Read lubukusu Lir. 41 Bible Online

Lir. 41 - lubukusu bible

Lir. 41

¹Enyuma we kimiiko kibili kimimufu, Farao aroora ali, aaba emile a luuchi lwa Naili.

²Nio chikhaafu saba chindayi lundi chikhomefu charura mu Naili mala chaaya bunyaasi.

³Chikhaafu chichiindi saba chifutuufu lundi ching'au charura mu Naili chachiloondakho enyuma, mala checha chema siimbi achiindi echo khu sikiingi sia Naili.

⁴Mala chikhaafu chifutuufu lundi ching'au echo chalia chikhaafu chimiufu lundi chikhomefu. Mala Farao asisimukha.

⁵Akona mala aroora lukhola khabili. Abona bikala saba bie engaanu, biboofu lundi bitukunyafu ne bilikho bichoela khu sisina silala.

⁶Ne enyuma wabio bikala saba biamela, bie kamatere busa, ne luucho lwe mu sichiimi lwaba lwabiomia.

⁷Nio bikala bie kamatere busa, biamila bikala saba biboofu lundi bitukunyafu ebio. Mala Farao asisimukha, mala amanya ali kamarooro niko.

⁸ Nio kumutikhinyi eembeelela, mala arumania alaanga be kamaya ne bakesi boosi be mu Misiri mala ababoolela kamarooro kewe ne se abao onyala khumuboolela sifuno siako tawe.

⁹Nio omukhulu owang'oonelanga Farao endali amuboolela ali, “Endaalo yino nakhebuliile kamakhiikha kase.

¹⁰Nga Farao ne akhalalila bakholi bewe mala anda ese ne omung'ooni owe kimikaati mu siboe, munju eyo omukhulu owe kamae kakaliindanga Farao,

¹¹khwaroora silo silala, niye ne nase. Buli mulala aaba ne kamarooro ne sifuno siako.

¹²Omusoleeli Mueburania abayo ne nafwe, aba omukholi owo mukhulu owe kamae kakaliinda omwami. Aakhuboolela bifuno bie kamarooro kefwe, buli sia mulala khuloondekhana ne kamarooro kewe.

¹³Ne nga akhuboolela, kecha kaba kario, ese nakalusibwa khu milimo kiase, ne omung'ooni we kimikaati asungwa.”

¹⁴Farao arumania, alaanga Yosefu, mala bamureera khangu khukhwama mu siboe. Ne nga ne abeka akaluukhasia chingubo, echa ebweeni wa Farao.

¹⁵Nio Farao aboolela Yosefu ali, “Ndoorire kamarooro mala se aliio omundu onyala amboolela namanya sifuno siako tawe, ne nauliile ne baloma khwiwe bali ne oulila kamarooro onyala waboola sifuno siako.”

¹⁶Yosefu akobosia Farao ali, “Ese senyala tawe, ne kakhali Wele alaelesia Farao sifuno sisienyekhana.”

¹⁷Farao aboolela Yosefu ali, “Mu marooro kase mbele nemile khu sikiingi sie luluuchi lwa Naili,

¹⁸mala chikhaafu saba chikhomefu lundi chimiufu miu, charura mu Naili mala charakikha khukhwaaya bunyaasi.

¹⁹Ne chikhaafu chichiindi saba charura enyuma wacho, chimbi, chifutuufu lundi ching'au lukali nicho khaabonakho mu sibala sia Misiri sioosi tawe.

²⁰Nio chikhaafu ching'au lundi chifutuufu echo chalia chikhaafu che khunyoa chikhomefu echo.

²¹Ne nga chaba ne chichiliile, mbao abele omundu onyala amanya ali chachiliile tawe, sikila charama busa chifutuufu nga mu khurakikha. Mala nasisimukha.

²²Lundi naroora, nabona mu marooro kase bikala saba bie engaanu bili khu sisina silala. Biaba biboofu lundi bibiafumbara bulayi.

²³Ne bikala bibiindi bibianiaala, bitiiti bibiomisibwa ne luucho lwe bukwe biamela enyuma we ebio.

²⁴Nio bikala bitiiti biamila bikala saba bilayi. Mboleele bakhola kamaya, ne se abeleo onyala amboolela sifuno tawe.”

²⁵Nio, Yosefu aboolela Farao ali, “Kamarooro ka Farao kali busa malala, Wele afunuliile Farao nisio ali siimbi khukhola.

²⁶Chikhaafu saba chindayi chili kimiiko saba ne bikala saba bilayi bili kimiiko saba, kamarooro kali busa malala.

²⁷Chikhaafu saba ching'au lundi chifutuufu chicharura enyuma we echo chili kimiiko saba ne bikala saba biikhalimo sindu tawe bibiomisibwa ne luucho lwe bukwe bioosi bili kimiiko saba kie enjala.

²⁸Kali busa nga mboleele Farao, Wele ekeesie Farao niko ali siimbi khukhola.

²⁹Kileecha kimiiko saba kie enjikura engali lukali mu sibala sia Misiri siosi.

³⁰Ne kakhali enyuma wakio kileechao kimiiko saba kie enjala, mala enjikura yoosi ekhebililwe mu sibala sia Misiri sioosi.

