Read lubukusu Lir. 4 Bible Online

Lir. 4 - lubukusu bible

Lir. 4

¹Adamu aaba no mukhasi wewe Hawa, Hawa aesia mala asaala, mala aloma ali, “Nasaalile omwana omusoleeli khulwe buyeeti bwa Wele Omunyali Owa Bioosi.” Amutiuukha ali Kaini.[18]

²Enyuma wako lundi, Hawa asaala Apili wandaaye owa Kaini. Apili aaba omwaayi owe kamakheese, ne Kaini aaba omulimi.

³Enyuma we biise, Kaini areera siaanwa sie likesa lie bibiaamo khu Wele Omunyali Owa Bioosi.

⁴ Apili areera limeeme libele lie likheese lilala lie kumunyele kwewe, eera mala aana khu Wele bitonyi binefu. Wele Omunyali Owa Bioosi asiimisibwa ne Apili lundi asiimisibwa ne siaanwa siewe,

⁵ne kakhali Wele Omunyali Owa Bioosi se aasiimisibwa ne Kaini ne siaanwa siewe tawe. Nio Kaini akhalala lukali, anyiisia mumoni.

⁶Wele Omunyali Owa Bioosi areeba Kaini ali, “Siina sikila ne okhalaale, lundi siina sikila ne onyisiisie?

⁷Waaba ne okhola bulayi, se olafukiililwa ta ku? Ne waaba ne okhakhola bulayi tawe bubwoni bwakhwibuliile amuliango bwikoomba bukhukuure, ne kakhali wenyekhana obuule.”

⁸ Kaini Aboolela Apili wandaaye ali, “Khuche khukeende mu mukuunda.”[19] Oli bali mu mukuunda Kaini ebwaakala Apili, wandaaye, mala amwiira.

⁹Wele Omunyali Owa Bioosi areeba Kaini ali, “Apili wandaayo ali wae?” Kaini akobosia ali, “Ese, semanya tawe. Ese niye omuliindi wewe?”

¹⁰ Mala Wele Omunyali Owa Bioosi amureeba ali, “Okholile siina sino? Kamafuki ka wandaayo kalikho kandilila khukhwama mwiloba.

¹¹Ne ewe luno walaamilwe khukhilakho liloba liliakaaniile kamafuki ko mwana wenywe niko ewe ochukhile.

¹²Ne olima kamaloba, se kacha khwaama khuloondekhana ne kamaani kaako tawe, olaba omula lundi omuuyauuyi khu liloba.”

¹³Kaini aboolela Wele Omunyali Owa Bioosi ali, “Siiukuumo siase sili sikali lukali khwise khusinyala.

¹⁴Wamboonile ndure mu maloba lundi ndure mu mumoni mwowo, ne ndaba omula, omuuyauuyi khu liloba mala omundu yesi yesi ounyoola alinjira.”

¹⁵Nio Wele Omunyali Owa Bioosi amuboolela ali, “Se kali kario tawe. Omundu yesi yesi ne eera Kaini aliyachwa khukhwola saba.” Wele Omunyali Owa Bioosi ara simanyisio khu Kaini khukaania omundu yesi yesi omwakaanana akhakhola ario amwiira tawe.

¹⁶Mala Kaini arura ebweeni wa Wele Omunyali Owa Bioosi acha amenya mu sibala silaangwa bali Noti, e bukwe wa Edeni.

¹⁷Kaini akona no mukhasi wewe aesia mala asaala Enoka. Kaini ombakha lukoba mala alutiuukha ali Enoka, lisina lio mwana wewe.

¹⁸Enoka asaala Irati, Irati aaba raraawe owa Meuyaeli, ne Meuyaeli aaba raraawe owa Metusiaeli, ne Metusiaeli aaba raraawe owa Lameki.

¹⁹Mala Lameki aareera bakhasi babili. Lisina lio omukhulu bali Ada ne omuro bali Silai.

²⁰Ada asaala Yabali, oyo niye owaba raraawe owe babayi be chikhaafu babamenyanga mu maeema.

²¹Lisina lia wandaaye liaba bali Yubali. Lisaaye lia Yubali baaba babaandu babapaanga kamatuungu ne kimilele.

²²Silai asaala Tubali-kaini owabasa [20] bibiindu bie kimikasa nende bie bichuuma. Omukooko owa Tubali-kaini aaba bali Nahama.

²³Lameki aboolela bakhasi bewe ali, “Ada ne Silai ndekeeresie, enywe bakhasi base, ulila lilomaloma liase. Nerire omundu sikila ambunile, Nerire omuele sikila ambumiisie ese.

²⁴Kaaba bali khukhwira Kaini khwenya liliyacha saba, ese aba ndenyekha liliyacha sabini na saba, kaaba bali omundu yesi yesi anjira.”

²⁵Adamu akona no mukhasi wewe lundi, aesia mala asaala omwana owe sisoleeli amutiuukha ali Seti[21], sikila Hawa aloma ali, “Wele ambeele omwana okundi mu bweyaangu bwa Apili, niye Kaini eera.”

²⁶Seti naye asaala omwana amutiuukha ali Enosi. Mu siise esio babaandu barakikha khukhwisaaya Wele Omunyali Owa Bioosi.