Read lubukusu Lir. 44 Bible Online

Lir. 44 - lubukusu bible

Lir. 44

¹Yosefu alaka omukholi omukhulu owe munju mwewe ali, “Yichusia biakhulia mu mifuko kie babaandu bano, nga kimifuko kiabwe ne kinyala kiasuta mala okobosie chirupia cha buli mundu emunwa we kumufuko kwewe.

²Ne ra sikoombe siase sie efwesa emunwa we kumufuko kwo omukeekhe khu boosi, ne chirupia chewe che biakhulia.” Mala akhola nga Yosefu ne amuboolela.

³Nga bwasia busa buri, babaandu abo balekhuulwa bacha ne chipunda chabwe.

⁴Nga baba bachiile lukeendo lulwimbi busa khukhwama mu lukoba, Yosefu aboolela omukholi wewe omukhulu ali, “Yinyokha oloonde khu baandu abo, mala ne obanyoola obaboolele oli, ‘Siina sikila ne muruungire bubi khu malayi? Siina sikila ne mwibile sikoombe sie efwesa sio mwami wase?[57]

⁵Se sili nisio omwami wase anyweelangamo lundi nisio alakulilangamo ku? Mwakholile bubi bukali.’ ”

⁶Nga omukholi owa Yosefu abolakho alomaloma kamakhuwa kano.

⁷Bamukobosia bali, “Siina sikila omwami wase ne alomaloma kamakhuwa nga kano. Bakholi bowo se banyala bakhola sisiindu nga sino tawe!

⁸Chirupia nicho khwanyoola emunwa we kimifuko kiefwe, khwachikobosia khukhwama mu sibala sia Kanaani. Nono khunyala khweba khuriena efwesa namwe esahabu khukhwama munju mwo omwami wowo?

⁹Omukholi wowo yesi yesi, niye silanyoolekhakho, lekha erwe ne akhaba efwe khulaba nasioobi bo mwami wefwe.”

¹⁰Abakobosia ali, “Nafukiiliile nga mulomile, ne niye sikoombe silanyoolekhakho, niye yeng'ene olaba nasioobi wase, ne babaandi se balaba ne lie khubekiicha tawe.”

¹¹Khangu busa, buli omundu aruura kumufuko kwewe asi, mala buli mundu akaangulula kumufuko kwewe.

¹²Arakikha khupula, khukhwamila khu mukhulu mala amaliilisia ne omukeekhe khu boosi. Mala sikoombe sianyoolekhana mu mufuko kwa Benjamini.

¹³Nio, bawandaaye batabula chingubo chabwe, ne buli omundu akobosia kumufuko kwewe khu punda bakobola mu lukoba.

¹⁴Nga Yuda ne bawandaaye bakobola munju mwa Yosefu, aaba asilimo. Baakwa asi ebweeni wewe.

¹⁵Yosefu abareeba ali, “Sikholwa siina nisio mukholile sino? Se mumanyile muli omundu nga ese nyala nalakula ta ku?”

¹⁶Yuda amukobosia ali, “Omwami, khukhubolele khuli sina? Khulome siina? Khunyala khwekaana khuriena? Wele afunuule bubi bwe bakholi bowo, nono, efwe khuli nasioobi bo mwami wase, efwe ne noyo niye sikoombe sinyoolekhe mukhono mwewe.”

¹⁷Ne kakhali Yosefu aloma ali, “Se enyala nakhola ndio tawe! Ne kakhali omundu niye sikoombe sinyoolekhane mukhono mwewe yeng'ene niye olaba nasioobi wase, ne enywe, khe murekukhe muche engo mu muleembe khu paapa wenywe.”

¹⁸Yuda eseenda siimbi khu Yosefu mala amuboolela ali, “Nosiima, omwami, mbe kumunwa, khusaba, mboolele omwami wase likhuwa. Okhaambwa lirima khu mukholi wowo tawe, sikila ewe oli nga Farao omwene.

¹⁹Omwami, ewe wareeba bakholi bowo oli, ‘Muli ne paapa wenywe namwe wandaayenywe okundi?’

²⁰Mala khwakobosia omwami wase khuli, ‘Khuli ne paapa mala ali omusaakhulu ne wandaayefwe omukeekhe, niye paapa asaala ne ali omusaakhulu. Ne wandaaye aafwa arama yeng'ene khu baana ba maawe, ne paapa wefwe amusiima lukali.’

²¹Ewe waloma bakholi bowo oli, ‘Cha, mumureere nenya khumubona.’

²²Khwaboolela omwami wase khuli, ‘Omwana oyo se anyala alekha raraawe tawe, ne aaba bali amulekha anyala afwa.’

²³Ne ewe, omwami wakhuboolela efwe, bakholi bowo oli, ‘Mukhambonekhela ne mukheechile ne wandaayenywe omukeekhe tawe.’

²⁴“Nga khwakobola engo khu mukholi wowo, paapa wefwe khwamuboolela kamakhuwa ko mwami wase.

²⁵Ne nga paapa ne akhubooleele ali, ‘Khemuche lundi e Misiri, mukuleyo biakhulia bitiiti,’

²⁶Khwamukobosia khuli, ‘Se khunyala khwekha lundi e Misiri, kaaba bali wandaayefwe omukeekhe se alikho acha ne nafwe tawe. Aba khuleekha khucha, sikila se khufukiililwa khubona omundu oyo wandaayefwe omukeekhe, ne akhali ne nafwe tawe.’

²⁷Ne omukholi wowo, paapa wase akhuboolela ali, ‘Enywe mumanyile muli omukhasi wase Raeli asaalila ese babaana babili,

²⁸mulala afwa ayindekha, mala naloma ndi, ng'ali atabulakwa mu bitonyi ne solo eye mundaa, ne khamubonakho khukhwama ao tawe.

²⁹Mwaba ne mumbukula yuno yesi mala kamabi kamukwakho, bubeeleli nibwo khabe nabwo bulinjira busa omusaakhulu nga ne ndii ndi.’

³⁰“Khwako, omwami, nga ne ngobola khu mukholi wowo, paapa wase, mala omwana se ali ne nafwe tawe, mala bulamu bwewe bwabowa mu bulamu bwo omwana yuno,

³¹nga ne alabona ali omwana se ali ne nafwe tawe alafwa, mala aba bakholi bowo, khulafwiisia omusaakhulu paapa mu bubeeleli.

³²Ese, omukholi wowo naana bulamu bwase khulwo mwana yuno khu paapa ne ndoma ndi, ‘Naaba ne khamukobosia khwiwe tawe, lekha mbe ne liliekicha mumoni cha paapa wase mu bulamu bwase bwoosi.’

³³Nono, khwako ekhusaba, ese ndame mu bweyaangu bwo omwana yuno, nga nasioobi wo mwami wase, mala olekhe omwana yuno akoboleyo ne bawandaaye,

³⁴sikila ese nyala nakobola ndiena khu paapa wase omwana yuno aaba ne akhali ne nase tawe? Ndi ne buuri khubona kamabi kaacha khuba khu paapa.”