Read lubukusu Lir. 1 Bible Online

Lir. 1 - lubukusu bible

Lir. 1

¹Mu lirakikha Wele abaang'ana[1] likulu ne liloba.

²Liloba se liaba ne efwaani tawe, lundi se liabamo siindu tawe ne sisiilima siaba khu lusiba, mala roho owa Wele[2] afwelanga khu meechi.

³ Nio, Wele alaka ali, “Buwaanga bubeeo,” mala buwaanga bwabao.

⁴Wele abona ali buwaanga bwaba bulayi, mala aukhasia buwaanga khukhwama khu siilima.

⁵Atiuukha buwaanga ali, “Kumuusi” ne sisiilima asitiuukha ali, “Siilo.” Bwelabula mala bwasia, endaalo eye khunyoa.

⁶ Nio Wele alaka ali, “Embaka ebeo akari we kameechi, mala yaukhasie kameechi khukhwama khu meechi.”

⁷Wele akhola embaka mala aukhasia kameechi kakaaba asi wayo khukhwama khwako kakaaba angaaki wayo. Mala kaba kario.

⁸Nio Wele atiuukha embaka eyo ali, “Likulu.” Bwelabula mala bwasia, endaalo eya khabili. [HEAVEN THE DWELLING PLACE OF GOD--MWIKULU-ABUUNDU NIIO WELE AMENYILE THE WATER ABOVE THE VAULT--KAMEECHI KAALI ANGAAKI WE MBAKA THE VAULT OF HEAVEN--EMBAKA YE LIKULU EARTH--SIBALA The Abyss of Water--Lusiba lwe Kameechi Pillars of the Earth--Chinjeko Chichatikiya Sibala Pillars of the Sky--Chinjeko Chichatikiya Likulu Sheol--Emakoombe]

⁹Nio Wele alaka ali, “Kameechi kaali asi we likulu kebuusie abuundu alala, mala sibala sibonekhe.” Mala kaba kario.

¹⁰Wele atiuukha sibala ali, “Liloba,” ne kameechi kakebuusia alala aakatiuukha ali, “Chinyanja.” Mala Wele aabona ali bili bilayi.

¹¹Wele alaka ali, “Liloba likhusie bimelwa chingano choosi: bibiama bumiicho ne bibiindi bibiama kamatuunda, buli silala khuloondekhana ne lukano lwasio khu sibala.” Mala kaba kario.

¹²Liloba liarusia bimelwa chingano choosi, mala Wele abona ali bili bilayi.

¹³Bwelabula mala bwasia, endaalo ekhola khataru.

¹⁴Ne Wele alaka ali, “Bikhosia bibeo mu mbaka mwe likulu biaukhasie kumuusi khukhwama khu silo, mala bibe bibiekesia biise[3], chindaalo ne kimiiko,

¹⁵bibe buwaanga mu mbaka mwe likulu bikhosie khu liloba.” Mala kaba kario.

¹⁶Nio Wele akhola bikhosia biboofu bibili. Sikhosia siboofu siamiie kumuusi ne sitiitikho siamiie siilo, lundi akhola ching'enieesi chosi.

¹⁷Mala Wele abira mu mbaka mwe likulu bikhosie khu liloba,

¹⁸biamiie kumuusi ne siilo, mala biaukhasie buwaanga khukhwama khu siilima. Mala Wele abona ali bwaba bulayi.

¹⁹Bwelabula mala bwasia, endaalo ekhola khane.

²⁰Wele alaka ali, “Kameechi kabemo bie bulamu bikali, ne chinyuni chibe mu mbaka mwe likulu.”

²¹Nio Wele abaang'ana naliiria kimiboofu kie munyanja alala nende bioosi bie bulamu bibiechula mu meechi khuloondekhana ne chingano chabio, ne chinyuni chingano choosi. Mala Wele abona ali bwaba bulayi.

²²Mala Wele abibiita chikhabi ne aloma ali, “Saalana mukuche, mwichule mu nyanja, ne chinyuni chikuche khu liloba.”

²³Bwelabula mala bwasia, endaalo ekhola kharaano.

²⁴Nio Wele alaka ali, “Liloba lirusie bie bulamu khuloondekhana ne chingano chabio, chikhaafu ne bibiindu bimoola ne chisaang'i che mundaa ne chisolo khuloondekhana ne chingano chacho.” Mala kaba kario.

²⁵Wele akhola chisaang'i che mundaa ne chisolo khuloondekhana ne chingano chacho, ne chikhaafu khuloondekhana ne chingano chacho, nende buli sisiindu simoola asi khuloondekhana ne lukano lwasio. Mala Wele abona ali bwaba bulayi.

²⁶ Nio Wele aloma ali, “Lekha khukhole omundu mu fwaani yefwe, ne lukoondo lwefwe, ne lekha bamiie khu ng'eeni, khu nyuni, ne khu saang'i choosi, chimbaywa nende che mundaa[4], chimboofu ne chindiiti.”

²⁷ Nio Wele abaang'ana omundu mu fwani yewe. Abuumba omuseecha no mukhasi.

²⁸Mala Wele ababiita chikhabi ne aloma ali, “Saalana mukuche, mwichusie liloba mala libe mu bunyali bwenywe, mwamiie khu ng'eeni ne khu nyuni ne khu bioosi bie bulamu bikeenda khu liloba.”

²⁹Mala Wele aloma ali, “Namuele enywe buli simelwa sisiama bumiicho, sili khu liloba lioosi, nende buli murongooro kwe bibiaamo bilimo chimiicho bibe biakhulia bienywe.

³⁰Ne biakhulia bia buli saang'i ne nyuni, buli siindu simoola khu liloba, nende buli siindu siilimo kumuuya kwe bulamu, bilalia bisaala.” Mala kaba kario.

³¹Wele abona buli sisiindu nisio akholile, mala bwaba bulayi lukali. Bwaba ekolooba, bwelabula mala bwasia, endaalo ekhola sita.