Read lubukusu Lir. 35 Bible Online

Lir. 35 - lubukusu bible

Lir. 35

¹ Wele aboolela Yakobo ali, “Yinyokha, oche e Beteli omenyeyo mala wombakhe alutare khu Wele wakhubonekhela nga ne waba ne wilukha wandaayo Esau.”

²Nio Yakobo aboolela be munju mwewe ne naabo ba baba ne naye boosi ali, “Mwaata bifwaani bie bawele bakeni boosi nibio muli nabio mwikwalaasie mala mufware chingubo chimiiliu.

³Mala khwinyokhe khuche e Beteli, nio nombakheyo alutare khu Wele owanjeeta mu ndaalo eye sibi siase, lundi owabeele ne nase buli abuundu osi osi niio nacha.”

⁴Nio baelesia Yakobo bifwaani bie bawele bakeni bioosi nibio baba nabio, ne chimbete chichaba khu maru khwabwe, mala Yakobo abisiikha asi we kumurongooro kukwaba siimbi e Shekemu.

⁵Mala nga Yakobo ne babaana bewe bachiililila ne lukeendo, Wele akhola babaandu be chingoba chichaba siimbi baaba ne buuri bukali bwaakila khutima khu ba okhwa Yakobo tawe.

⁶Yakobo ne babaandu bewe boosi boola Lusi, (Lukoba lulwamanyikhana nga Beteli) luli mu sibala sia Kanaani.

⁷Abwenao ombakhao alutare mala atiuukhao ali “El-Beteli,” sikila Wele amubonekhela abwenao nga ne aba ne elukha khukhwama khu wandaaye.

⁸Debora, omulesi owa Rabeka afwa mala asiikhwa asi we kumurongooro amwalo owa Beteli. Nio lisina liao lialaangwa bali Aloni-bakuti (kumurongooro kwe khulila).

⁹Nga Yakobo ne ama e Padani-aramu, Wele amubonekhela lundi mala amubiita chikhabi.

¹⁰ Wele amuboolela ali, “Lisina liowo lili Yakobo, ne khukhwama luno se lilaba Yakobo tawe ne kakhali lilaba Isiraeli.” Nio Wele amutiuukha lisina ali Isiraeli.

¹¹ Wele achiililila khumuboolela ali, “Ese ndi Wele Owe Bunyali Bwoosi. Saala babaana bakali mala okuche, ekholo ne bipupu bie chikholo biliama mwiwe ne babaami baliama mu lisaaye liowo.

¹²Ndakhua ewe sibala nisio naelesia Aburahamu ne Isaaka, mala ndiaa lisaaye liowo enyuma wowo.”

¹³Nio Wele arekukha khukhwama abuundu niio alomaloma ne naye.

¹⁴ Yakobo asimikha enjeko eye kamabale abuundu niio Wele alomalomelao ne naye ao mala achukhakho siaanwa sie endali ne kamafura.

¹⁵Nio atiuukha abuundu niio Wele akachula naye ali Beteli.

¹⁶Barekukha khukhwama e Beteli mala nga ne baba ne basilikho sinao khukhwama Efurati, Raeli alumwa burafu bwe khusaala omwana.

¹⁷Oli alikho asaala, owamusaasia amuboolela ali, “Okharia tawe sikila luno olasaala omwana owe sisoleeli okundi.”

¹⁸Ne nga Raeli aba ne akwiisia kumwoyo (sikila afwa) amutiuukha lisina ali Benoni[48]ne kakhali raraawe amutiuukha ali Benjamini[49].

¹⁹Nio Raeli afwa mala asiikhwa angila echa Efurati (olwo nilwo lukoba lwa Betelehemu).

²⁰Yakobo ara enjeko khu siliindwa siewe, enjeko eyo yekesia siliindwa sia Raeli khukhwola khu ndaalo yino.

²¹Isiraeli achiililila ne lukeendo acha ombakha liiema liewe ebweeni we endeleelwa eya Eteri.

²² Nga Isiraeli amenya mu sibala esio, Rubeni acha akona ne Bilia mulalakho khu bakhasi nibo raraawe amenyia busa nga omusaale, mala Isiraeli akaulila[50]. Ba okhwa Yakobo baba ekhumi ne babili.

²³Babaana ba Lea baba Rubeni (omubele owa Yakobo), Simioni, Lawi, Yuda, Isakari ne Sebuluni.

²⁴Babaana ba Raeli baba, Yosefu ne Benjamini.

²⁵Babaana ba Biliia, omukholi owa Raeli baba Dani ne Nafutali.

²⁶Babaana ba Silipa, omukholi owa Lea baba Kati ne Asieri. Bano nibo babaana ba Yakobo nibo asaalila mu Padani-aramu.

²⁷ Mala Yakobo acha khu Isaaka raraawe e Mamure, namwe Kiriati-Ariba (olwo nilwo lukoba lwa Heburoni) niio Aburahamu ne Isaaka bamenya nga baakwa.

²⁸Isaaka amenya osia kimiiko emia ndala ne kamakhumi munaane.

²⁹Nio Isaaka akwiisia kumwoyo, acha khu baandu bewe. Aaba akofuule mala babaana bewe, Esau ne Yakobo, bamusiikha.