Read lubukusu Lir. 2 Bible Online

Lir. 2 - lubukusu bible

Lir. 2

¹Nio likulu ne liloba ne bibiindu bilimo bioosi biawa khubaang'anwa.

² Ne khu ndaalo eya saba Wele amala kimilimo nikio aaba ne akholile mala aola khu ndaalo ng'ene eyo, khukhwama khu milimo kiewe kioosi nikio aaba ne akholile.

³Nio Wele abiita endaalo eya saba chikhabi mala akira alubeka nga endaalo emboofu sikila khu niyo Wele aola khukhwama khu milimo kiewe kioosi nikio aaba ne akholile[5] mu khubaang'ana ne khubuumba.

⁴Lino lili liliakukha lie likulu ne liloba ne bimaliilwe khubaang'anwa ne khubuumbwa. Mu ndaalo niyo Wele Omunyali Owa Bioosi [6] akholelamo liloba ne likulu,

⁵simelwa se siabao khu liloba tawe. Ne kimirongooro kie mundaa se kiaba kiamela tawe, sikila abeele Wele Omunyali Owa Bioosi akhakhola efula yakwa khu liloba tawe. Lundi omundu olima liloba se abao tawe,

⁶Ne kakhali kameechi kamaanga asi we liloba ne kasanya liloba.

⁷ Wele Omunyali Owa Bioosi abuumba omundu[7] owe siseecha khukhwama khu lipukhuulu lie liloba, amufua mu moolu kumuuya kwe bulamu mala omundu aba owe bulamu.

⁸Wele Omunyali Owa Bioosi ara kumukuunda mu Edeni e Bukwe, mala aramo omundu niye aba ne abuumbile.

⁹ Ne khukhwama mwiloba Wele Omunyali Owa Bioosi akhola buli murongooro kusiimisia chimoni, lundi kumulayi khu siakhulia, khuchoa. Ne akari we kumukuunda, kwabao kumurongooro kwe bulamu, ne lundi kumurongooro kwe bukesi bwe khumanya kamalayi ne kamamayaanu.[8]

¹⁰Luluuchi lwama mu Edeni lulwachukhilisianga kumukuunda, mala ebweeni wa Edeni, lwakabukhanamo lwabamo chinjichi chine.

¹¹Lwe khunyoa lwaba Pisioni, nilwo lubirira mu sibala sia Habila sioosi niio esahabu eli.

¹²(Ne esahabu eye sibala esio eli endayi. Kamabaale kalaangwa kali budeliumu ne kamafura kaunya kumuuya kumulayi kakalaangwa bali Onikisi kosi kaliyo.)

¹³Ne lisina lie luluuchi lwa khabili lili Kihoni. Nilwo lulwabotookha sibala sia Kushi[9] sioosi.

¹⁴Ne lisina lie luluuchi lwa khataru bali Tikiri. Nilwo lubirira e bukwe wa Ashuru. Ne luluuchi lwa khane luli Efurati.

¹⁵Wele Omunyali Owa Bioosi abukula omundu owe siseecha mala amura mu mukuunda kwa Edeni, alime ne khukuliinda.

¹⁶Nio Wele Omunyali Owa Bioosi alaka omundu ali, “Oli omulekhuule khulia bibiaamo bia buli murongooro kuuli mu mukuunda.

¹⁷Ne kakhali, bibiaamo bie kumurongooro kwe bukesi bwe khumanya kamalayi ne kamamayaanu[10] okhalia tawe, sikila mu ndaalo niyo oliliakho, olifwa.”

¹⁸Wele Omunyali Owa Bioosi aloma ali, “Se buli bulayi omundu owe siseecha khumenya yeng'ene tawe, ndamukholela omuyeeti omukhoyela niye.”

¹⁹Nio khukhwama khu liloba Wele Omunyali Owa Bioosi abuumba eyafuma esaang'i, ne esolo ne eyafuma enyuni mala abireera bioosi khu mundu abone nga ne abitiuukha kamasina. Ne buli lisina nilio omundu atiuukha sibuumbe, liakwa nilio lisina liasio.

²⁰Omundu atiuukha chisaang'i choosi, ne chinyuni ne chisolo choosi che mundaa. Ne kakhali se anyoolekha omuyeeti okhoyela niye tawe.

²¹Nio Wele Omunyali Owa Bioosi akhola liilo lisiro liaamba omundu owe siseecha oyo. Ne nga aba ne alikho akona Wele asasula lubafu lulala mala afunikhao enyama.

²²Ne lubafu nilwo Wele Omunyali Owa Bioosi aaba ne asasuule khukhwama khu mundu owe siseecha alukholamo omukhasi mala amureerera.

²³Mala omundu chana aloma ali, “Luno oyuno nono ali sikuumba sie mu bikuumba bie kumubili kwase, lundi enyama eye munyama che kumubili kwase, lisina liewe lilaba bali, ‘Omukhasi,’ sikila ama khu mundu owe siseecha.”[11]

²⁴ Khwako omundu owe siseecha akhalekhe raraawe ne maawe mala aambaane no mukhasi wewe, mala boombi babe mulala.

²⁵Omuseecha no mukhasi wewe baba sichula ne se baambwa chisoni tawe.