Read lubukusu Lir. 26 Bible Online

Lir. 26 - lubukusu bible

Lir. 26

¹Enjala ekiindi yabao mu sibala nga eyabao mu ndaalo cha Aburahamu. Isaaka acha e Kerari owa Abimeleki, omwami owe Bafilisiti.

²Wele Omunyali Owa Bioosi amubonekhela mala amuboolela ali, “Okhekha wacha e Misiri tawe, menya mu sibala nisio kane khuboolele.

³ Menya mu sibala sino, ne ndaba ne nawe mala ndakhubiita chikhabi. Ndakhuelesia ewe ne lisaaye liowo kamaloba kano koosi. Ndakhola nga nechubila Aburahamu, paapa wowo.

⁴Ndakucha lisaaye liowo libe likali nga ching'enieesi mala ndilielesia kamaloba kano koosi. Ne khubirira mu lisaaye liowo bibala bioosi bie khu sibala bilibiitwa chikhabi.

⁵Ndakhuelesia chikhabi sikila Aburahamu aria kumumilo kwase ne kamalaka kase.”

⁶Nio Isaaka amenya e Kerari.

⁷ Nga babaandu be abuundu ao bamureeba ko mukhasi wewe, abakobosia ali, “Yuno ali omukooko wase,” sikila aria khuloma ali, “Yuno ali omukhasi wase.” Ebaasia ali, “Babaandu be abuundu ano bakhola bario banjira sikila Rabeka,” Rabeka aaba omukhasi owe lukoondo lulayi.

⁸Nga Isaaka amenya siise sileeyi, Abimeleki omwami owe Bafilisiti alolela mu numa mala abona Isaaka enyaa ne atiila tiila Rabeka, omukhasi wewe.

⁹Abimeleki alaanga Isaaka mala amureeba ali, “Yuno ali omukhasi wowo, sina sikila ne oloma oli, ‘Ali omukooko wase?’ ” Isaaka amukobosia ali, “Sikila nebaasia ndi bakhola bario banjira.”

¹⁰Abimeleki amureeba ali, “Sina nisio okhukholeele sino? Mulala khu baandu base wakana andi akonile no mukhasi wowo, mala andi akhurereere efwe kumusaango.”

¹¹Nio Abimeleki akaambila babaandu bewe boosi ne aloma ali, “Omundu yesi yesi otiila khu mundu yuno namwe khu mukhasi wewe, aleerwa.”

¹²Isaaka amiicha mu sibala esio biakhulia, mala kumwiiko okwo akesa khukhwola emia khukhila nga amiicha. Wele Omunyali Owa Bioosi amubiita chikhabi,

¹³Mala Isaaka aba omuiinda. Achiililila khunyoola kimiaandu khukhwola nga aba omuiinda lukali.

¹⁴Aba ne kiminyele ne kamatuuli kamakali, lundi aba ne banasioobi bakali, mala liakila Bafilisiti bamukhendekhela.

¹⁵(Nono Bafilisiti baba bechusie ne liloba ne khukhwililisia chisebele choosi nicho bakholi ba raraawe bayaba mundaalo cha Aburahamu, ne asiili omulamu.)

¹⁶Abimeleki aboolela Isaaka ali, “Rekukha okhururemo, sikila ewe oli omukali lukali khukhukhila efwe.”

¹⁷Nio Isaaka arekukha arura ebweeneyo acha mu Litooma lia Kerari mala amenyayo.

¹⁸Isaaka akoota lundi chisebele chichaba ne chayabwa mu ndaalo cha raraawe Aburahamu, sikila Bafilisiti baba bachililisia enyuma we lifwa lia Aburahamu, mala achitiuukha kamasina niko yaba raraawe achitiuukha.

¹⁹Bakholi ba Isaaka bayaba mu Litooma banyoola emoni eye kameechi.

²⁰Babaayi ba Kerari balomana ne babaayi ba Isaaka ne baloma bali, “Kameechi kano kali kakeefwe.” Nio Isaaka atiuukha esebele lisina ali, “Eseki” sikila baingana ne naye.

²¹Bayaba esebele ekiindi lundi balomana khu ng'eneyo yosi. Mala akitiuukha lisina ali, “Sitina.”

²²Arura abwenao mala ayaba esebele ekiindi. Khwiyo se balomanilakho tawe, nio akitiuukha lisina ali, “Reoboti.” Aloma ali, “Sikila luno Wele Omunyali Owa Bioosi akhukholeele bubweyaangu mala khulakucha mu sibala sino.”

²³Khukhwama abwenao Isaaka acha e Beerisheba.

²⁴Wele Omunyali Owa Bioosi amubonekhela siilo esio amuboolela ali, “Ese ndi Wele owa Aburahamu paapa wowo. Okharia tawe, sikila Ese ndi ne nawe mala ndakhubiita chikhabi, ne khukucha lisaaye liowo sikila omukholi wase Aburahamu.”

²⁵Nio Isaaka ombakha alutare abwenao mala esaaya Wele Omunyali Owa Bioosi. Asimikhao liiema liewe. Ne abwenao bakholi ba Isaaka bayabao esebele.

²⁶ Abimeleki ne Ausati omukeleki wewe, ne Fikoli komanda owe banamae bewe baama e Kerari bacha khu Isaaka.

²⁷Isaaka abareeba ali, “Enywe mwambiyila, mwamboona mururemo, ne luno mwichile khukhumbona sikila siina?”

²⁸Bamukobosia bali, “Khwaboone abuwaanga khuli Wele Omunyali Owa Bioosi ali ne nawe, khwako khuloma khuli, khukhole endakaano ne nawe.

²⁹Khwenya khuli se olakhukholela efwe kamabi tawe, mungila ng'ene nga efwe fwesi ne khukhakhutilakho tawe ne se khwakhukholakho siindu sibi tawe, ne kakhali kamalayi kong'ene, mala khwakhuoona mu muleembe. Ewe luno oli omubiite chikhabi owa Wele Omunyali Owa Bioosi.”

³⁰Nio Isaaka abakholela naikara, balia mala banywa.

³¹Oli makhelebeende benyokha bechubanila, mala Isaaka abaroongia barekukha mu muleembe.

³²Khu ndaalo eyo ne ng'ene bakholi ba Isaaka becha bamuboolela ke esebele niyo baaba ne bayabile bali, “Khwanyoolile kameechi.”

³³Atiuukha esebele ali Shiba, khwako lisina lie lukoba lili Beerisheba khukhwola endaalo yino.

³⁴Oli Esau ali bukhulu bwe kimiiko kamakhumi kane areera bakhasi babili, Yutiisi omukhaana owa Beeri Omuhiti, ne Basemati omukhaana owa Eloni, Omuhiti.

³⁵Bakhasi abo bakhola limenya lia Isaaka ne Rabeka liaba lie bubeeleli bukali.