Read lubukusu Lir. 27 Bible Online

Lir. 27 - lubukusu bible

Lir. 27

¹Nga Isaaka akofula, aabofula chimoni. Nio alaanga Esau, omwana wewe omubele, mala aloma ali, “Mwana wase!” Esau afukiilila ali, “Paapa.”

²Amuboolela ali, “Ese nakofuule, se manya endaalo eye lifwa liase tawe.

³Nono banula bulwaani bwowo, situukhu sie buembo ne buyiingo oche mu lukoongo oaaye esaang'i wire,

⁴mala wiche undeekhele siakhulia silayi nisio nasiima undeerere ndie nio khubiite chikhabi ne ekhafwa tawe.”

⁵Nga Isaaka ne aboolelanga Esau, Rabeka aaba arekeeresie. Nio oli Esau arekukha acha mu lukoongo khuaaya chisaang'i,

⁶Rabeka aboolela Yakobo ali, “Nama khuulila raraao aboolela wandaayo Esau ali,

⁷‘Cha oaye esaang'i mala undeekhele siakhulia nisio nasiima, ndie, khubiite chikhabi mumoni cha Wele Omunyali Owa Bioosi ne ekhafwa tawe.’

⁸Nono khwako, mwana wase, ndekeeresie mala okhole nga khulaka.

⁹Cha mu munyele mala undeerere chimbusi chimeeme chibili ndekhele raraao siakhulia silayi nisio asiima.

¹⁰Mala omuyilile alie, nio akhubiite chikhabi ne akhafwa tawe.”

¹¹Ne kakhali Yakobo aboolela maawe ali, “Wandaayase Esau ali omundu owe kamaswa ne ese ndi omumiuufu.

¹²Wakana paapa akhola ario ambabaasia mala nabonekhana omubeeyi, mala nireerere silaamo, chilekhe khuba chikhabi tawe.”

¹³Maawe amuboolela ali, “Mwana wase silaamo siowo sibe khwise, ne kakhali nenya orie likhuwa liase mala oche undeerere chimeeme.”

¹⁴Nio acha achireerera maawe mala ang'oona siakhulia silayi nisio raraawe asiima.

¹⁵Rabeka abukula chingubo cha Esau chindayi nicho aaba nacho munju mwewe mala achifwara Yakobo, omwana wewe omukeekhe.

¹⁶Nio amufuuma bisieelo bie chimeeme khu makhono ne mwikosi mwewe.

¹⁷Arusia siakhulia silayi ne kumukaati nikwo aaba ne ang'oonile mala aelesia omwana wewe Yakobo.

¹⁸Nio Yakobo acha munju nimwo raraawe aaba mala alaanga ali, “Paapa!” Akobosia ali, “Ee, ewe naanu mwana wase?”

¹⁹Yakobo akobosia raraawe ali, “Ese ndi Esau omwana wowo omubele. Nakholile nga umbooleele. Nosiima yinyokha wikhale, olie enyama eye esaang'i niyo embaayile mala umbiite chikhabi.”

²⁰Ne kakhali Isaaka amureeba ali, “Mwana wase, okinyoolile khangu oriena?” Amukobosia ali, “Sikila Wele Omunyali Owa Bioosi Wele wowo ambelesie bukhili.”

²¹Isaaka aloma Yakobo ali, “yiicha siimbi ano, khuabaasie, manye ng'ali ne oli omwana wase Esau namwe tawe.”

²²Yakobo eseenda siimbi niio Isaaka raraawe aaba, amuabaasia mala aloma ali, “Kumumilo kuli kwa Yakobo ne kamakhono kali ka Esau.”

²³Mala khumumanyilisia tawe, sikila kamakhono kewe kaba ne kamaswa nga ka wandaaye Esau, nio amubiita chikhabi.

²⁴Amureeba ali, “Ng'ali ewe oli omwana wase Esau?” Amukobosia ali, “Ee, ese niye.”

²⁵Nio Isaaka amuboolela ali, “Ndeerere, ndie enyama niyo omwana wase aayile mala mubiite chikhabi.” Yakobo amureerera siakhulia mala alia, lundi amureerera endali anywa.

²⁶Nio raraawe amuboolela ali, “Mwana wase khowiche siimbi unjikwayile.”

