Read lubukusu Lir. 30 Bible Online

Lir. 30 - lubukusu bible

Lir. 30

¹Nga Raeli ne abona ali se asaalila Yakobo omwana tawe, abubila wandaaye mala aboolela Yakobo ali, “Mbe babaana, namwe ese ndafwa!”

²Yakobo akhalalila Raeli mala aloma ali, “Ese ndi mu bubweyaangu bwa Wele owakhukhiingilila khusaala babaana?”

³Raeli amuboolela ali, “Nasioobi wase Biliia ali ano mubukule mala okone naye, asaalile, nio nyoole babaana khubirira mu niye.”

⁴Nio amua Bilia abe nga omukhasi wewe mala Yakobo akona ne Biliia.

⁵Biliia aesia mala asaalila Yakobo omwana owe sisoleeli.

⁶Ne Raeli aloma ali, “Wele akhalakile bulayi, lundi aulile lisaba liase mala ambeele omwana owe sisoleeli.” Khwako amutiuukha lisina ali Dani[29].

⁷Biliia, omukholi owa Raeli, aesia lundi mala asaalila Yakobo omwana owe sisoleeli okhola khabili.

⁸Raeli aloma ali, “Narekaane chimbasi burafu ne wandaayase mala nauliile”, nio amutiuukha lisina ali Nafutali[30].

⁹Nga Lea amanya ali ayakama khusaala babaana, abukula Silipa, omukholi wewe, amua Yakobo nga omukhasi wewe.

¹⁰Silipa asaalila Yakobo omwana owe sisoleeli.

¹¹Mala Lea aloma ali, “Ekhabi endayi.” Nio amutiuukha lisina ali Kati[31].

¹²Silipa asaalila Yakobo omwana okhola khabili.

¹³Mala Lea aloma ali, “Ndi ne busangaafu sikila bakhasi baliindanga bali musangaafu,” nio amutiuukha lisina ali Asieri[32]

¹⁴Mu ndaalo che khukesa engaanu Rubeni acha emukuunda anyoolayo chimbuunwe mala achireerera Lea maayi wewe. Raeli asaba Lea ali, “Nosiima mbeekho chimbuunwe[33] cho omwana wowo.”

¹⁵Lea aamureeba ali, “Okhanyalikha ne khukhumbukula omuseecha tawe? Luno wenya khubukula aakhaba chimbuunwe cho mwana wase chosi?” Raeli aaloma ali, “Silo sia luno kane abe ne nawe khulwe chimbuunwe cho omwana wowo.”

¹⁶Oli ekolooba, Yakobo akobola khukhwama emukuunda, Lea arura acha amwakaanila mala amuboolela ali, “Luno ocha khukona mu mwase sikila nakhukulile khulwe chimbuunwe cho omwana wase.” Nio siilo aaba ne Lea.

¹⁷Wele aulila lisaba lia Lea mala aesia, asaalila Yakobo omwana owe sisoleeli okhola kharaano.

¹⁸Lea aloma ali, “Wele ambeele kumuruuru kwase, sikila naelesia omuseecha wase omukholi wase.” Nio amutiuukha lisina ali Isakari[34]

¹⁹Lea aesia lundi, mala asaalila Yakobo omwana owe sisoleeli okhola sita.

²⁰Lea aloma ali, “Wele ambeele siaanwa silayi. Luno omuseecha wase alangoosia, sikila namusaaliile babaana be sisoleeli sita” Nio amutiuukha lisina ali Sebuluni[35].

²¹Enyuma wa kano Lea asaala omwana owe siikhaana mala amutiuukha ali Tina.

²²Wele akhebulila Raeli, mala auulila lisaba liewe, amwikula enda.

²³Aesia mala asaala omwana owe sisoleeli. Aloma ali, “Wele andusiisiekho chisoni chase”

²⁴Amutiuukha lisina ali Yosefu[36] ne aloma ali, “Wele Omunyali Owa Bioosi akhoya andasakho omwana owe sisoleeli okundi.”

