Read lubukusu Lir. 24 Bible Online

Lir. 24 - lubukusu bible

Lir. 24

¹Nono Aburahamu aaba akofuule lukali, ne Wele Omunyali Owa Bioosi aaba amubiita chikhabi mu biindu bioosi.

²Mala Aburahamu aboolela omukholi wewe, omukhulu khu bakholi be nju yewe, owemeelelanga buli siindu nisio aaba nasio, ali, “Ra kumukhono kwowo akari we kamaraango kaase.

³Yichuba mwisina lia Wele Omunyali Owa Bioosi, Wele we likulu ne liloba, oli se olibukulila omwana wase, omukhasi khukhwama mu bakhaana be Bakanaani nibo namenyamo bano tawe.

⁴Ne kakhali, olicha mu sibala siase, mu balebe base mala obukulileyo omwana wase Isaaka omukhasi.”

⁵Omukholi areeba Aburahamu ali, “Wakana omukhaana se anyala afukiilila khukhwicha ne nase mu sibala sino tawe. Aba nisieyo omusoleeli wowo mu sibala nisio waamamo?”

⁶Aburahamu amukobosia ali, “Okhakhola orio wakobosiayo omwana wase tawe!

⁷Wele Omunyali Owa Bioosi owe mwikulu, owandusia munju eya paapa wase, ne mu sibala siase nisio nasaalwamo, lundi owandomela ne echuba ali, ‘Ndiia lisaaye liowo sibala sino,’ alaruma malaika wewe ebweeni wowo, mala olabukulila omwana wase omukhasi khukhwama ebweeneyo.

⁸Ne omukhaana oyo aba nakhafukiilila khukhwicha ne nawe tawe, aba oli omulekhuule khukhwama mu liechuba liase. Ne kakhali okhesiayo omwana wase tawe.”

⁹Nio omukholi ara kumukhono kwewe akari we kamaraango ka Aburahamu, omwami wewe, mala amwichubila khuloondekhana ne likhuwa lino.

¹⁰Omukholi chana abukula chingamia ekhumi cho omwami wewe, biaanwa lukano na lukano nibio arobora khukhwama mu miaandu kio mwami wewe, mala enyokha, arekukha acha mu sibala sia Mesopotamia mu lukoba lwa Naori.

¹¹Nga ola, asikamia chingamia enje we lukoba, a sebele mu siise sie ekolooba, nisio bakhasi bachilangamo khutaa kameechi.

¹²Asaba ali, “Ee, Wele Omunyali Owa Bioosi, Wele owo mwami wase Aburahamu, khusaba umbe bukhili luno, mala wekesie busiime bwowo buchiililila khu mwami wase Aburahamu.

¹³Lola, nemile a sebele, ne bakhaana be babaandu be mu lukoba balikho barura becha khutaa kameechi.

¹⁴Lekha omukhaana niye kane ndome ndi, ‘Nosiima ruura enyuungu mala umbe kameechi nywe,’ ne okane angobosie ali, ‘Khonywe, ne ese ndanyweesia aakhaba ne chingamia chowo,’ abe niye ewe oroboreere Isaaka omukholi wowo. Khulwa kano ndamanya ndi ewe wekeesie busiime bwowo bukhawa tawe khu mwami wase.”

¹⁵Oli asisaba, Rabeka, omukhaana owa Betueli, omwana owa Milika ne Naori, wandaaye owa Aburahamu, echa asutile esoongo yewe khwibeka.

¹⁶Aaba omukhaana owe lukoondo lulayi lundi owe yabwana, okhakonakho no museecha tawe. Ekha mu sebele echusia esoongo mala aniina.

¹⁷Omukholi oyo atima acha amwakaanila, mala amuboolela ali, “Nosiima, mbeekho kameechi matiiti kari khukhwama mu soongo mwowo nywe.”

¹⁸Omukhaana amukobosia ali, “omwami khonywe.” Mala omukhaana aruura esoongo khangu khukhwama khwibeka khwewe akitililila mala amunywesia.

¹⁹Oli amunywesia amala amuboolela ali, “Ndatayila aakhaba chingamia chowo chosi, nabwila nga choosi ne chimala khunywa.”

²⁰Nio omukhaana oyo achukha khangu kameechi ke mu soongo mwewe khu lwelo nilwo bibiaayo binywelangakho mala atima mu sebele asombelela kameechi kamakali khukhwola nga chingamia chanywa choosi.

