Read lubukusu Lir. 23 Bible Online

Lir. 23 - lubukusu bible

Lir. 23

¹Sara amenya kimiiko emia ndala ne kamakhumi kabili na saba.

²Mala Sara afwila e Kiriati-Ariba (Olwo nilwo lukoba lwa Heburoni) mu sibala sia Kanaani, mala Aburahamu abeelela ne khumulila.

³Aburahamu enyokha alekha omufu wewe acha aboolela Bahiti ali,

⁴ “Ese ndi omureende omukwa mwinywe, mbe kamaloba mwinywe ke khusiikhamo, mala siikhe omufu wase.”

⁵Bahiti bakobosia Aburahamu bali,

⁶“Omwami, khuulile, ewe oli omundu omukali mwifwe. Siikha omufu wowo mu siliindwa silayi nisio olarobora mu biliindwa biefwe, se aliio khwifwe olakhwimana siliindwa siewe namwe olakhukhiingilila khusiikha omufu wowo tawe.”

⁷Aburahamu enyokha mala enama ebweeni we Bahiti, babaandu be mu sibala esio,

⁸mala ababoolela ali, “Mwaaba ne mufukiliile siikhe omufu wase ano, aba ndeebere Efuroni okhwa Soari,

⁹ambe libina lia Makipela, nilio ali nalio lili khundulo khwe kamaloba kewe. Ambe khu bukusi nibwo enya ngule mumoni chenywe libe nga nilio nyoolile lie khusiikhamo.”

¹⁰Ne Efuroni omwene aaba ekhaale mu Bahiti basie. Akobosia Aburahamu mala Bahiti boosi ba baaba mu muse kwe akookwa eye lukoba lwewe baulila.

¹¹Aloma ali “Omwami, se kali kario tawe, mbulile. Nakhuele kamaloba ne libina liilimo. Ndikho khuelesia mumoni che balebe base osiikhemo omufu wowo.”

¹²Nio Aburahamu enama ebweeni we Bahiti

¹³mala aboolela Efuroni, babaandu be sibala esio ne baulila, ali, “Ne kakhali, nosiima mbulile. Fukiilila kumuruungo kwase mala ngule kamaloba esiikhemo omufu wase.”

¹⁴Efuroni akobosia Aburahamu ali,

¹⁵“omwami wase mbulile, kamaloba kakulikha bitonyi bie fwesa chimia chine, bibienebio bili siina akari wase ne nawe? Nono siikha omufu wowo.”

¹⁶Aburahamu auliilisiana ne Efuroni, mala amukelela bitonyi bie efwesa chimia chine nga abele omwene ne ararirekho Bahiti ne bauliile, khuloondekhana ne bikelo bie baboofuli ba babao biise ebio.

¹⁷Nio kamaloba koosi kakaba ka Efuroni mu Makipela, kakaba ebukwe owa Mamure, kaba ka Aburahamu. Kamaloba kano kabamo libina ne kimirongooro.

¹⁸Kamaloba kamanyikha khuuba ka Aburahamu ebweeni we Bahiti boosi ba baaba mu muse.

¹⁹Nio Aburahamu asiikha Sara, omukhasi wewe, mu libina mu sibala sia Kanaani.

²⁰Bahiti baeelesia Aburahamu kamaloba ne libina kabe abuundu e khusiikha.