Read lubukusu Lir. 39 Bible Online

Lir. 39 - lubukusu bible

Lir. 39

¹Nono Yosefu ayilwa e Misiri, mala Potifa, omukhulu owe banamae babaliindanga Farao, amukula khukhwama khu Baisimaeli ba baaba ne bamuyilile emwalo eyo.

² Wele Omunyali Owa Bioosi aba ne Yosefu, ne aba omundu owe bukhili mala amenya munju eyo omwami wewe Omumisiri.

³Omwami wewe abona ali Wele Omunyali Owa Bioosi aaba ne Yosefu. Wele Omunyali Owa Bioosi akhola koosi niko Yosefu akhola khuba kamalayi.

⁴Nio Potifa asiima Yosefu mala amukhola abe omukholela, amukhola abe owimeelela enju yewe mala amua bunyali khu buli sisiindu nisio aba nasio.

⁵Khukhwama khu siise nisio amukhola omwimeelesi we enju yewe, ne khumua bunyali khu buli siindu nisio aba nasio, Wele Omunyali Owa Bioosi abiita enju eyo Omumisiri sikila Yosefu. Chikhabi cha Wele Omunyali Owa Bioosi chaba khu bioosi nibio aba nabio munju ne emukuunda.

⁶Nio alekha bioosi nibio aba nabio mu bwimeelesi bwa Yosefu. Ne nga aba naye se ebaasiakho sisiindu siosi siosi tawe, ne kakhali siakhulia nisio alichanga siong'ene. Yosefu aba ne kamaani lundi aaba owe lukoondo lulayi,

⁷Enyuma we siise, omukhasi wo mwami wewe amwikoomba mala amuboolela ali, “Kona ne nase.”

⁸Ne kakhali Yosefu aloba mala amuboolela ali, “Lola, omwami wase se enaniangakho khu siindu siosi siosi munju yewe tawe, mala ara buli siindu mu bunyali bwase,

⁹se aliio omukhulu munju yino khukhukhila ese tawe, namwe se ayinyima sisiindu siosi siosi tawe, ne okhali ewe wamwene, sikila oli omukhasi wewe. Nono ese nyala nakhola ndiena sifwaabi siboofu sino, mala khole bubwoni khu Wele?”

¹⁰Ne akhaba ne areebanga Yosefu buli busiele, Yosefu se arekeeresianga kakeewe tawe mala se afukiilila khukona ne naye tawe.

¹¹Ne kakhali endaalo ndala, nga Yosefu ne engila munju khukhola kimilimo kiewe, omundu okundi khu bakholi be munju se abamo tawe,

¹²mukha Potifa amukwakho atiila engubo yewe aloma ali, “Kona ne nase.” Ne kakhali Yosefu afwarukha mungubo akilekha mu makhono kewe, elukha mala arura munju.

¹³Ne nga abona ali efubarure alekhile engubo yewe mu makhono kewe, mala elukhe arurire munju,

¹⁴alaanga bakholi be munju mwewe, mala ababoolela ali, “Lola, omuseecha wase areera Omueburania yuno muno khukhufwolobia efwe, ama khwicha mu lusiro nilwo ndi bali angwekho, mala nakukuula lukali,

¹⁵ne nga ne aulile ne ngukuula, elukhe arura munju alekha engubo yewe.”

¹⁶Omukhasi abiikha engubo eya Yosefu nabwila omwami owa Yosefu nga ne aloota.

¹⁷Nio omukhasi amuboolela kamakhuwa mene ako ali, “Nasioobi mueburania niye ewe wakhureerera echile mu lusiro niio ndi bali afwoloobie ese,

¹⁸ne nga ngukuulile elukhe arura munju alekha engubo yewe niio ndi.”

¹⁹Nga omuseecha wewe ne aulila kamakhuwa niko omukhasi wewe amuboolela ali, “Kano niko omukholi wowo akholele ese,” Aambwa lirima lukali.

²⁰Abukula Yosefu amuyila mu siboe, abuundu niio baboe bo mwami baboangwa mala amenya mubwenomwo.

²¹ Ne kakhali Wele Omunyali Owa Bioosi aaba ne Yosefu mala amwekesia busiime bukhawao tawe, ne khumua kumwalaalo mumoni mwo muliindi we mu siboe.

²²Omuliindi we mu siboe akhola Yosefu khuba omwimeelesi owe baboe boosi. Ne siosi siosi sisiekholekhanga mu siboe, Yosefu niye owakholanga.

²³Omuliindi we mu siboe se enaana mu siindu siosi siosi sisiaba mu bwimeelesi bwa Yosefu tawe sikila Wele Omunyali Owa Bioosi aaba ne Yosefu, ne buli siindu nisio akhola Wele Omunyali Owa Bioosi asikhola khuba silayi.