Read lubukusu Lir. 37 Bible Online

Lir. 37 - lubukusu bible

Lir. 37

¹Yakobo amenya mu sibala nisio raraawe auyilamo, sibala sia Kanaani.

²Luno nilwo lukano lwe luuya lwa Yakobo. Yosefu ne ali ne bukhulu bwe kimiiko ekhumi na saba ayaanga kumunyele ne bawandaaye, babaana ba Biliia ne Silipa, bakhasi ba raraawe. Yosefu aboolela raraawe kamabi niko bawandaaye bakholanga.

³Isiraeli aaba asiima Yosefu khukhila babaana bewe boosi, sikila aaba omwana niye asaala ne asaakhulue. Mala amunabila engubo endeeyi eye kamakhono kamaleeyi[52] kasiimisia.

⁴Ne nga bawandaaye babona bali paapa wabwe asiima Yosefu khukhilakho nibo boosi, bamubiila mala khulomaloma naye mu muleembe tawe.

⁵Siilo silala, Yosefu aroora, ne nga aboolela bawandaaye kamarooro kewe batasa khumubiila.

⁶Ababoolela ali, “Rekeeresia muboolele kamarooro niko ndoorire kano.

⁷Khubeele khulikho khuboa binywa mu mukuunda mala nabona sinywa siase sienyokha siema bukololofu, ne binywa bienywe biebuusia biabotookhelela sisiase, mala biasisikamila.”

⁸Bawandaaye bamureeba bali, “Ng'ali ewe olaba omwami mala okhwamiie efwe?” Nio batasa khumubiila lukali sikila kamarooro ne kamakhuwa kewe.

⁹Yosefu aroora kamarooro kakaandi mala aboolela bawandaaye ali, “Lola, ndoorire kamarooro kakaandi, mala mboone, enyanga, kumwesi ne ching'enieesi ekhumi ne ndala abele bilikho bisikamila ese.”

¹⁰Ne nga akaboolela raraawe ne bawandaaye, raraawe amuyibila mala amureeba ali, “Kamarooro lukano siina niko oroorire kano? Ewe wibaasia oli ese, ne maao ne bawandaayo khukheche khwiname asi ebweeni wowo?”

¹¹ Mala bawandaaye bamukhendekhela, ne kakhali raraawe amenya ne liboola lino mu mebaasio kewe.

¹²Endaalo ndala bawandaaye ba Yosefu basamusia bibiaayo bia paapa wabwe mumayilwe siimbi ne Shekemu.

¹³Nio Isiraeli aboolela Yosefu ali, “Bawandaayo se basamuusie bibiaayo e Shekemu ta ku? Yiicha khurume khu nibo.” Yosefu akobosia ali, “Yee, ese ndi ano.”

¹⁴Nio raraawe amuboolela ali, “Khoche, mala obone bawandaayo ne bali bulayi lundi obone bibiaayo undeerere likhuwa.” Nio raraawe amuruma khukhwama mu litooma lia Heburoni acha ola e Shekemu.

¹⁵Omundu okundi amunyoola mundaa ne alikho acha eyi ne neeyi mala amureeba ali, “Olikho oenja siina?”

¹⁶Amukobosia ali, “Ndikho mbenja bawandaayase, khusaba umboolele niio balikho baaya bibiaayo.”

¹⁷Omundu oyo aloma ali, “Barekuukhe, sikila mbuliile ne baloma bali khekhuche e Dotani.” Nio, Yosefu aloonda khu bawandaaye abanyoola e Dotani.

¹⁸Bamubona ne asiili ataayi ne akhaboolakho tawe mala bamwikuta bali bamwire.

¹⁹Baboolana babeene ne babeene bali, “Namarooro oyosi alikho echa.

²⁰Yiicha khumwire mala khumumwaate mu lilala khu maloo kano mala khuche khuboole khuli esolo eye mundaa emuliile, nio khubone nga kamarooro kewe kacha khuba.”

²¹Ne nga Rubeni aulila lino, akhaka khumuonia, ababoolela ali, “Khukhamwiira tawe.”

²²“Mukhachukha sifuki tawe, mumwaate busa mwiloo lie mu sichiimi lino, ne kakhali mukhamutilakho tawe.” Rubeni enya khumuonia, nio amukobosie khu raraawe.

²³Nga Yosefu ne ola khu bawandaaye, bamufuula engubo eye kamakhono kamaleeyi ne kamapala esiimisia, niyo aaba ne afwarire eyo.

²⁴Bamuaamba bamumwaata mwiloo. Liloo se liabamo kameechi tawe.

²⁵Nga ne bekhala asi, baaba ne balia, babona Baisimaeli balikho bama Kileati ne chingamia chabwe bekha e Misiri. Baba basutile ekamu, kamafura ne manemane.

²⁶Yuda aboolela bawandaaye ali, “Lili na bukhala sina khwire wandaayefwe mala khukise sifuki siewe?

²⁷Khekhumukusie khu Baisimaeli. Khukhamuyilakho kamakhono kiefwe tawe sikila ali wandaayefwe, lundi ali kamafuki kefwe ne enyama eye kumubili kwefwe.” Mala bawandaaye bafukiilila kakeewe.

²⁸ Ne nga Bamidiani baboofuli baba ne balikho babira siimbi, bawandaaye[53] bakhweesa Yosefu bamurusia mwiloo mala bamukusia khu Baisimaeli khulwe bitonyi kamakhumi kabili bie efwesa mala bamuyila e Misiri.

²⁹Nga Rubeni akobola sie loo mala alola khubonamo Yosefu tawe, atabula chingubo chewe

³⁰mala akobola khu bawandaaye abareeba ali, “Omusoleeli se ali mwiloo tawe, aba ese ndacha waena?”

³¹Beera embusi, mala babukula engubo eya Yosefu basiikha mu malasile.

³²Baayila engubo eye kamapala kasiimisia khu paapa wabwe, baloma bali, “Khunyoolile engubo yino, kilole ne eli eyo omwana wowo namwe tawe.”

³³Akimanya mala aloma ali, “Eli engubo eyo omwana wase! Esolo eye mundaa yamuliile, ndi nang'ali ndi esolo yatabulaake Yosefu mu bitonyi.”

³⁴Yakobo atabula chingubo mala afwara likunia munda mala alila omwana wewe khulwe chindaalo chingali.

³⁵Babaana bewe basoleeli ne bakhaana benyokha bacha khumuoleelesia, ne kakhali aloba khuolelesibwa mala aloma ali, “Tawe ndekhe enje emakoombe khu mwana wase ne siliila busa ndi,” raraawe achiililila khumulila ario.

³⁶Ne Bamidiani baba bamukusiisie mu Misiri khu Potifa, omukhulu owe kamae ka Farao kakamuliindanga.