²¹Omukholi owa Aburahamu oyo amulolelela ne asilile busa, mu khweyika amanye Wele Omunyali Owa Bioosi ne akholile lukeendo lwewe khuba ne bukhili namwe tawe.

²²Oli chingamia chamala khunywa, omundu oyo abukula embete eye sahabu eye bukusi bukali ne chipangili chimboofu chibili che sahabu achira khu makhono ko mukhaana.

²³Mala amureeba ali, “Mboolele ewe oli omukhaana owa naanu. Bubweyaangu bulikho munju mwa paapa wowo niio efwe khunyala khwakona?”

²⁴Omukhaana amukobosia ali, “Ese ndi omukhaana owa Betueli, omusoleeli owa Milika, niye Milika asaalila Naori.”

²⁵Atasakho ali, “Ewefwe khuli ne chikhanja ne biakhulia bikali bie bibiaayo ne lusiro nilwo bakeni banyala bakonamo.”

²⁶Omukholi oyo asikama asi mala esaaya Wele Omunyali Owa Bioosi,

²⁷Aloma ali, “Afume Wele Omunyali Owa Bioosi, Wele owo Mwami wase Aburahamu. Wele okhalekhile busiime bwewe buchiililila lundi bubweikinwa khu mwami wase tawe. Wele Omunyali Owa Bioosi andangiriire khukhwola khunju eye balebe bo mwami wase.”

²⁸Nio Omukhaana atima acha aboolela be munju eya maayi wewe bibiindu bino bioosi.

²⁹Rabeka aaba ne wandaaye niye batiuukha bali Labani, Labani arura atima acha niio omundu oyo aaba, a sebele.

³⁰Labani aboona embete ne chipangili khu makhono ko mukooko wewe lundi aulila kamakhuwa niko omundu chana aboolela Rabeka. Acha niio omukholi owa Aburahamu aaba ne emile siimbi ne chingamia a sebele.

³¹Amuboolela ali, “yiicha, mungo, omubiite owa Wele Omunyali Owa Bioosi, siina sikila ne wima enje? Nakhung'ooneele lusiro ne abuundu e chingamia.”

³²Omundu oyo engila munju. Labani akangulula bibiaba khu ngamia mala achielesia chikhanja ne biakhulia bie bibiaayo, lundi aelesia omundu oyo ne babaandu nibo aba nabo kameechi basaabe bikele.

³³Nga siakhulia ne siareerwa ebweeni wewe aloma ali, “Se ndalia nekhaboola sisindeerire tawe.” Labani amuboolela ali, “Loma.”

³⁴Aloma ali, “Ese ndi omukholi owa Aburahamu.

³⁵Wele Omunyali Owa Bioosi abiita omwami wase chikhabi chingali, mala abeele omukali lukali, amua kamatuuli ne kiminyele, efwesa ne esahabu, banasioobi be siseecha nende be siikhasi, chingamia ne chipunda.

³⁶Ne Sara, mukho omwami wase, aamusaalila omwana mu buloosi bwewe. Ne omwami wase aelesia omusoleeli oyo buli siindu nisio ali nasio.

³⁷Omwami wase anjechubia ne aloma ali, ‘Yichuba oli se olibukulila omwana wase omukhasi khukhwama mu bakhaana be Bakanaani nibo namenyamo tawe.

³⁸Ne kakhali olicha munju eya paapa, mu balebe base, mala obukulileyo omwana wase omukhasi.’

³⁹Nakobosia omwami wase ndi, ‘Wakana omukhaana se akhafukiilile khukhwicha nase tawe!’

⁴⁰Omwami angobosia ali, ‘Wele Omunyali Owa Bioosi niye naria, akharume malaika wewe ache ne nawe mala akhole lukeendo lwowo lube ne bukhili, mala olibukulila omwana wase omukhasi khukhwama mu balebe base lundi munju eya paapa.

⁴¹Ne olaba omulekhuule khukhwama mu khwichubia khwase, waaba ne woola khu balebe base mala baloba khukhua omukhaana.’

⁴²“Nga ne nolile asebele luno, sabile ndi, ‘Ee, Wele Omunyali Owa Bioosi, Wele owo mwami wase Aburahamu, mbe bukhili mu niko endikho ekhola.

⁴³Lola nemile asebele, ne omukhaana olarura eche khutaa kameechi ndamusaba ambeekho kameechi ke khunywa.

⁴⁴Ne olamba lundi anywesie chingamia chase choosi lekha abe omukhasi niye Wele Omunyali Owa Bioosi aroboreere omwana owo mwami wase.’

