Read lubukusu Lir. 25 Bible Online

Lir. 25 - lubukusu bible

Lir. 25

¹Aburahamu areera omukhasi okundi lisina liewe bali Ketura.

²Amusaalila Simurani, Yokisiani, Metani, Midiani, Isibaki ne Siua.

³Yokisiani aaba raraawe owa Sheba ne Dedani. Babaana ba Dedani baaba Asiurimu, Letusimu ne Leumimu.

⁴Ba okhwa Midiani baaba Efa, Eferi, Hanoki, Abida, ne Elida. Bano boosi baaba babaana ba Ketura.

⁵Aburahamu aelesia Isaaka bioosi nibio aaba nabio.

⁶Ne babaana be bakhasi bewe babaandi nibo aamenyia busa nga basaale, abaelesia biianwa, mala ne asiili omulamu abarusia niio omwana wewe Isaaka aaba bache mu sibala sie bukwe.

⁷Chino nicho chindaalo che kimiiko kie bukhulu bwa Aburahamu, emia ndala kamakhumi saba ne kiraano.

⁸Aburahamu akwiisia kumwoyo, mala afwa bulayi ne akofuule. Afwa acha khu baandu bewe.

⁹Basoleeli bewe, Isaaka ne Ishimaeli bamusiikha mu libina lia Makipela ebukwe we Mamure, mu maloba ka Efuroni okhwa Soari Omuhiti.

¹⁰ Ako niko ka kaaba kamaloba niko Aburahamu akula khukhwama khu Bahiti. Aburahamu no mukhasi wewe Sara basiikhwa abwenao.

¹¹Enyuma we lifwa lia Aburahamu, Wele aelesia chikhabi Isaaka omwana wewe. Mala Isaaka amenya e Beeri-lahai-roi.

¹²Lino nilio lisaaye lia Ishimaeli okhwa Aburahamu, niye Hakari omukhaana Mumisiri, nasioobi owa Sara, asaala khu Aburahamu,

¹³khuloondekhana ne lisaalwa liabwe: Naboati, omubele owa Ishimaeli, Kedari, Atibeeli, Mibusamu,

¹⁴Mishima, Tuma, Masa,

¹⁵Hatati, Tema, Yeturi, Nafisi ne Ketema.

¹⁶Abo nibo ba okhwa Ishimaeli, ne ako niko kamasina kaabwe khuloondekhana ne birekere ne abuundu niio bamenyanga. Babaana ekhumi na babili be bubwami khuloondekhana ne chikholo chabwe.

¹⁷Kino nikio kimiiko kie bulamu bwa Ishimaeli, kimiiko emia ndala, ne kamakhumi kataru ne saba mala akwiisia kumwoyo, afwa mala acha khu baandu bewe.

¹⁸Lisaaye lia Ishimaeli liamenya mu sibala siili akari owa Habila ne Suri, sibala sisialolelelalana ne Misiri lubeka lwe Ashuru. Baba be busiku bukali khu bawandaaye.

¹⁹Lino lili lisaaye lia Isaaka okhwa Aburahamu: Aburahamu aaba raraawe owa Isaaka.

²⁰Isaaka ne ali bukhulu bwe kimiiko kamakhumi kane, areera Rabeka nga omukhasi wewe, omukhaana owa Betueli Omusiami owe Padani-aramu, omukooko owa Labani Omusiami.

²¹Ne Isaaka asaabila omukhasi wewe khu Wele Omunyali Owa Bioosi sikila aaba omukuumba. Wele Omunyali Owa Bioosi aulila lisaba liewe mala Rabeka omukhasi wewe aesia.

²²Babaana barekanila munda mwewe. Rabeka aloma ali, “Siina sikila ne menya?” Nio acha areeba Wele Omunyali Owa Bioosi.

²³ Wele Omunyali Owa Bioosi amuboolela ali, “Bibala bibili bili munda mwowo, okhasaale babaandu babili mala bakhabiilane, mulala akhabe owe kamaani khukhilakho okundi, omukhulu akhakholele omukeekhe.”

²⁴Nga siise sie khusaala siola, asaala bukhwana.

²⁵Mukhwana asaalwa omubesemu pe. Aaba ne kamaswa kumubili kwosi nga engubo eye bufuumbo, khwako, bamutiuukha bali Esau.

²⁶Enyuma wewe, Mulongo asaalwa ne atiilile ekhukunyu eya Esau nio lisina liewe liaba Yakobo. Nga Rabeka ne abasaala, Isaaka aaba ne bukhulu bwe kimiiko kamakhumi sita.

²⁷Nga basoleeli bano bachoa, Esau aaba omuaayi owamanya lukali buaayi, omundu owasiima limenya lienje, ne Yakobo aaba omundu owasila mala ekhalanga mungo.

²⁸Isaaka asiima Esau, sikila alichanga chinyama che mu buaayi bwewe, ne Rabeka asiima Yakobo.

²⁹Endaalo ndala Yakobo aba afuluke sifuluko sie kamakaanda, Esau aloota khukhwama mu lukoongo, mala enjala yaba yamukhayile.

³⁰Esau asaba Yakobo ali, “Nosiima lekha ekhombekho sifuluko sibesemu sino sikila enjala yakhayile lukali!” (Khwako bamutiuukha lisina bali Edomu.)

³¹Yakobo amukobosia ali, “Nyoa ungusie kumukabwa kwe bubele bwowo nio.”

³²Esau aloma ali, “Ese ndi siimbi khufwa, kumukabwa kwe khuba omubele kuli na bukhala siina khwise?”

³³ Yakobo amukobosia ali, “njichubile nio.” Esau amwichubila mala akusia kumukabwa kwe khuba omubele khu Yakobo.

³⁴Yakobo amua kumukaati ne sifuluko sibesemu alia, mala enyokha arekukha. Esau alekelesia ario kumukabwa kwewe kwe khuba omubele.