bitelu kwa bösä la boele, la betö ya punda loyala kwa betö ya simba la bösä la bolilya la boele lokuswaka nda bɛnɔkɔ yau;

¹⁸la botüku wa isatɔ wa balomboki loolakomo ko la baömä-ba basatɔ, bako bösä la bolilya la boele eyakuswaka nda bɛnɔkɔ yau.

¹⁹Eoka bofoka wa punda bole ko nda bɛnɔkɔ yau la nda bekali yau, eoka bekali yau loyala kwa njɔ ebile la betö eyau, la bitobebesa balomboki ko la yao.

²⁰Bato ebasandeloko se, ebatiaolokomoko ko la baömä-ba, batiakalanganaka loasɔ loa bekeeli ya besamba yau, batiangomachaka lisemoli lia belimo ibe la bɛfɔnɔ ya mungu ebisotulomo nda mbela la bieto ya pata la besongo, l’ebisokwɛtɔmɔ nda batalɛ la tosandu, ebitikɔkɔlɛ ango ndoka ango ndɔɛnɛ kwa ndokɛndɛkɛndɛ;

²¹la batiakalanganaka loasɔ loa baoli bau boolaka bato, ango ko basoo bau la bilëfë yau la wiya wau.