²⁷ Echa siimbi amukwayila. Isaaka aunyila kumuuya kwe chingubo chewe mala amubiita chikhabi ne aloma ali, “Lola, khuunya khwo mwana wase, khuli busa nga khuunya khwe kumukuunda, nikwo Wele Omunyali Owa Bioosi abiitile!

²⁸Wele akhoya akhua luume lwe mwikulu, ne engakha eye khu liloba, ne bikeswa bikali ne endali.

²⁹ Lekha babaandu bakhukholele, ne bibala bikhwinamile. Ba omwami khu bawandaayo, ne babaana ba maao bakhwinamile. Alaamwe yesi yesi okhulaama, ne abiitwe chikhabi buli mundu okhubiita chikhabi!”

³⁰Oli Isaaka amalile khubiita Yakobo, nga Yakobo arura busa ari ebweeni wa Isaaka raraawe, Esau aulukha khukhwama mu khuaya khwewe.

³¹Yesi ateekha siakhulia silayi mala asireerera raraawe. Aboolela raraawe ali, “Nosiima paapa yinyokha olie khu nyama niyo omwana wowo aayile mala umbiite chikhabi.”

³²Isaaka raraawe amureeba ali, “Ewe naanu?” Amukobosia ali, “Ese Esau omwana wowo omubele.”

³³Isaaka areenga lukali mala areeba ali, “Ne, naanu oayile esaang'i mala andeerera nalia ne okhecha ta mala namubiitile chikhabi? Ne alarama owe chikhabi.”

³⁴Nga Esau aulila kamakhuwa ka raraawe, alila lukali ne burafu ne aloma ali, “Paapa nosiima, mbiite aakhaba sesi!”

³⁵Isaaka aamuboolela ali, “Wandaayo echile aambea mala aabukuule ekhabi yowo.”

³⁶ Esau aaloma ali, “Se bamutiuukha bali Yakobo mu bung'ali! Luno lukhola khabili ne eyisia mu bweyaangu bwase. Aabukula kumukabwa kwase kwe khuuba omwana omubele ne luno ambukuule chikhabi chase.” Aareeba raraawe ali, “Se undekheelekho ese ekhabi tawe?”

³⁷Isaaka aakobosia Esau ali, “Namukholile abe omwami khwiwe, lundi namuele bawandaaye bewe boosi babe bakholi bewe. Namuele bikeswa ne ndali. Nono ewe mwana wase khukholela siina?”

³⁸ Esau ekoonjelela raraawe ali, “Ewe se oli ne ekhabi yakhaba ndala yong'ene tawe paapa? Paapa, aakhaba sesi mbiite.” Mala Esau aalila.

³⁹ Nio Isaaka aamukobosia ali, “Olamenya mu sibala siikhali sie ngakha tawe se olanyoola luume lulwama mwikulu tawe.

⁴⁰ Olamenya sikila embalu yowo, ne olikholela wandaayo, ne kakhali ne olimwaukhakho, olifunaka lichooki liewe khukhwama khwikosi khwowo.”

⁴¹Esau abiyila Yakobo sikila chikhabi nicho raraawe aaba ne abiitile Yakobo, mala Esau elomela ali, “Chindaalo che khulila paapa chilikho chimbiia mala khere Yakobo.”

⁴²Ne kakhali Rabeka aulila kamakhuwa ka Esau, omwana wewe omukhulu. Arumania alaanga Yakobo, omwana wewe omuro, mala amuboolela ali, “Wandaayo Esau alikho eoleelesia ne lilibaasia lie khukhwiira ewe.

⁴³Nono khwako, mwana wase, mbulile, yinyokha, wilukhile wa wandaayase Labani mu Harani.

⁴⁴Omenye naye khulwe siise khukhwola nga burafu ne

⁴⁵lirima lia wandaayo ne biliwa, mala ebilile niko wamukholeele. Nio ekharume omundu akhukobosie. Siina sikila efwiisie enywe mwembi endaalo ndala?”

⁴⁶Nono Rabeka aboolela Isaaka ali, “Naluiiliile ne limenya liase sikila bakhaana Bahiti ba mukha Esau. Kaaba bali Yakobo yesi acha khureera mulala khu bakhaana Bahiti, aba limenya liase lili na bulayi siina?”