Read lubukusu Lir. 38 Bible Online

Lir. 38 - lubukusu bible

Lir. 38

¹Mu biise ebio Yuda ekha arura mu bawandaaye acha amenya wo omundu okundi Omuatulami owalaangwa bali Hira.

²Ebweeneyo Yuda abonayo omukhaana owo Omukanaani okundi, lisina liewe liaba bali Siua. Amuyila,

³mala amusaalila omwana owe sisoleeli. Yuda atiuukha omwana lisina ali Eri.

⁴Aesia lundi mala amusaalila omwana owe sisoleeli okundi mala mukha Yuda amutiuukha lisina ali Onani.

⁵Lundi asaala omwana okundi owe sisoleeli amutiuukha lisina ali Shela. Yuda aba e Kesibu nga omwana yuno ne asaalwa.

⁶Nio Yuda abukulila omwana wewe omubele Eri, omukhasi. Lisina lio mukhasi liaba bali Tamari.

⁷Ne kakhali Eri, omubele owa Yuda, aba omumayaanu ebweeni wa Wele Omunyali Owa Bioosi mala Wele Omunyali Owa Bioosi amwiira.

⁸Yuda aboolela Onani ali, “Kobosia mukha wandaayo okone naye mala osaalile wandaayo babaana.”

⁹Ne kakhali Onani amanya ali babaana se balaba babewe tawe. Khwako amalilaanga anje kamaani kewe ko museecha nga ne aakonaanga nende ngwa wandaaye, sikila akhakhola ario asaalila wandaaye babaana tawe.

¹⁰Ne nilio akhola, se liasiimisia Wele Omunyali Owa Bioosi tawe mala Wele Omunyali Owa Bioosi amwiira yesi.

¹¹Nio Yuda aboolela omukhaana wewe Tamari ali, “Khoche ewenywe, omenye busa nga namulekhwa khukhwola nga omwana wase Shela ne achoa.” Yuda aria ali Shiela yesi akhola ario afwa nga bawandaaye. Tamari acha amenya munju mwa raraawe.

¹²Enyuma we biise, mukha Yuda, omukhaana owa Siua afwa. Oli kamasika kaweele, Yuda ne omusaale wewe Hira, Omuatulami baniina bacha Timuna niio kamakheese ka Yuda kabekelwa bufuumbo.

¹³Ne nga Tamari aboolelwa ali, “Masalaao alikho aniina Timuna khubeka bufuumbo bwe kamakheese kewe,”

¹⁴efuula chingubo chewe che bunamulekhwa mala ebiimba eneti mumoni mala ekhala asilibwa sia Enaimu lukoba luli amuyila kuucha Timuna, sikila abona ali Shela achoyile mala se aelesibwa amuyile nga omukhasi tawe.

¹⁵Nga Yuda ne amubona ebaasia ali ali omulaaya, niye sikila aaba efumile mumoni.

¹⁶Acha niio aaba amuyila ao mala amureeba ali, “Nenya ngone ne nawe,” sikila se amanya ali ali omukhaana wewe niye tawe. Amureeba ali, “Ne okona ne nase olambelesia siina?”

¹⁷Amukobosia ali, “Kane khurumire emeeme khukhwama mwituuli liase.” Tamari amukobosia ali, “Okhupa sina kumusiingo khukhwola nga ne oreera?”

¹⁸Yuda amureeba ali, “Khupila musiingo sina?” Amukobosia ali, “embete eye simanyisio siowo, ne lukoye ne esiimbo yowo.” Nio amua, akona naye mala aesia.

¹⁹Tamari enyokha acha engo, afuula lububi mala afwara chingubo chewe che bunamulekhwa.

²⁰Nga Yuda aruma omusaale wewe, Omutulami ne emeeme asikule bibiindu biewe khukhwama khu mukhasi oyo, se amunyoola tawe.

²¹Mala areeba babaandu be Enaimu ali, “Omulaaya owaba Enaimu amuyila ali waena?” Bamukobosia bali, “Ano omulaaya se alikhoo tawe.”

²²Akobola khu Yuda mala amuboolela ali, “Se namunyoolile tawe lundi babaandu be abwenao balomile bali, ‘Omulaaya se alikhoo ano tawe.’ ”

²³Nio Yuda akobosia ali, “Lekha abe ne bibiindu ebio, babaandu bakhola bario bakhuchekha efwe. Bona, murumiile emeeme mala ewe khumunyoola tawe.”

²⁴Oli embi kimieesi kitaru Yuda aboolelwa ali, “Omukhaana wowo Tamari akholile bueeyani ne khutasa khwako anyoolile enda.” Yuda aloma ali, “Khemumurusie mala osibwe.”

²⁵Nga nilwo aba ne alikho arusibwa arumania likhuwa khu masalaawe ali, “Ndi ne enda eyo omundu omwene biindu bino, Khusaba ololeelesie omanye bili bia naanu, embete eye simanyisio, lukoye ne esiimbo.”

²⁶Yuda abimanya mala aloma ali, “Tamari ali owa ng'ali khukhukhila ese, sikila nga ne khamuua omusoleeli wase Shela.” Mala Yuda khukona naye lundi tawe.

²⁷Nga siise sie khusaala ne siola aba ne bukhwana munda.

²⁸Ne nga aba ne alikho asaala, omwana mulala arusia kumukhono mala osaasia akutila aboakho lukoye lubesemu ne aloma ali, oyuno anyoile echa.

²⁹Ne kakhali nga akobosiayo kumukhono kwewe, wandaaye asaalwa. Osaasia aloma ali, “Oata ebweeni busa oriena!” Khwako bamutiuukha bali Peresi[54]

³⁰Wandaaye amaliilikha asaalwa ne lukoye lubesemu khu mukhono kwewe mala bamutiuukha bali Sera.