Read lubukusu Lir. 20 Bible Online

Lir. 20 - lubukusu bible

Lir. 20

¹Aburahamu auuya khukhwama Mamure acha lubeka lwe sibala sie siafubo owa Kanaani Nekebu mala amenya akari wa Kadeshi ne Suri, lundi auuyila mu Kerari.

² Mala Aburahamu aloma ali Sara omukhasi wewe, ali ali omukooko wewe. Nio Abimeleki omwami owe Kerari amurumania mala abukula Sara.

³Oli mu silo Wele abonekhela Abimeleki mu marooro amuboolela ali, “Ewe wafwiile wekhale busa sikila omukhasi oyo niye obukuule ali omukhasi owo mwene.”

⁴Abimeleki aaba asiili akheseenda niio Sara aaba tawe, nio aloma ali, “Wele Omunyali Owa Bioosi, ocha khwira babaandu bakhali ne bumayaanu tawe?

⁵Se ali Aburahamu omwene olomile ali, ‘Ali omukooko wase ta ku?’ Mala Sara omwene yesi aloma ali, ‘Ali wandaayase’ Mu bung'ali bwe kumwoyo kwase ne kamakhono kase kakhalimo kamakhiikha tawe, nakholile kano.”

⁶Nio Wele aboolela Abimeleki mu marooro ali, “Yee, manyile ndi okholile kano mu bung'ali bwe kumwoyo kwowo ne ese niye okhukhiingiliile khukhukholela ese bumayaanu, khwako se khulekhile wamutilakho tawe.

⁷Nono kobosia omukhasi yuno khu museecha wewe sikila ali omung'oosi, ne alakhusabila mala olaba omulamu. Ne waaba ne okhamukobosiayo tawe, manya busa oli olikho ocha khufwa, ewe ne babaandu bowo boosi.”

⁸Nio Abimeleki enyokha makhelebeende, mala alaanga bakholi bewe boosi mala ababoolela kamakhuwa kano koosi, nio baba ne buuri lukali.

⁹Abimeleki alaanga Aburahamu mala amureeba ali, “Okhukholeele siina sino? Ne nakhukholeele bubi siina bubwakilile wanderera ese ne khu bwami bwase kumusaango kumukali nga kuno kuri? Wakholeele ese bibiindu bikhenyekha biakholekha tawe.”

¹⁰Mala Abimeleki areeba Aburahamu ali, “Siina sisiakilile nokhola ori?”

¹¹Aburahamu akobosia ali, “Nakhola ndio, sikila nebaasia ndi, omundu owaria Wele ano se alikhoo tawe, mala balanjira bele khu mukhasi wase.

¹²Ne khutuba khwako ng'ali ali omukooko wase, omwana owa paapa niye, ne kakhali maayi babukhana, mala namureera ali omukhasi wase.

¹³Ne nga Wele ne akhola narura munju eya paapa naba omukwa mu sibala sikeni, naboolela Sara ndi, ‘Buno buli bulayi nibwo kenyikha uukholele. Buli abuundu niio khucha, loma oli ese ndi wandaayo.’ ”

¹⁴Nio Abimeleki abukula kamakheese ne chikhaafu ne banasioobi be siseecha nende be siikhasi abaelesia Aburahamu, mala amukobosela Sara omukhasi wewe.

¹⁵Abimeleki aloma ali, “Sibala siase sili ebweeni wowo, menya niio osiimile.”

¹⁶Khu Sara aloma ali, “Lola naeele wandaayo bitonyi eelefu ndala bie fwesa, bili simanyisio mumoni che babaandu baali ne nawe, buli mundu amanye ali se oli ne kumusaango tawe.”

¹⁷Nio Aburahamu asaba Wele mala Wele aonia Abimeleki akhaba ne omukhasi wewe ne banasioobi bewe be siikhasi nio banyale khusaala babaana.

¹⁸Wele Omunyali Owa Bioosi abeele aakumbaasiisie be nju eya Abimeleki sikila Sara mukha Aburahamu.