Read lubukusu Lir. 42 Bible Online

Lir. 42 - lubukusu bible

Lir. 42

¹Nga Yakobo ne aulila ali biakhulia biaba bili e Misiri, aboolela babaana bewe ali, “Siina sikila ne mulolelelana busa?

² Nauliile bali biakhulia bili e Misiri, yiikha muche mukuleyo biakhulia enjala ekhakhwira tawe.”

³Nio bawandaaye ba Yosefu ekhumi, bekha bacha e Misiri khukula biakhulia.

⁴Ne Yakobo se aruma Benjamini, wandaaye owa Yosefu, alala ne bawandaaye tawe, sikila aria ali busiku bukhola burio bwamunyoolayo.

⁵Ba okhwa Yakobo bacha bario, ne babaandi, khukula biakhulia sikila enjala yaba mu sibala sia Kanaani.

⁶Nono, Yosefu aaba omuruki owe mu sibala sia Misiri, niye owakusianga biakhulia khu baandu boosi khukhwama mu sibala sioosi. Nio bawandaaye ba Yosefu bacha mala basikama ebweeni wewe benama bubweeni bwabwe asi.

⁷Yosefu abona bawandaaye abamanya, ne kakhali ababukula busa nga bareende, mala abayiibila. Abareeba ali, “Enywe mwama waena?” Bamukobosia bali, “Efwe khwama mu sibala sia Kanaani khwichile khukula biakhulia.”

⁸Akhaba Yosefu ne amanya ali bawandaaye, nibo se bamumanya tawe.

⁹ Akhebulila kamarooro niko aroora khu nibo, mala ababoolela ali, “Enywe muli bayooti, mwechile mubone butekhele bwe sibala sino.”

¹⁰Bamukobosia bali, “Tawe omwami, ne kakhali bakholi bowo bechile khukula biakhulia.

¹¹Efwe khuli babaana bo omundu mulala, ne khuli babaandu babeyikinwa, se khuli bayooti tawe.”

¹²Yosefu abakobosia ali, “Tawe mwichile mubone niio butekhele buli mu sibala siefwe.”

¹³Nio bamukobosia bali, “Efwe nasioobi bowo khwaba babaana ekhumi ne babili bo omundu mulala mu sibala sia Kanaani. Omutua ali engo ne paapa wefwe, ne mulala se aliio tawe.”

¹⁴Yosefu abakobosia ali, “Kali busa nga ne ndomile ndi enywe muli bayooti.

¹⁵Mulakelekwa khu lino: mwichubila enywe mu lisina lia Farao ndi, se mularura ano tawe khukhwola nga wandaayenywe omutua ne echa ano.

¹⁶Ruma mulala khwinywe ache areere wandaayenywe. Babaandi balarama mu siboe nabwila kamakhuwa kenywe ne kakelwa, kekesie bung'ali ne bumulimo. Ne kakhali kario tawe, ese mwechubila mu lisina lia Farao ndi, enywe muli bayooti.”

¹⁷Mala abekalila boosi alala mu siboe khulwe chindaalo chitaru.

¹⁸Khu ndaalo ekhola khataru Yosefu ababoolela ali, “Khola muri mala mulamenya, sikila ese ndi omundu owaria Wele:

¹⁹Mwaba ne muli babaandu babeyikinwa, lekha mulala khwinywe abe mu siboe, ne babaandi basute biakhulia bayilile babaandu benywe engo, sikila enjala.

²⁰Mala mureere wandaayenywe omutua khwise, nio kamakhuwa kenywe kekesie kali mwalomile bung'ali ne se mulafwa tawe.” Mala bakhola bario.

²¹Nio balomaloma babene ne babene bali, “Mu bung'ali khuli ne bubi khulwa wandaayefwe, khwabona bubeeleli bwe kumwoyo kwewe, nga ne akhwikoonjelela mala se khwarekeeresia tawe, nisio sikila butinyu buno ne bukhwichilekho.”

²² Ne Rubeni abakobosia ali, “Ese se namuboolela ndi mukhakhola kamabi khu musoleeli oyo tawe? Ne kakhali enywe se mwenya khurekeeresia tawe. Nono khulikho khuruungwa khulwe lifwa liewe.”

²³Se bamanya bali Yosefu aulile niko baloma tawe, sikila abao omukaluukhasi akari wabwe ne Yosefu.

²⁴Yosefu abarurao mala arakikha khulila. Akelao echa alomaloma ne nabo lundi. Ne abukula Simioni amuboa kimikoye ebweeni wabwe.

²⁵Nio Yosefu arusia lilaka bechusie kimifuko kie bawandaaye ne biakhulia mala babakoboseleyo chirupia cha buli mundu mu mufuko kwewe mala babae siakhulia sie khu lukeendo. Kano kakholwa kario.

²⁶Bawandaaye ba Yosefu baboa biakhulia biabwe khu punda mala barekukha.

²⁷Oli bali abuundu niio bakona siilo, mulala khu nibo akangulula kumufuko kwewe, aelesie epunda siakhulia, mala abona chirupia chewe emunwa we kumufuko.

²⁸Mala aboolela bawandaaye ali, “Bakobosiemo chirupia chase, nicheechi emunwa we kumufuko!” Lino liabakhola besiindukha kumwoyo, baterema ne baloma bali, “Wele akhukholeele siina sino?”

²⁹Nga bola khu Yakobo paapa wabwe, mu sibala sia Kanaani, bamuboolela koosi kakabekholekhakho, bali,

³⁰“Omundu, Omwami we sibala esio, akhulomalomela mu bukhalafu mala akhuraakho ali khuli bayooti mu sibala esio.

³¹Ne kakhali khwamukobosia khuli, ‘Efwe se khuli bayooti tawe, khuli babeyikinwa.

³²Khwaba babaandu ekhumi ne babili babaana bo omundu mulala, ne mulala khwifwe se aliio tawe ne omutua ali ne paapa wefwe mu sibala sia Kanaani.’

³³Omundu chana, omwami we mu sibala esio, akhukobosia ali, ‘Ndamanyila khu lino ndi muli babeyikinwa: lekha mulala khu bawandaayenywe bano ne nase mala mubukule biakhulia muyilile babaandu benywe engo sikila enjala.

³⁴Mureere wandaayenywe omutua khwise, nio ndamanya ndi se muli bayooti tawe, muli babeyikinwa, ne ndamulekhuulila wandaayenywe, mala mulakhola bubwofuli mu sibala sino.’ ”

³⁵Nga barusia biakhulia khukhwama mu mifuko kiabwe, liboo lie chirupia cha buli mundu chaba mu mufuko kwewe. Ne nga nibo ne paapa wabwe babona kamaboo ke chirupia ako, baba ne buuri.

³⁶Nio Yakobo paapa wabwe aloma ali, “Enywe mulerisianga babaana base: Yosefu se aliio tawe, Simioni se aliio tawe, ne luno mwenya mubukule Benjamini yesi. Bumiinikhi buno bwoosi bwechile khwise!”

³⁷Nio Rubeni aboolela raraawe ali, “Mbe ese omwana muliinde, mala khamukobosie, ne naaba ne khamukobosia tawe, yiira babaana base be sisoleeli boombi.”

³⁸Ne kakhali Yakobo aloma ali, “Omwana wase se kane ache ne nanywe tawe, sikila wandaaye afwa mala arama yeng'ene. Yaaba bali kamabi kamukwakho ne muli khulukeendo nilwo mwenya khucha, bubeeleli nibwo ndiba nabwo bulinjira busa omusaakhulu nga ne ndii ndi.”