Read lubukusu Lir. 22 Bible Online

Lir. 22 - lubukusu bible

Lir. 22

¹ Enyuma we bibiindu bino Wele akela Aburahamu. Amulaanga ali, “Aburahamu!” Aburahamu afukiilila ali, “Ese niyooyu.”

² Wele aloma ali, “Bukula omwana wowo, omuteelwa Isaaka, niye wasiima, mala oche mu sibala sia Moria, khu sikulu nisio kane khwekesie, mala omuanileyo nga embosio khwise.”

³Nio Aburahamu enyokha makhelebeende, asaaka chiikhu che khukhwosia embosio mala achira khu mukoongo kwe epunda. Nio abukula bakholi bewe babili, no mwana wewe Isaaka, arekukha acha abuundu niio Wele aaba ne amubooleele.

⁴Khu ndaalo ekhola khataru, Aburahamu abona abuundu chana sinaaokho.

⁵Aboolela bakholi bewe ali, “Enywe rama ano ne punda. Ese no musoleeli yuno khulacha eyo khwisaaye Wele ne mala khukobole.”

⁶Aburahamu atiuukha Isaaka, omwana wewe, chiikhu che khukhwosia embosio ne niye omwene asuta kumulilo ne kumubano. Nio boombi bacha alala.

⁷Isaaka alaanga raraawe ali, “Paapa!” Afukiilila ali, “Siina mwana wase?” Isaaka areeba ali, “Lola khuli ne kumulilo ne chiikhu, ne limeeme lie khukhwosia embosio lili?”

⁸Aburahamu amuboolela ali, “Wele omwene kane erusilie limeeme lie embosio eye khukhwosia mwana wase.” Nio boombi bachiililila khukeenda alala.

⁹ Nga boola abuundu niio Wele aaba ne amubooleele, Aburahamu ombakhao alutare mala anjakho chiikhu chaloondekhana bulayi. Aboa Isaaka, omwana wewe, mala amwalisia khukhu.

¹⁰Nio Aburahamu abukula kumubano akhale omwana wewe enjasi.

¹¹Ne kakhali malaika owa Wele Omunyali Owa Bioosi alaanga Aburahamu khukhwama mwikulu ne aloma ali, “Aburahamu, Aburahamu!” Aburahamu akobosia ali, “Ese niyooyu.”

¹²Malaika aloma ali, “Okhayila kumukhono khu mwana namwe omukhole sisiindu siosi siosi tawe, sikila luno namanyile ndi ewe waria Wele, naboone se unyimile omwana wowo omuteelwa tawe.”

¹³Aburahamu ekhebukha enyuma mala abona limiiku liaambiilwe kimisaanga mu sichakha. Acha alibukula mala aliaana nga siaanwa sie mbosio sie khukhwosia mu bweyaangu bwa Isaaka omwana wewe.

¹⁴Nio Aburahamu atiuukha abuundu ao lisina ali, “Wele Omunyali Owa Bioosi Alaana.” Nga lilomwanga khukhwola endaalo eya luno lili, “Khu sikulu sia Wele Omunyali Owa Bioosi, siliaanwa.”

¹⁵Mala malaika owa Wele Omunyali Owa Bioosi alaanga Aburahamu lukhola khabili khukhwama mwikulu,

¹⁶ mala aloma ali, “Wele Omunyali Owa Bioosi aloma ali, ‘nechubile mu lisina liase nga okholile lino, ne se olobile khu khumbelesia omwana wowo omuteelwa tawe,

¹⁷ khwako nja khukhubiita chikhabi, lundi nja khukucha lisaaye liowo libe nga ching'enieesi lundi nga kumuyekhe. Ne lisaaye liowo likhaule basiku baalio.

¹⁸ Mala khubirira mu lisaaye liowo ndabiita bibala bie khu sibala sioosi chikhabi, sikila wariire kumumilo kwase.’ ”

¹⁹Aburahamu akobola niio bakholi bewe baaba mala barekukha alala bakobola e Beerisheba mala amenyayo.

²⁰Nio, enyuma wa kano, Aburahamu aboolelwa ali, “Milika yesi asaaliile, wandaayo, Naori babaana.

²¹Omubele bali Usi, okundi bali Busi, nende Kemueli raraawe owa Aramu,

²²Keseti, Haso, Pilitasi, Chitilafi ne Betueli.”

²³Betueli aaba raraawe owa Rabeka. Milika asaala babaana munaane bano khu Naori, wandaaye owa Aburahamu.

²⁴Ne lundi Reuma, omukhasi niye Naori aamenyia busa nga omusaale, asaala Teba, Kahamu, Tahasi ne Maaka.