²⁵Oli Raeli asaalile Yosefu, Yakobo aboolela Labani ali, “Ndekhuule nje, ngobole engo mu sibala siase.

²⁶Mbe bakhasi base ne babaana base nibo nanyoola khulwe khukhukholela ewe, mala undekhe nje, sikila ewe omanyile bukholi nibwo nakhukholeele.”

²⁷Ne Labani amukobosia ali, “Waaba ne ufukiilila, ndaloma ndi, namanyile khubirira mu bulakusi bwase ndi Wele Omunyali Owa Bioosi ambiitile ese chikhabi sikila ewe.

²⁸Boola kumuruungo kwowo, mala ndakhua.”

²⁹Yakobo amukobosia ali, “Ewe wamwene omanyile nga nakhukholeele, lundi nga chikhaafu chowo ne chakuchile mu bwaayi bwase.

³⁰Ese ne ekhecha tawe, waba nacho ngekhe busa chiri, ne luno chakuchile lukali. Wele Omunyali Owa Bioosi akhubiitile ewe chikhabi buli abuundu niio ese nacha[37]. Ne ese nase ndinyoola liina bie khurumikhira munju mwase?”

³¹Labani amureeba ali, “Khuruunge siina?” Yakobo amukobosia ali, “Se nenya kumuruungo kwosi kwosi tawe. Waaba ne ukholela nga nja khuloma, aba nja khukhwayila kamatuuli kowo lundi.

³²Ndekhe mbire mwituuli liowo endaalo yino ndusiemo buli likheese ling'enda nende lie kamapala nende buli limeeme limali,[38]” lundi buli embusi eye kamapala ne ng'enda khukhwama mu mbusi. Bibienebio bibe kumuruungo kwase.

³³Nio mu ndaalo chichiicha bubwiyikinwa bwase bubweene bulibonekha, nga ne oliicha khukhunduunga. Ne olinyoola embusi ekhali eng'enda namwe eye kamapala tawe namwe limeeme liosi liosi likhali limali tawe, lilibalikha nga lie bubwifwi.

³⁴Labani akobosia ali, “Bulayi! Lekha kabe nga ne olomile.”

³⁵Ne endaalo eyo Labani arusia mu munyele chindurume ching'enda nende che kamapala ne bisoonga bing'enda nende bie kamapala. Buli eyabakho lipala liwaanga ne buli limeeme limali, mala arakho babaana bewe basoleeli khubiliinda,

³⁶mala abiaula khukhwama khu nibio niye ali nabio biaba nga lukeendo lwe chindaalo chitaru khukhwama ao. Mala Yakobo aya kumunyele kukwarama.

³⁷Yakobo abukula chisaala chindeeyi che kumwilima kumubisi, ne alumondi lwe kumwarakuumba achoobula kamoola akhola kimitiindi kimiwaanga kibonekhele mu sakia ng'ene echo.

³⁸Abukula chisakia nicho aaba ne obuule, mala achira amafubukho niio bibiaayo biechanga ne binywelao kameechi. Ne nga bibiaayo bielukhanga ne bichile khunywa,

³⁹kiminyele kielukhila ebweeni we chisakia echo, nio kiasaala chimelamela, ching'enda nende che kamapala.

⁴⁰Yakobo aula kamameeme mala akobosia ematuuli ke chinjululusi ne kamamali koosi mu lituuli lia Labani. Mala aula lituuli liewe aliira alubeka, se alitubasia ne lia Labani tawe.

⁴¹Ne nga bibiaayo binefu bie mu lituuli bielukha, Yakobo abukula lusaala olwo arura mu mafubukho ebweeni we lituuli.

⁴²Ne ebiaayo bing'au mu lituuli se arechangayo lusaala chana tawe, mala bing'au biaba bia Labani, ne binefu bia Yakobo.

⁴³Mungila yino Yakobo aaba omuiinda lukali. Aaba ne kamatuuli kamakali ne nasioobi be siikhasi nende be siseecha bakali, ne chingamia ne chipunda.