Read lubukusu Lir. 32 Bible Online

Lir. 32 - lubukusu bible

Lir. 32

¹Nga Yakobo aba ne achiililila ne lukeendo lwewe, malaika ba Wele bamwakaanana.

²Ne nga ababona aloma ali, “Abano bali banamae ba Wele!” Nio atiuukha abuundu ao lisina ali Mahanaimu[42].

³Yakobo aruma barumwa ebweeni wewe khu Esau wandaaye, e Seiri, mu sibala sia Edomu.

⁴Abalaka ali, “Mulaboolela omwami wase Esau muli: Omukholi wowo Yakobo aloma ali, ‘Nacha wa Labani mala namenyayo khukhwola luno.

⁵Ndi ne chikhaafu, chipunda, kiminyele, nasioobi be siseecha nende be siikhasi. Narumanie khu mwami wase nio nyoole kumwalaalo ebweeni wowo.’ ”

⁶Barumwa nga bakobola khu Yakobo baloma bali, “Khwolile khu wandaayo Esau mala alikho echa ne babaandu chimia chine khukhwakaanana ewe.”

⁷Nio Yakobo aria lukali ne khukhwiembeelela. Akabamo babaandu ba baba ne naye, ne kiminyele ne kamatuuli ne chingamia, mu bipupu bibili.

⁸Ebaasia ali, “Esau aba ne ebwaakala sipupu silala, siramire sinyala sielukha.”

⁹Yakobo asaba ali, “Ee, Wele owa kuuka Aburahamu ne Wele owa paapa wase Isaaka, Ee, Wele Omunyali Owa Bioosi, ewe wamboolela oli, ‘Kobola mu sibala siowo ne khu balebe bowo, mala ndakhukholela kamalayi.’

¹⁰Se nolaana ne butiiti khu busiime bwowo bwa busiele ne bubweyikinwa nibwo wekeesie khu mukholi wowo tawe. Ese nambukha luluuchi lwa Yoritani luno ne esiimbo yase yong'ene, ne luno ndi ne bipupu bibili.

¹¹Mbonie khukhwama mu mukhono kwa wandaayase Esau, sikila namuriire. Akhakhola ario echa akhwiira fweesi, bamaayi ne babaana babwe tawe.

¹² Ewe wamboolela oli, ‘Khakhukholele kamalayi mala khole lisaaye liowo libe likali nga kumuyekhe kukhabalikha tawe’ ”

¹³Yakobo akona abwenao siilo esio. Abukula khu nibio aba nabio mala abiaana nga siaanwa khu wandaaye Esau,

¹⁴chimbusi chikhasi chimia chibili ne chindurume kamakhumi kabili, kamakheese kamakhasi chimia chibili ne kamamiiku kamakhumi kabili,

¹⁵chingamia kamakhumi kataru che chimoosi, chikhaafu chikhasi kamakhumi kane ne chiuunwa ekhumi, chipunda chikhasi kamakhumi kabili ne chiuunwa ekhumi.

¹⁶Akabamo bibiaayo bino mu matuuli mala buli lituuli liaba liong'ene ne omwaayi walio. Aboolela bakholi ali, “Rangira ebweeni wase mala mulekhe bubweyaangu akari khukhwama khu lituuli khukhwola khu liindi.”

¹⁷Alaka owe bweeni ali, “Nga wandaayase Esau ne akhwakaanana, mala akhureebe ali, ‘Ewe owa naanu ne olikho ocha waena? Ne bibiaayo biili ebweeni wowo bino, bia naanu?’

¹⁸Loma oli, ‘Bili bio omukholi wowo Yakobo, mala bili siaanwa khu mwami wase Esau, ne Yakobo alikho echa enyuma wefwe eyi.’ ”

¹⁹Alaka ario aakhaba owa khabili nende owa khataru ne babaandi boosi babaloonda khu matuuli ali, “Kane muboolele Esau murio, ne mwakaanana naye.

²⁰Lundi mumuboolele muli, ‘Ne alala ne kameenako omukholi owowo Yakobo ali enyuma wefwe eyi.’ ” Ebaasia ali, “Wakana khola ndio namuoosia kumwoyo ne siaanwa sirangiire ebweeni wase mala enyuma wako samwene mubone moni na moni. Wakana anyala afukiilila ese.”

²¹Nio siaanwa siarangira ebweeni wa Yakobo ne niye omwene siilo esio akona mu lukoba.

²²Mu siilo esio ne sisiene Yakobo enyokha abukula bakhasi bewe babili, nasioobi bewe babili ne babaana bewe ekhumi na mulala mala ambukha lifubukho lia Yaboki.

²³Abambusia luluuchi ne buli sisiindu nisio aba nasio.

²⁴ Niye omwene arama enyuma yeng'ene, mala omundu amurekania khukhwola nga enje ne bwasia.

²⁵Nga omundu oyo ne abona ali se akhayile Yakobo tawe, amutiila khu ndeelwa, mala endelwa eya Yakobo yamutekukha ne ali mukhurekana naye.

²⁶Mala omundu oyo aboolela Yakobo ali, “Ndekhuule nje sikila bulikho busia.” Ne kakhali Yakobo amuboolela ali, “Se ndakhulekhuula oche ne okhambiitile chikhabi tawe.”

²⁷Areeba Yakobo ali, “Lisina liowo bali naanu?” Mala amukobosia ali, “Yakobo.”

²⁸ Nio omundu chana aloma ali, “Lisina liowo se lilaba lundi Yakobo tawe. Ne kakhali lilaba Isiraeli[43], sikila warekanie Wele ne babaandu mala waulile.”

²⁹ Yakobo amureeba ali, “Khusaba, mboolele lisina liowo.” Amukobosia ali, “Siina sikila ne undeeba lisina liase?” Mala abwenao abiita Yakobo chikhabi.

³⁰Nio Yakobo atiuukha abuundu ao lisina ali Penieli[44]. Aloma ali, “Sikila mboone Wele moni na moni mala khufwa tawe.”

³¹Enyanga yasoa Yakobo ne alikho arekukha a Penieli ne ayikila sikila endeelwa yatekukha.

³²Khwako, khukhwola endaalo eya luno lisaaye lia Isiraeli se lilichanga enyama eye ndeelwa tawe. Sikila amutiila khu ndeelwa.