Read lubukusu Lir. 33 Bible Online

Lir. 33 - lubukusu bible

Lir. 33

¹Yakobo alola, abona Esau alikho echa ne babaandu chimia chine. Nio aukhasiamo babaana ba Lea, Raeli nende be bakholi babwe babili.

²Ara nasioobi ne babaana babwe ebweeni, Lea ne babaana bewe baloondakho, ne Raeli ne Yosefu baba bamaliilisi khu boosi.

³Niye omwene arangira ebweeni wabwe mala enama asi khukhwola saba nabwila nga ne embiya khu wandaaye.

⁴Ne kakhali Esau atima khumwakaanila, amukwa mwikosi amwikwayila mala boombi balila.

⁵Ne nga Esau abona bakhasi ne babaana, areeba ali, “Naanu bali ne nawe bano?” Yakobo akobosia ali, “Babaana nibo Wele mu mwalaalo kwewe aelesia omukholi wowo.”

⁶Nasioobi ne babaana babwe becha siimbi mala benama ebweeni wa Esau.

⁷Lea yesi ne babaana bewe becha mala benama. Ne ekhumaliilikha Yosefu ne Raeli becha siimbi, benama asi.

⁸Esau areeba ali, “Ne bipupu bibiindi nibio nakaanane bili ne sifuno sina?” Yakobo akobosia ali, “Bie khunyoola kumwalaalo mumoni mwo omwami wase.”

⁹Esau akobosia ali, “Wandaayase, ndi ne bibinjola. Ba busa nende nibio oli nabio.”

¹⁰Yakobo aloma ali, “Tawe, khusaba, naaba ne nyoolile kumwalaalo mumoni chowo, fukiilila siaanwa siase, sikila khubona bubweeni bwowo khuli nga khubona bubweeni bwa Wele, ne kumwalaalo nikwo unjakaanilemo kuno.

¹¹Khusaba ofukiilile siaanwa siase nisio khurereere sikila Wele ayikholela ke kumwalaalo mala ndi nabio bibinjola.” Yakobo amwikoonjelela, abukula.

¹²Nio Esau aloma ali, “Lekha khuchiililile ne lukeendo lwefwe, mala ese ndarangira.”

¹³Ne kakhali Yakobo amukobosia ali, “omwami wase, omanyile oli babaana bali batekhele, ne bibiaayo binuunia bienya buliindi bwase, bialoondwa khangu khangu khulwe ndaalo ndala, binyala biafwa bioosi.

¹⁴Nosiima omwami rangira, omukholi wowo alakhuloondakho kalaa khuloondekhana ne likeenda lie bibiaayo ne lie babaana, nabwila nga nola wo mwami wase mu Seiri.”

¹⁵Nio Esau amukobosia ali, “Lekha ese khulekhele balala khu baandu nibo ndi nabo.” Ne Yakobo akobosia ali, “Mbaao sifuno tawe. Nosiima lekha nyoole[45] kumwalaalo mumoni cho mwami wase.”

¹⁶Nio Esau ayuukha endaalo ng'eneyo akobola e Seiri.

¹⁷Ne kakhali Yakobo akeenda acha e Sukoti, mala ombakha enju yewe ne kamataala ke bibiaayo biewe, khwako lisina lia abuundu ao lialaangwa bali Sukoti[46].

¹⁸Khukhwama Padani-aramu, Yakobo ola mu muleembe mu lukoba lwa Shekemu, luuli mu sibala sia Kanaani, mala ombakha ekambi siimbi ne lukoba.

¹⁹ Akula kamaloba khukhwama khu ba okhwa Hamori, raraawe owa Shekemu, khu bitonyi emia ndala bie efwesa.

²⁰Abwenao ombakha alutare mala akitiuukha ali, El elohe Isiraeli (Wele owa Isiraeli).