Read lubukusu Lir. 11 Bible Online

Lir. 11 - lubukusu bible

Lir. 11

¹Nono babaandu be khu sibala sioosi baba ne lulomo lulala ne lilomaloma lifwaanane.

²Nga bauyauuya khukhwama ebukwe banyoola sibala sie kumweyeeywe sia Sinari mala bamenyayo.

³Baboolana bali, “Yiicha khuupe kamatifari mala khu koosie bulayi.” Nio mu bweyaangu bwe kamabaale baba ne kamatifari, ne mu bweyaangu bwe simendi baaba ne laamu.

⁴Nio, baloma bali, “Yiicha khwiyombakhile lukoba nende endeleelwa yole mwikulu nio khwikholele lisina khukhakhola khurio khwasalanisibwa khu sibala sioosi tawe.”

⁵Nio Wele Omunyali Owa Bioosi ekha asi khubona lukoba ne endeleelwa niyo babaandu baba ne bombaakhe.

⁶Mala Wele Omunyali Owa Bioosi aloma ali, “Lola babaandu bano bali ekholo ndala, lundi balomaloma lulomo lulala, ne kano kali busa khurakikha khwe kamakali niko banyala bakhola, mala se siliio silabakhiingilila khukhola nisio benya khukhola tawe.

⁷Yiicha khwikhe khuche khukoyaanie lulomo lwabwe nio balekhe khuuliilisiana mu khuloma.”

⁸Wele Omunyali Owa Bioosi abasalanisia khukhwama abwenao balekha khukhwombakha lukoba basalanikha mu sibala sioosi.

⁹Khwako batiuukha lukoba olwo bali Babeli,[23] sikila abwenao niio Wele Omunyali Owa Bioosi akoyanisilia babaandu ne chinomo che sibala sioosi mala khukhwama abwenao Wele Omunyali Owa Bioosi abasalanisia bacha khu sibala sioosi.

¹⁰Lisaaye lia Shemu nilio lino: Enyuma we kimiiko kibili, khukhwichula khwe kameechi ne khuwele, Shemu aaba ali ne kimiiko emia ndala, mala asaala Arifakisati.

¹¹Enyuma we lisaalwa lia Arifakisati, Shemu amenya kimiiko chimia chiraano mala asaala babaana babaandi basoleeli ne bakhaana.

¹²Nga Arifakisati amenya ola bukhulu bwe kimiiko kamakhumi kataru na kiraano asaala Sela,

¹³ne enyuma we lisaalwa lia Sela, Arifakisati amenya kimiiko chimia chine na kitaru, mala asaala babaana babaandi basoleeli ne bakhaana.

¹⁴Nga Sela amenya ola bukhulu bwe kimiiko kamakhumi kataru, asaala Eberi,

¹⁵ne enyuma we lisaalwa lia Eberi, Sela amenya kimiiko chimia chine na kitaru mala asaala babaana babaandi basoleeli ne bakhaana.

¹⁶Oli Eberi ali ne bukhulu bwe kimiiko kamakhumi kataru na kine asaala Peleki,

¹⁷ne enyuma we lisaalwa lia Peleki, Eberi amenya kimiiko chimia chine ne kamakhumi kataru mala asaala babaana babaandi basoleeli ne bakhaana.

¹⁸Nga Peleki amenya ola bukhulu bwe kimiiko kamakhumi kataru asaala Reu,

¹⁹ne enyuma we lisaalwa lia Reu, Peleki amenya kimiiko chimia chibili na tisa mala asaala babaana babaandi basoleeli ne bakhaana.

²⁰Oli Reu ali ne bukhulu bwe kimiiko kamakhumi kataru na kibili asaala Seruki,

²¹ne enyuma we lisaalwa lia Seruki, Reu amenya kimiiko chimia chibili na saba mala asaala babaana babaandi basoleeli ne bakhaana.

²²Nga Seruki amenya ola bukhulu bwe kimiiko kamakhumi kataru asaala Naori,

²³ne enyuma we lisaalwa lia Naori, Seruki amenya kimiiko chimia chibili, mala asaala babaana babaandi basoleeli ne bakhaana.

²⁴Oli Naori ali ne bukhulu bwe kimiiko kamakhumi kabili na tisa asaala Tera,

²⁵ne enyuma we lisaalwa lia Tera, Naori amenya kimiiko emia ndala ne likhumi lilala na tisa, mala asaala babaana babaandi basoleeli ne bakhaana.

²⁶Oli Tera ali ne bukhulu bwe kimiiko kamakhumi saba asaala Aburamu, Naori ne Harani.

²⁷Lisaaye lia Tera nilio lino: Tera aaba raraawe owa Aburamu, Naori ne Harani. Harani aaba raraawe owa Luti.

²⁸Harani anyoa afwa, Tera raraawe ne asiili. Afwila mu sibala nisio asaalilwamo sia Uri sie Bakalitayo.

²⁹Mala Aburamu ne Naori bareera bakhasi, mukha Aburamu aaba Sarai ne mukha Naori aaba Milika, omukooko owa Harani. Harani aaba raraawe owa Milika ne Isika.

³⁰Mala Sarai aaba omukuumba, se aaba no mwana tawe.

³¹Tera abukula Aburamu omwana wewe, ne Luti omwana owa Harani, omwichukhulu wewe, ne Sarai omukhaana wewe, mala auuya nabo barura mu sibala sia Uri sie Bakalitayo bacha mu sibala sia Kanaani, ne nga boola Harani bamenyayo.

³²Tera amenya kimiiko chimia chibili ne kiraano mala afwila mu Harani.