Read lubukusu Lir. 29 Bible Online

Lir. 29 - lubukusu bible

Lir. 29

¹Yakobo achiililila ne lukeendo lwewe, mala ola mu sibala sie babaandu be bukwe.

²Nga alola, abona esebele mu lukoongo olwo, mala kiminyele kitaru kie kamakheese kiaba kiakonile andulo wayo. Kiminyele ekio kianywechanga mu sebele yino. Libaale libalaayi liaba emunwa we sebele.

³Yabechanga oli kiminyele kioosi kiechile alala, ne babaayi bapiringisia libaale lirura emunwa we sebele, banyweesia kamakheese, oli bamala ne bakobosia libaale emunwa we sebele.

⁴Yakobo areeba babaayi ali, “Bawandaayase, enywe mwama waena?”

⁵Bamukobosia bali, “Efwe khwama Harani.” Abareeba ali, “Mumanyile Labani okhwa Naori?” Bamukobosia bali, “Yee, khumumanyile.”

⁶Abareeba ali, “Ali omulamu?” Bamukobosia bali, “Ali omulamu, ne lola, omukhaana wewe Raeli niye olikho wicha ne kamakheese oyo!”

⁷Yakobo aloma ali, “Enje esiili kumuusi busa ne siise sikhola nisio bibiaayo bibusilamo alala tawe. Nywesia kamakheese mala muche mukaaye?”

⁸Bamukobosia bali, “Se khunyala khwakhola khurio tawe, khukhwola nga kiminyele kioosi kiebuusie alala, mala khupiringisie libaale ne khunywesia kamakheese.”

⁹Nga aba asilomaloma Raeli ola ne kamakheese ka raraawe, sikila aaba omwaayi wako.

¹⁰Nga Yakobo abona Raeli, omukhaana owa khocha wewe Labani, ne kamakheese, Yakobo acha apiringisia libaale lirure emunwa we esebele, mala anyweesia kumunyele kwa khochaawe Labani.

¹¹Nio Yakobo ekwayila Raeli, mala alila lukali mu busangaafu.

¹²Yakobo aboolela Raeli ali, “Ndi omulebe owa paapa wowo, omwana owa Rabeka.” Raeli atima acha khuboolela raraawe.

¹³Nga Labani aulila kamakhuwa ko mwiwana wewe, atima aacha amwakaanana mala amukwakho amwekhoyela mala amureera munju mwewe. Yakobo aboolela Labani buli sisiindu,

¹⁴Mala Labani amuboolela ali, “Yee, ng'ali ewe oli sikuumba siase ne, kamafuki kase.” Yakobo amenya naye kumwesi mulala.

¹⁵Labani aboolela Yakobo ali, “Ukholele busa bali sikila oli omulebe wase ku? Mboolele. Kumuruungo kwowo kulaba siina?”

¹⁶Nono Labani aaba ne bakhaana babili, lisina lio omukhulu bali Lea ne omuro bali Raeli.

¹⁷Lea aaba ne chimoni chindekhele ne kakhali Raeli aaba omukhaana owe lukoondo lulayi lundi osiimisia.

¹⁸Yakobo asiima Raeli mala aloma ali, “Ndakhukholela kimiiko saba nio mbile Raeli.”

¹⁹Labani amukobosia ali, “Buli bulayi khue ewe khukhila ne mba omundu okundi. Menya ne nase.”

²⁰Yakobo akhola kimiiko saba khulwe khuyila Raeli. Khu niye siise siabonekha sie chindaalo ngekhe busa chiri, sikila busiime nibwo aaba nabwo khu Raeli.

²¹Nio Yakobo aboolela Labani ali, “Namalile siise siase, mbe omukhasi wase mala mbe naye.”

²²Nio Labani abuusia babaandu be abwenao boosi alala mala abakholela naikara eye siselelo.

²³Ne kakhali ekolooba ao, Labani abukula omukhaana wewe Lea mala amuyilila Yakobo, Yakobo aaba naye.

²⁴(Labani abukula omukhaana, nasioobi wewe bali Silipa aelesia Lea ache amukholelenge.)

²⁵Ne nga bwasia, Yakobo amanya ali, Lea niye. Areeba Labani ali, “Siina nisio ukholeele sino? Se nakhukholeele sikila Raeli ta ku? Siina sikila nono ne umbea?”

²⁶Labani amukobosia ali, se khukholanga khurio mu sibala siefwe tawe. Omukhaana omuro se achichanga munju, omukhulu ne asiili tawe.

²⁷Liinda lichuuma lie kumuyimo kwe khukhwana kwa yuno liwe, mala khulakhua okundi yesi, khulwe kumuruungo kwe bukholi bwe kimiiko kikiindi saba.

²⁸Yakobo akhola ario. Amala lichuuma lie kumuyimo kwe khukhwana ne Lea, nio Labani amua omukhaana wewe Raeli abe omukhasi wewe.

²⁹(Labani aelesia Raeli omukhaana wewe omukholi bali Biliia nga omukholi wewe.)

³⁰Nio Yakobo aba ne Raeli yesi mala amusiima lukali khukhila Lea. Yakobo akholela Labani kimiiko kikiindi saba.

³¹Nga Wele Omunyali Owa Bioosi abona ali Lea aaba nabulobe, amwikula enda, ne Raeli aba omukuumba.

³²Lea aesia mala asaala omwana owe sisoleeli amutiuukha ali, Rubeni[25] sikila aloma ali, “Wele Omunyali Owa Bioosi abone sinyaasio siase mala ng'ali, luno omuseecha wase alasiima.”

³³Aesia lundi mala asaala omwana owe sisoleeli, aloma ali, “Sikila Wele Omunyali Owa Bioosi aulila ali nabiilwa, ambeele omwana owe sisoleeli yuno lundi,” ne amutiuukha ali, Simioni[26]

³⁴Lundi aesia asaala omwana owe sisoleeli mala aloma ali, “Luno omuseecha wase alaambana ne nase, sikila namusaaliile basoleeli bataru,” khwako lisina liewe lialaangwa bali Lawi.[27]

³⁵Ne aesia lundi mala asaala omwana owe sisoleeli mala aloma ali, “Siise sino ndafumia Wele Omunyali Owa Bioosi,” khwako amutiuukha lisina ali, Yuda,[28] mala akama khusaala.