Read lubukusu Lir. 15 Bible Online

Lir. 15 - lubukusu bible

Lir. 15

¹Enyuma we kamakhuwa kano, elomo eya Wele Omunyali Owa Bioosi yecha khu Aburamu mu malola ne eloma eli, “Aburamu, okharia tawe, Ese ndi engabo yowo, ne kumuruuru kwowo kulaba kumukali.”

²Ne kakhali Aburamu aloma ali, “Ee, Omwami WELE, okhambe sina, ese se ndikho no mwana tawe, ne oliila khu miaandu kiase ali Elieseri owa Damasika?

³Se wayimba omwana tawe. Nasioobi owasaalwa munju mwase niye oliila khu miaandu kiase.”

⁴Nio elomo eya Wele Omunyali Owa Bioosi yecha khu Aburamu lundi eli, “Nasioobi yuno se aliila khu miaandu kiowo tawe, omwana wowo niye osaala niye oliila khu miaandu kiowo.”

⁵ Wele Omunyali Owa Bioosi amurusia enje mala aloma ali, “Lola khwikulu mala obale ching'enieesi, kaba bali onyala khuchibala. Lisaaye liowo lilaba lirio.”

⁶ Nio Aburamu asuubila Wele Omunyali Owa Bioosi mala Wele amubala ali, ali omuluungi.

⁷Mala Wele aloma ali, “Ese ndi Wele Omunyali Owa Bioosi owakhureera khukhwama mu sibala sia Uri sie Bakalitayo khu khua ewe sibala sino sibe sisiowo.”

⁸Nio Aburamu areeba ali, “Ee, Omwami WELE, manya ndiena ndi sibala sino silaba sisiase?”

⁹Amukobosia ali, “Nderere emasoti eyolile kimiiko kitaru, esubeeni eyolile kimiiko kitaru, limiiku liliolile kimiiko kitaru, ne liuusi ne libongo-bongo.”

¹⁰Mala amureerera bino bioosi, buli silala asikhalamo bitonyi bibili mala abianja lubeka ne lubeka ne khali chinyuni se achiikhalamo khabili tawe.

¹¹Nga chingosia checha khu nyama che mbosio echo, Aburamu achioona.

¹² Nga enyanga yaba ne elikho ekwa, liilo lisiro liaamba Aburamu, buuri bukali bwamuaamba mala enje yatimba timbo.

¹³ Mala Wele Omunyali Owa Bioosi aboolela Aburamu ali, “Manya mu bung'ali oli lisaaye liowo baliba baakwa mu sibala sikhali sisiabwe tawe, mala baliba nasioobi ebweeneyo. Baliipisibwa siibi khulwe kimiiko chimia chine,

¹⁴ ne kakhali ndireera sinyaasio khu sibala nisio balikholela nga banasioobi, mala enyuma wako baliruramo ne kimiaandu kimikali.

¹⁵Ne ewe wamwene okhafwe kamakora mala osiikhwe mu muleembe.

¹⁶Ne khu selukho ekhola khane, lisaaye liowo balikobola, sikila se kharusie mu sibala sino Baamori tawe khukhwola nga bumayaanu bwabwe bukhabe bukali nio libe mbo khukhwola mbaukuume.”

¹⁷Ne nga enyanga yakwa mala bwatiimba, kumulilo kwe liliisi kwaburukha, ne enjaso etirira biabiira akari we bitonyi bie embosio ebio.

¹⁸ Khu ndaalo eyo, Wele Omunyali Owa Bioosi akhola endakaano ne Aburamu ne aloma ali, “Ndaelesia lisaaye liowo sibala sino, khukhwama khu luuchi lwa Misiri khukhwola khu luuchi luboofu, Efurati,

¹⁹sibala sie Bakenayi, Bakeini, Bakatimoni,

²⁰Bahiti, Baperisi, Barefaimu

²¹Baamori, Bakanaani, Bakirikashi nende sie Bayebusi.”