Read lubukusu Lir. 17 Bible Online

Lir. 17 - lubukusu bible

Lir. 17

¹Aburamu ne ali kimiiko kamakhumi tisa na tisa, Wele Owe bunyali bwoosi amubonekhela, mala amuboolela ali, “Ese ndi Wele Owe Bunyali Bwoosi, keenda ebweeni wase mala okhabakho ne liibi liosi liosi likila wekiichibwa tawe.

²Ne ndakhola endakaano yase akari wowo ne nase, mala ndatasa lisaaye liowo.”

³Mala Aburamu akwa asi mafuumala mala Wele amuboolela ali,

⁴“Nakholile endakaano yino ne nawe, ne olaba paapa owe chikholo chingali.

⁵ Lisina liowo se lilaba lundi bali Aburamu tawe, ne kakhali lilaba Aburahamu, sikila nakhukholile paapa owe chikholo chingali.

⁶Ndakhola lisaaye liowo libe likali po, ndakhola bibala biame mwiwe, ne babaami balama mwiwe.

⁷ “Ndakhola endakaano yase akari wowo ne nase, ne lisaaye liowo enyuma wowo, mu selukho choosi chichiicha, ebe endakaano eya mindali, mbe Wele wowo lundi Wele we lisaaye liowo enyuma wowo.

⁸ Ne ndikhua sibala nisio olikho omenyamo nga omukwa, ne enyuma wowo ndiia lisaaye liowo sibala sioosi sia Kanaani, sibe sisiabwe mindali na mindali. Ndaba Wele wabwe.”

⁹Nio Wele aboolela Aburahamu ali, “Ne ewe olaliinda endakaano yase, ewe ne lisaaye liowo enyuma wowo, mu selukho chabwe choosi.

¹⁰ Yino niyo endakaano yase niyo olaliinda, akari wase ne nawe nende we lisaaye liowo enyuma wowo: Buli owe siseecha mwinywe akhakhebwe.

¹¹Mulakhebwa kamafuunga kenywe, mala silaba simanyisio sie endakaano akari wase ne nanywe.

¹²Mukhebe buli mwana owe sisoleeli owe chindaalo munaane mwinywe, mu selukho chenywe choosi. Akhaba nasioobi oosalwa mungo, namwe owakulwa ne chirupia, khukhwama khu mureende yesi yesi ookhali owe lisaaye lienywe tawe.

¹³Nasioobi owasaalwa munju yenywe namwe owakulwa ne chirupia chenywe alakhebwa. Nio endakaano yase elaba mwinywe khulwa mindali.

¹⁴Buli musiinde akharusibwe mu baandu bewe sikila aba afunaake endakaano yase.”

¹⁵“Ne khukhwama luno okhalaanga omukhasi wowo oli Sarai tawe ne kakhali lisina liewe lilaba bali Sara.

¹⁶Ndamubiita chikhabi, mala khutasa khwako, alakhusaalila omwana owe siseecha. Ndamubiita chikhabi mala abe maayi owe chikholo; ne babaami be babaandu baliama mu niye.”

¹⁷Nio Aburahamu akwa mafuumala mala achekha ne elomela ali, “Omundu owe kimiiko emia ndala anyala khusaala omwana ku? Sara anyala asaala omwana nga ali ari ne kimiiko kamakhumi tisa?”

¹⁸Aburahamu aboolela Wele ali, “Ishimaeli andi amenyile khulwe chikhabi chowo.”

¹⁹Nio Wele aboolela Aburahamu ali, “Tawe, ne kakhali Sara, omukhasi wowo, alakhusaalila omwana mala olimutiuukha oli Isaaka, ne ndiraao endakaano yase ne naye ne lisaaye liewe enyuma wewe.

²⁰Ne nauliile lilienya liowo khu Ishimaeli. Ndimubiita chikhabi ne khumukhola abe ne babaana bakali, ne lisaaye liewe lilikucha lukali. Aliba paapa owe babaana likhumi na babili be bubwami, mala ndimukhola abe ekholo emboofu.

²¹Ne kakhali endakaano yase ndikikhola ne Isaaka, niye Sara akhakhusaalile, mu sise sino kumwiiko kukwiicha.”

²²Ne nga amala khulomaloma naye, Wele arekukha aniina.

²³Mala Aburahamu abukula Ishimaeli, omwana wewe, ne nasioobi boosi babasaalwa munju yewe namwe nibo akula ne chirupia chewe, buli owe siseecha khu baandu be munju mwewe, abakheba endaalo eyo nga Wele aaba ne alomile.

²⁴Aburahamu akhebwa ne ali ne bukhulu bwe kimiiko kamakhumi tisa ne tisa.

²⁵Ne Ishimaeli akhebwa ne ali ne bukhulu bwe kimiiko ekhumi na kine.

²⁶Aburahamu no mwana wewe Ishimaeli, bakhebwa endaalo ng'eneyo,

²⁷ne babaandu be siseecha boosi be munju eya Aburahamu ne banasioobi babasaalwa munju mwewe ne naabo boosi babakulwa ne chirupia khukhwama khu mureende, bakhebwa alala ne Aburahamu.