⁴⁵Ne khamala lisaba liase mu mwoyo tawe, Rabeka echa ne soongo yewe khu mabeka, mala ekha mu sebele ataa kameechi. Namusaba ndi, ‘Nosiima mbeekho kameechi nywe.’

⁴⁶Aruura esoongo khangu khukhwama khwibeka mala aloma ali, ‘Khonywe, mala nase ndanyweesia aakhaba ne chingamia chowo choosi.’ Nio ese nanywa mala aanyweesia ne chingamia choosi.

⁴⁷Nio namureeba ndi, ‘Ewe omukhaana owa naanu?’ Aloma ali, ‘Ese omukhaana owa Betueli, omwana owa Milika ne Naori.’ Nio namura embete khu lioolu ne chipangili khu makhono kewe.

⁴⁸Mala nasikama asi, nesaaya Wele Omunyali Owa Bioosi. Nafumia Wele Omunyali Owa Bioosi owo Mwami wase Aburahamu, oundangiriire mbukule omukhaana owe balebe bo mwami wase, abe omukhasi owo mwana wewe.

⁴⁹Nono luno, mwaba ne mulakholela omwami wase bubweikinwa ne bung'ali, mumboolele, ne kakhali kario tawe, mboolele, nio manye nilio nyala nakhola.”

⁵⁰Nio Labani ne Betueli bakobosia bali, “Likhuwa lino liamile khu Wele Omunyali Owa Bioosi, se khunyala khwalomaloma khwiwe liosi liosi tawe.

⁵¹Rabeka ali ebweeni wowo, mubukule oche, mala abe omukhasi owo mwana owo mwami wowo, nga Wele Omunyali Owa Bioosi omwene ne alomile.”

⁵²Nga omukholi owa Aburahamu ne aulila niko baloma enama asi ebweeni wa Wele Omunyali Owa Bioosi.

⁵³Arusia bibiindu bie efwesa, esahabu ne chingubo mala abiia Rabeka. Lundi aelesia wandaaye owa Rabeka ne maawe, bibiindu bie bukusi bukali.

⁵⁴Nio niye ne babaandu nibo aaba nabo balia ne khunywa mala bakonayo siilo esio. Nga bwasia benyokha, omukholi aloma ali, “Ndekhuule ngobole wo mwami wase.”

⁵⁵Mala wandaaye owa Rabeka ne maawe baloma bali, “Lekha omukhaana amenyekho nafwe khu siise, chindaalo ekhumi, nechiwele anyala arekukha.”

⁵⁶Omukholi abakobosia ali, “Mukhanjikhasia tawe, Wele Omunyali Owa Bioosi akholile lukeendo lwase lwabeele ne bukhili. Khemundekhuule ngobole wo mwami wase.”

⁵⁷Bakobosia bali, “Lekha khulaange omukhaana omwene mala khumureebe.”

⁵⁸Balaanga Rabeka mala bamureeba bali, “Wenya oche ne omundu yuno?” Abakobosia ali, “Yee, ndacha ne naye.”

⁵⁹Nio balekhuula Rabeka ne omukeesia wewe, ne omukholi owa Aburahamu ne babaandu bewe.

⁶⁰Mala babiita Rabeka chikhabi ne baloma bali, “Mukooko wefwe, obe maayi owe chielefu, owe chielefu kamakhumi. Lisaaye liowo liule chingoba che basiku balio!”

⁶¹Nio Rabeka ne bakholi bewe benyokha mala baniina khu ngamia, bacha ne omukholi owa Aburahamu.

⁶²Isaaka aaba echile mu sichiimi sisialaangwa Beeri-lahai-roi mala amenyanga siafubo owa Kanaani.

⁶³Nono Isaaka arura acha mu lukoongo ekolooba, khukhwibaasia kakeewe. Alola, mala abona chingamia chilikho chiicha.

⁶⁴Rabeka nga abona Isaaka, ekha arura khu ngamia,

⁶⁵mala areeba omukholi owa Aburahamu ali, “Naanu olikho okeenda mu lukoongo ne eecha oyo?” Omukholi amukobosia ali, “Omwami wase niye.” Nio Rabeka abukula eneti mala efuuma mumoni.

⁶⁶Nio omukholi oyo aboolela Isaaka bibiindu bioosi nibio aaba ne akholile.

⁶⁷Nio, Isaaka engisia Rabeka mu liiema nimwo Sara, maayi wewe amenyanga, amubukula aaba omukhasi wewe mala amusiima. Nio Isaaka aolelesibwa enyuma we lifwa lia maawe.