³¹Enjikura se elimanyikha mu sibala tawe, sikila enjala elikiloondakho, sikila eliba endafu lukali.

³²Ne khukalukhilamo khwe kamarooro ka Farao khwekesia khuli Wele arereo likhuwa lino mala alalikhola likholekhe mu ndaalo ngekhe chichiicha.

³³“Nono, khwako Farao kharobore omundu oli owe limanya lundi omukesi, mala amure mu bwimeelesi bwe sibala sia Misiri sioosi.

³⁴Lekha Farao arobore baloleelesi khu sibala siosi, mala babukule silala khu biraano bie biakhulia bie sibala sia Misiri mu siise sie kimiiko saba kie enjikura.

³⁵Mala babuusie biakhulia bioosi bie kimiiko kimilayi kilikho kikiicha kino babibuunge asi we bunyali bwa Farao, mu ngoba, mala babiliinde.

³⁶Biakhulia ebio biliba libiikhilo khulwe sibala mu miiko saba kie enjala elikho yiicha mu sibala sia Misiri. Nio babaandu bakhafwa mu njala tawe.”

³⁷Likhuwa lino liaba lilayi khu Farao ne bakasa bewe.

³⁸Mala Farao areeba bakasa bewe ali, “Khunyala khwanyoola omundu nga Yosefu yuno niye Roho owa Wele alimo ku?”

³⁹Nio Farao aboolela Yosefu ali, “Sikila Wele akhwekeesie ewe kano koosi, se aliio yesi yesi owe limanya lundi omukesi nga ewe tawe.

⁴⁰ Ndakhura khu bwimeelesi bwe enju yase, ne khu baandu base boosi balaria kamalaka kowo, ne kakhali khuloondekhana ne bubwami bwong'ene ese ndaba angaaki wowo.”

⁴¹Mala Farao aboolela Yosefu ali, “Nakhuroboore ewe obe omwami khu sibala sia Misiri sioosi.”

⁴² Farao afuula embete eye simanyisio khukhwama khu mukhono kwewe akifwara khu mukhono khwa Yosefu. Amufwara chingubo chimiufu cha katani mala amufwara lunyololo lwe sahabu mwikosi.

⁴³Nio amwikhasia mu likaari liewe lia khabili mala babaandu batima ebweeni wewe ne balaangilila khu baandu bali, “Sikama!” Farao amiisie Yosefu khu sibala sia Misiri sioosi.

⁴⁴Lundi Farao aboolela Yosefu ali, “Ese ndi Farao, mbao omundu mu sibala sia Misiri sioosi, olasuta kumukhono namwe sikele ewe ne okhaanile kumunwa tawe.”

⁴⁵Nio Farao atiuukha Yosefu lisina ali Safenati-panea, mala amua Asenati, omukhaana owa Potifera, omusaayi owa Oni, amuyile abe omukhasi wewe. Nio Yosefu akeenda mu sibala sia Misiri sioosi.

⁴⁶Yosefu aba ne bukhulu bwe kimiiko kamakhumi kataru nga engila mu bukholi bwa Farao omwami owa Misiri. Mala Yosefu arura ebweeni wa Farao, acha mu sibala sia Misiri sioosi.

⁴⁷Mu miiko saba kie enjikura sibala siama bibiaamo bikali lukali.

⁴⁸Ne Yosefu abuusia biakhulia bioosi bie kimiiko saba nga enjikura yaba mu sibala sia Misiri. Mala abuunga biakhulia mu buli lukoba, khukhwama mu mikuunda kikiaba siimbi.

⁴⁹Mala Yosefu abuunga biakhulia bikali lukali nga kumuyekhe nabwila alekha khubipiima, sikila biatuuma sikelo.

⁵⁰Kimiiko kie enjala ne kisiili khukhwola tawe Yosefu aba asaalile babaana babili mu Asenati, omukhaana owa Potifera, omusaayi owa Oni.

⁵¹Yosefu atiuukha omubele lisina ali Manase[55] sikila aloma ali, “Wele akholile nibilile buandalafu bwase bwoosi, ne enju eya paapa wase yoosi.”

⁵²Lisina lio mwana owa khabili, atiuukha ali Efuraimu[56], sikila aloma ali, “Wele akholile ese saale babaana mu sibala sie sibi siase.”

⁵³Kimiiko saba kie enjikura kikiaba mu sibala sia Misiri kiawa,

⁵⁴ mala kimiiko saba kie enjala kiarakikha nga Yosefu ne aloma. Enjala yabao mu bibala bioosi, ne kakhali mu sibala sia Misiri sioosi, biakhulia biabamo.

⁵⁵ Nga enjala ne yakwa mu sibala sia Misiri sioosi, babaandu balilila Farao abae siakhulia. Mala Farao aboolela ba Misiri boosi ali, “Khemuche khu Yosefu. Siosi siosi nisio amuboolela, khola.”

⁵⁶Nio, nga enjala ne yamalatana khu sibala sioosi, Yosefu ekula birara, mala akusia biakhulia khu Bamisiri, sikila enjala yaba endafu lukali mu sibala sia Misiri.

⁵⁷Khutasa khwako, babaandu becha e Misiri khu Yosefu khukula siakhulia, sikila enjala yaba endafu mu sibala mwoosi.