Read lubukusu Lir. 31 Bible Online

Lir. 31 - lubukusu bible

Lir. 31

¹Yakobo aulila ali ba okhwa Labani baaba baloma bali, “Yakobo abukule bia paapa bioosi, ne khukhwama khu bia paapa anyooleelekho kimiaandu kino kioosi.”

²Lundi Yakobo abona ali Labani se alamulolanga bulayi nga ne aaba mu khurakikha tawe.

³Nio Wele Omunyali Owa Bioosi aboolela Yakobo ali, “Kobola mu sibala sie bapaapa bowo ne balebe bowo, mala ndaba ne nawe.”

⁴Yakobo arumania mala alaanga Raeli ne Lea mu lukoongo nimwo kiminyele kiewe kiaba.

⁵Ababoolela ali, “Naboone ndi paapa wenywe se alandolanga bulayi nga mu khurakikha tawe. Ne kakhali Wele owa paapa wase abeele ne nase.

⁶Enywe mumanyile muli nakholela paapa wenywe ne kamaani kase koosi.

⁷Ne paapa wenywe ambeyile ne khukaluukhasia kumuruungo kwase kamakhabi ekhumi, ne kakhali Wele se amuelesia kumunwa khukhumbumisia tawe.

⁸Kaaba bali aaloma ali, ‘bibiaayo bie kamapala bilaba kumuruungo kwowo,’ kumunyele kwosi kwasaala bie kamapala. Ne aloma ali, ‘Bibiaayo bie chinjululusi bilaba kumuruungo kwowo,’ kumunyele kwosi kwasaala bie chinjululusi.

⁹Mungila yino Wele abukula bibiaayo bia paapa wenywe mala amba ese.

¹⁰“Mu ndaalo nicho kumunyele kwelukhilamo nabona mu marooro chindurume chichaoona kiminyele chaba ching'enda, che kamapala ne chimelamela.

¹¹Nio malaika owa Wele anaanga mu marooro ali, ‘Yakobo’, mala nakobosia ndi, ‘Yee!’

¹²Mala aloma ali, ‘Suta chimoni mala obone, chindurume choosi chilikho ne chioona kiminyele chili ching'enda, che kamapala, ne chimelamela, sikila naboone koosi niko Labani alakhukholelanga.

¹³ Ese ndi Wele owa Beteli, niio wachukha kamafura khu njeko mala wanjichubila. Nono yinyokha, orure mu sibala sino okobole mu sibala nisio wasaalwamo.’ ”

¹⁴Nio Raeli ne Lea bakobosia Yakobo bali, “Sisiindu siosi siosi namwe kumukabwa kwaramiile khwifwe mu nju eya paapa ku?

¹⁵Se akhubalaanga efwe nga baakwa busa? Sikila akhukusia, mala aarumikhira chirupia nicho bamua khwifwe.

¹⁶Kimiaandu kiosi nikio Wele abukula paapa wefwe kili kikiefwe ne babaana befwe, nono, khola niko Wele akhubooleele.”

¹⁷Nio Yakobo enyokha, mala aniinia babaana bewe ne bakhasi bewe khu ngamia,

¹⁸mala aloonda bibiaayo biewe bioosi ne buli siindu nisio anyoola mu sibala sia Padani-aramu. Arekukha akobole mu sibala sia Kanaani khu raraawe Isaaka.

¹⁹Labani aaba achiile khukhala bufuumbo bwe kamakheese kewe, mala Raeli eba bifwaani bie bawele be munju mwa raraawe.

²⁰Yakobo abacha Labani Omusiami sikila se amuboolelakho ali, enya khukhwilukha tawe.

²¹Elukha ne bibiindu bioosi nibio aaba nabio, akhola khangu ambukha luluuchi lwa Efurati mala acha e sibala sie bikulu sia Kileati.

²²Khu ndaalo ekhola khataru Labani aboolelwa ali Yakobo elukhe.

²³Abukula balebe bewe mala amutimakho khulwe chindaalo saba, amuloondakho enyuma khukhwola nga amunyoolela mu bikulu bia Kileati.

²⁴Ne kakhali Wele echa khu Labani Omusiami, mu marooro, mu siilo, mala amuboolela ali, “Yiyaya okhakhola orio waloma Yakobo likhuwa lilayi namwe libi tawe.”

²⁵Labani ola khu Yakobo. Yakobo aaba asimiikhe liiema liewe mu sibala sie bikulu, ne Labani ne balebe bewe bombakha mu sibala sie bikulu sia Kileati.

²⁶Labani aboolela Yakobo ali, “Siina nisio ukholeele, wambeyile, mala wabukula bakhaana base nga baambe be mwiie?

²⁷Siina sikila ne wilukha mu bwikisi, ne umbea, mala se umboolela tawe, andi nakhulekhuulile ne liliekhoya ne kimienya kie chitamburini ne kamatuungu?

²⁸Ne siina sikila ne okhandekhile nekwayila babechukhulu base ne babaana base nio? Nono wakholile ke busilu.

²⁹Ndi ne bunyali khu khukholakho libi. Ne kakhali Wele owa raraao alomalome khwise siilo ali, ‘Yiyaya okhakhola orio waloma Yakobo likhuwa libi namwe lilayi tawe.’

³⁰Nono warekuukhe sikila wekoombile lukali enju eya raraao. Ne siina sikila ne webile bifwaani bie bawele base?”

