Read lubukusu Lir. 43 Bible Online

Lir. 43 - lubukusu bible

Lir. 43

¹Enjala yaba endafu lukali mu sibala sia Kanaani.

²Ne nga balia biakhulia nibio bakula khukhwama e Misiri biawa, paapa wabwe ababoolela ali, “Cha lundi mukhukulilekho biakhulia bikeekhe biri.”

³Yuda amukobosia ali, “Omundu oyo akhukaania lukali ali, ‘Wandaayenywe ne akhali ne nanywe mukhambonekhelakho tawe.’

⁴Waaba ne olikho okhuruma ne wandaayefwe, khuleekha khuche mala khukhukulile biakhulia

⁵ne waaba ne okhamuruma ne nafwe tawe se khuleekha khuche tawe, sikila omundu oyo akhuboolela ali, ‘Wandaayenywe ne akhali ne nanywe tawe mukhambonekhela tawe.’ ”

⁶Isiraeli aloma ali, “Siina sisiakila ne mwakholela bubi murio ne muboolela omundu oyo muli muli ne wandaayenywe okundi?”

⁷Bamukobosia bali, “Omundu oyo akhureeberesia ka kefwe ne ke balebe befwe lukali, ali, ‘Paapa wenywe asilio ku? Muli ne wandaayenywe okundi ku?’ Khwakobosia nga ne akhureeba. Khwaba khunyala khwamanya khuriena khuli kane alome ali, ‘Reera wandaayenywe?’ ”

⁸Yuda aboolela raraawe Isiraeli ali, “Ndume ese ne omwana, ne khulenyokha khuche, mala khuone enjala ekhakhwira efwe ne nawe ne bakeekhe boosi tawe.

⁹Ese naanile bulamu bwase khubela niye. Olindeeba ese omwana yuno, naaba ne khamukobosia namura ebweeni wowo tawe, lekha nikiichwe mindali na mindali.

¹⁰Sikila abanga se khwakhiinda tawe, andi luno khwakoboole khabili.”

¹¹Nio Isiraeli Paapa wabwe ababoolela ali, “Kaaba bali khukhwola kabe kario, aba khola muri; bukula bibiaamo bili bilayi bie mu sibala muno kamafura makeekhe kari, bubuukhi bukeekhe buuri, ekamu, manemane, chimaito ne chimbande mala mure mu mufuko muyilile omundu oyo nga siaanwa.

¹²Bukula chirupia khukhwola khabili, mukobosieyo chirupia chichakobolela mu mifuko kienywe. Wakana likoyana liabao.

¹³Bukula akhaba wandaayenywe mala mwinyokhe muche khu mundu oyo lundi.

¹⁴Wele Owe Bunyali Bwoosi akhoya amukholela siisa ebweeni wo omundu oyo, mala amulekhuulile wandaayenywe okundi oyo ne Benjamini. Naaba ne fwisiisie babaana base aba nafwisiisie.”

¹⁵Nio basoleeli ba Yakobo babukula biaanwa ne chirupia khukhwola khabili ne Benjamini mala benyokha bacha e Misiri, bema ebweeni wa Yosefu.

¹⁶Nga Yosefu ne abona Benjamini ne nabo, aboolela omukholi omukhulu owe munju yewe ali, “Yila babaandu bano munju. Yiira sisiaayo mala muteekhe siakhulia, sikila balalia siakhulia sie kumuusi ne nase.”

¹⁷Omukholi oyo akhola nga ne alakwa, ayila babaandu abo munju mwa Yosefu.

¹⁸Nio babaandu abo baria, sikila bareerwa munju mwa Yosefu mala baloma bali, “Chirupia chichakalusibwa mu mifuko kiefwe mu siise sie khunyoa nicho chikilile ne khureerwa muno, nio akhwaangalisiekho bubweyaangu akhuambe khube nasioobi bewe, mala akhunuule chipunda chefwe.”

¹⁹Nio nga boola amuliango kwe enju eya Yosefu baboolela omukholi omukhulu owe munju mwa Yosefu,

²⁰bali, “Nosiima omwami, khwecha eno lulala khukula biakhulia,

²¹ne nga khwola niio khwakona siilo, khwakangulula kimifuko kiefwe mala chirupia cha buli mulala chaba emunwa we kumufuko kwewe, chirupia chefwe busa choosi. Khwako, khwechile nacho lundi.

²²Ne khwechile ne chirupia chichiindi mu makhono kefwe khukule biakhulia. Se khumanya owakobosia chirupia chefwe mu mifuko kiefwe tawe.”

²³Omukholi abakobosia ali, “Mukheembeelela namwe mukharia tawe, Wele wenywe ne Wele owa paapa wenywe amureera chirupia mu mifuko. Ese nanyoola nicho mwandunga.” Nio arusia Simioni amureera khu nibo.

²⁴Nga omukholi ne aba abareerire munju mwa Yosefu, ne khubaa kameechi basiinge bikele, aelesia chipunda siakhulia.

²⁵Berekekha ne biaanwa sikila Yosefu aaba alikho echa engo khu siakhulia sie kumuusi, sikila baba baulile bali balaliayo siakhulia.

²⁶Nga Yosefu ne echa engo bamureerera munju biaanwa nibio baba ne nabio, mala benama ebweeni wewe bola asi.

²⁷Nio abareeba kamakhuwa kabwe, mala aloma ali, “Paapa wenywe, omusaakhulu niye mwaboola ali omulamu? Asiilio omulamu?”

²⁸Bamukobosia bali, “Omukholi wowo, paapa wefwe ali omulamu, asiilio.” Mala benama ebweeni wewe, mu liria.

²⁹Ne nga Yosefu abona wandaaye Benjamini, omwana owa maawe, aloma ali, “Oyuno niye wandaayenywe omutua niye mwamboolela? Wele akhuue kumwalaalo mwana wase!”

³⁰Yosefu arekukha khangu, sikila kumwoyo kwewe kwekoomba wandaaye mala ayiima abuundu niio alililao. Engila mu lusiro mwewe mala alililamo.

³¹Mala esaaba mumoni arura ekhaliilikha aloma ali, “Reera siakhulia.”

³²Bamuua siakhulia yeng'ene, ne bawandaaye bong'ene, ne Bamisiri babalichanga ne naye bong'ene, sikila Bamisiri abeele se banyala balia ne Baeburania tawe, sikila lilienelio lili lie sibiilisio khu Bamisiri.

³³Nio bekhala ebweeni wewe khuloondekhana ne bukhulu bwabwe, khukhwama khu mubele khukhwola khu mutua, mala baloleelelana mu liuka busa.

³⁴Babaelesia sikelo sie biakhulia khukhwaama khu siaalwa sia Yosefu, ne kakhali Benjamini anyoola sikelo siboofu khukhwola kharaano khukhila bawandaaye. Nio banywa basangaala alala ne naye.