Read lubukusu Lir. 13 Bible Online

Lir. 13 - lubukusu bible

Lir. 13

¹Nio Aburamu aniina khurura mu Misiri, niye no mukhasi wewe nende buli siindu nisio aaba nasio alala ne Luti. Bengila mu sibala sie lubeka lwe siafubo wa Kanaani.

²Aburamu aaba omuiinda lukali mu biaayo, efwesa, ne mu sahabu.

³Arekukha arura sibala sie siafubo wa Kanaani oola Beteli, abuundu niio ombakha liiema mu khurakikha, akari wa Beteli ne Ai.

⁴Oola abuundu niio ombakha alutare lwe khunyoa. Abwenao Aburamu esaayilao Wele Omunyali Owa Bioosi.

⁵Ne Luti yesi, owarekukha ne Aburamu, aaba ne bibiaayo, chikhaafu, ne kamaeema.

⁶Khwako kamaloba kababoombela, sikila bibaywa biabwe biaba bikali lukali, se banyala khukhwayila alala tawe.

⁷Mala bulomani bwabao akari we babaayi ba Aburamu ne babaayi ba Luti. (Mu ndaalo echo Bakanaani ne Baperisi nibo ba bamenyanga mu sibala esio.)

⁸Nio Aburamu aboolela Luti ali, “Bulomani bukhabaao akari wase ne nawe, namwe akari we babaayi befwe tawe, sikila efwe khuli balebe.

⁹Sibala sino sioosi se sili ebweeni wowo ta ku? Khwaukhane. Waaba nocha kumukhono kumukhasi, ese ndacha kumukhono kumuseecha, namwe waaba nocha kumukhono kumuseecha aba ese ndacha kumukhasi.”

¹⁰ Luti abona litooma lia Yoritani ali lili ne kameechi kamakali buli abuundu nga kumukuunda kwa Wele Omunyali Owa Bioosi, nga sibala sia Misiri, lubeka lwa Soari. (Akano kosi kekholekha Wele Omunyali Owa Bioosi ne akhonaka Sodomu ne Komora tawe.)

¹¹Nio Luti eroborera litooma lia Yoritani lioosi mala arekukha alola lubeka lwe bukwe. Khwako baukhana.

¹²Aburamu amenya mu sibala sia Kanaani ne Luti naye amenya mungoba che mu litooma, mala auuyisia liiema liewe aliyila siimbi Sodomu.

¹³Nono babaandu ba Sodomu baaba bamayaanu, lundi babooni lukali khu Wele Omunyali Owa Bioosi.

¹⁴Nga Luti aukhana ne Aburamu, Wele Omunyali Owa Bioosi aboolela Aburamu ali, “Suta chimoni khukhwama niio wimile, mala olole ebunaswa, siafubo, ebukwe ne mumbo,

¹⁵ sikila sibala sioosi nisio obona khakhue ewe ne lisaaye liowo khulwa mindali.

¹⁶Ndakhola lisaaye liowo libe likali nga kumuyekhe. Kaaba bali omundu anyala abala kumuyekhe, aba babaana bowo bosi balibalikha.

¹⁷Keenda mu sibala sino obone buleeyi ne bukhiikha bwasio sikila khakhuelesie ewe.”

¹⁸Nio Aburamu auuyisia liiema liewe acha amenya amikhoonge kia Mamure kiili Heburoni mala ebweeneyo ombakhayo alutare khu Wele Omunyali Owa Bioosi.