³¹Yakobo akobosia Labani ali, “Sikila naba ne buuri, ndi onyala wanuula bakhaana bowo.

³²Yesi yesi niye olanyoola ne ali ne bifwaani bie bawele bowo, aleerwa. Ebweeni we balebe befwe yekesia nisio ese ndi nasio sili sisiowo mala osibukule.” Ne Yakobo se amanya ali Raeli aaba ebile bifwaani bie bawele ba Labani tawe.

³³Nio Labani engila mu liiema lia Yakobo ne mu liiema lia Lea, ne mumaeema ka nasioobi babili, ne se abinyoolamo tawe. Arura mu liiema lia Lea mala engila mu lia Raeli.

³⁴Raeli aaba abukule bifwaani bie bawele be munju mwa raraawe abireere mu masisinwe ke engamia mala abiikhalekho. Labani apula mu liiema mwoosi, mala khubinyoola tawe.

³⁵Raeli aboolela raraawe ali, “omwami okhaambwa lirima, sikila se enyala nakhwinyokhela tawe, ndi mu ndaalo chase chimbi.” Nio apula mala khunyoola bifwaani bie bawele be munju mwewe tawe.

³⁶Nio Yakobo naye aambwa lirima mala akhalalila Labani. Yakobo amureeba ali, “Bubi bwase buli siina? Bubwonaki bwase buli siina bukilile wandimakakho?

³⁷Wakhaba ne opulile mu biindu biase bioosi, wanyoolilemo siina khu bioosi bie munju mwowo? Sire ebweeni we balebe base ne babowo, mala bakhalake akari wowo ne nase.

³⁸Kimiiko kamakhumi kabili nikio nabele ne nawe, kamakheese kowo ne chimbusi se chauusiakho tawe, ne se naliakho kamamiiku ke muminyele kiowo tawe.

³⁹Sisiaayo nisio esolo yeera, se nakhurereranga tawe samwene nakhuruunganga. Wandeebanga khuruunge siakhaba ne siebwa kumuusi namwe siilo.

⁴⁰Naba ndio, kumuumu kwanjosia kumuusi, ne siilo embeo yambwelakho mala liilo liimbwa.

⁴¹Kimiiko kamakhumi kabili kano naba munju yowo. Nakhukholela kimiiko ekhumi na kine khulwe khuyila bakhaana bowo babili ne kimiiko sita khulwe kumuruungo kwe lituuli liowo. Mala wakaluukhasia kumuruungo kwase khukhwola ekhumi.

⁴²Abanga bali Wele owa paapa wase, Wele owa Aburahamu ne buuri bwa Isaaka khu Wele, se bwabeele lubeka lwase tawe, ng'ali ewe andi umboonile busa makhono mataaka. Ne Wele abone kumunaanio kwase ne kimilimo kiase mala siilo sia luno ekhurafwiriire.”

⁴³Labani akobosia Yakobo ne aloma ali, “Bakhaana bali bakhaana base ne babaana bali babaana base, ne kiminyele kili kiminyele kiase, ne bioosi nibio obona bino bili bibiase. Ne kakhali endaalo yino nyala nakhola siina khu bakhaana base bano namwe khu baana babwe nibo basaala?

⁴⁴Yiicha, ese ne nawe khukhole endakaano mala ebe buloli akari wowo ne nase.”

⁴⁵Nio Yakobo abukula libaale mala alisimikha nga enjeko.

⁴⁶Mala aboolela balebe bewe ali, “Buusia kamabaale.” Babuusia kumweeka kumuboofu kwe kamabaale mala balia siakhulia amweeka ao.

⁴⁷Labani atiuukhao lisina ali, Yakari-saatuta[39] ne Yakobo atiuukhao ali Kaleeti.

⁴⁸Labani aboolela Yakobo ali, “Kumweeka kwe kamabaale kuno kuli buloli akari wowo ne nase endaalo eya luno.” Khwako akutiuukha ali Kaleeti[40]

⁴⁹ne enjeko akilaanga ali Misipa[41], sikila aloma ali, “Wele Omunyali Owa Bioosi alikhuloleelela ewe ne nase mu biise nibio khukhali alala tawe.

⁵⁰Waaba ne upia siibi bakhaana base namwe waaba ne oyila bakhasi babaandi otube khu bakhaana base, aakhaba bali omundu se ali ne nafwe tawe, khebulila oli Wele ali omuloli akari wowo ne nase.”

⁵¹Labani atasakho ali, “Lola kumweeka kwe kamabaale ne enjeko nibio simiikhe akari wowo ne nase.

⁵²Kumweeka kuno ne enjeko yino bili buloli: ese se endibira kumweeka niche khwiwe khurangane tawe, ne ewe wesi se olibira kumweeka kuno ne njeko yino wiche khwise undangane tawe.

⁵³Wele owa Aburahamu ne Wele owa Naori Wele owe bapaapa babwe, abe omukhalaki akari wefwe.” Nio Yakobo echuba ne Buuri bwa raraawe Isaaka.

⁵⁴Ne Yakobo aana embosio khu sikulu, mala alaanga balebe bewe balie siakhulia. Balia mala bekhala khu sikulu siilo sioosi.

⁵⁵Oli bwasia, makhelebeende, endaalo eloondakho, Labani enyokha, ekwayila babechukhulu ne bakhaana bewe, ababiita chikhabi, mala arekukha akobola engo.