Read lubukusu Lir. 46 Bible Online

Lir. 46 - lubukusu bible

Lir. 46

¹Nio Isiraeli arakikha lukeendo nende nibio aaba nabio bioosi ola e Beerisheba mala aana embosio khu Wele owa raraawe Isaaka.

²Mala Wele alaanga Isiraeli mu malola ke siilo ali, “Yakobo, Yakobo.” Ne Yakobo akobosia ali, “Ndi ano.”

³Wele aloma ali, “Ese ndi Wele, Wele owa paapa wowo, okharia khukhwiikha oche e Misiri tawe, sikila ebweeneyo ndakhukhola obe sibala siboofu.

⁴Ndacha e Misiri ne nawe mala lundi ndiniinia lisaaye liowo likobole mu sibala sino. Ne Yosefu niye olikhumiina chimoni ne olikho ofwa.”

⁵Yakobo arekukha khukhwama e Beerisheba. Babaana ba Isiraeli bameemela paapa wabwe, babaana babwe bakeekhe, ne bakhasi babwe, mu makaari niko Farao aruma kabameeme.

⁶ Babukula akhaba chikhaafu chabwe ne bibiindu biabwe nibio baba ne banyoola mu sibala sia Kanaani, mala bacha e Misiri. Yakobo ne lisaaye liewe lwoosi,

⁷babaana bewe, babechukhulu bewe, bakhaana bewe ne babechukhulu bewe bakhaana bacha e Misiri.

⁸Kano niko kamasina ke lisaaye lia Isiraeli babacha mu Misiri, Yakobo ne babaana bewe Rubeni, omwana wewe omubele.

⁹Ne ba okhwa Rubeni, Anoki, Palu, Hesironi ne Karimu.

¹⁰Ba okhwa Simioni baba: Yemueli, Yamini, Ohati, Yakini, Soari ne Shauli, babaana bo omukhaana omukanaani.

¹¹Ba okhwa Lawi baba: Kerishoni, Koati ne Merari.

¹²Ba okhwa Yuda baba: Eri, Onani, Shela, Peresi, Sera (ne kakhali Eri ne Onani bafwila mu sibala sia Kanaani). Ba okhwa Peresi baba: Hesironi ne Hamuli.

¹³Ba okhwa Isakari baba: Dola, Puba, Yobu ne Simuroni.

¹⁴Ba okhwa Sebuluni baba: Sereti, Eloni ne Yaeleeli.

¹⁵Bano bali babaana ba Lea nibo asaalila Yakobo mu Padani-aramu alala ne omukhaana wewe Tina. Boosi alala babaana bewe basoleeli ne bakhaana baba kamakhumi kataru ne bataru.

¹⁶Ba okhwa Kati baba: Sifioni, Hagi, Siuni, Esiboni, Eri, Aroti ne Areli.

¹⁷Babaana ba Asieri baba Imuna, Isiba, Isibi, Beria ne Sera omukooko wabwe. Babaana ba Beria baba: Heberi ne Malikieli.

¹⁸(Bano baba babaana ba Silipa, niye Labani aelesia omukhaana wewe Lea, mala asaalila Yakobo babaandu ekhumi na sita.)

¹⁹Babaana ba Raeli, mukha Yakobo baba: Yosefu ne Benjamini.

²⁰ Ne Yosefu asaalila mu sibala sia Misiri: Manase ne Efuraimu nibo Asenati, omukhaana owa Potifera, omusaayi owa Oni, amusaalila.

²¹Ne ba okhwa Benjamini baba: Bela, Bekeri, Asibeli, Kera, Naamani, Ehi, Roshi, Mupimu, Hupimu ne Ariti.

²²(Babaandu ekhumi na bane bano lili lisaaye nilio Raeli asaalila Yakobo.)

²³Ba okhwa Dani baba: Hushimu.

²⁴Ba okhwa Nafutali baba: Yaiseeli, Kuni, Yeseri ne Silemu.

²⁵(Babaandu saba bano bali lisaaye nilio Bilia, nasioobi niye Labani aelesia omukhaana wewe Raeli, asaalila Yakobo).

²⁶Babaandu ba Yakobo boosi babeecha mu Misiri, ba baba lisaaye liewe, ne okhatubilekho bakhasi be babaana bewe tawe, baba kamakhumi sita na sita boosi alala.

²⁷ Ne babaana ba Yosefu babasaalwa mu Misiri baba babili: Babaandu be enju eya Yakobo boosi babeecha mu Misiri baba kamakhumi saba.

²⁸Yakobo aruma Yuda arangire ache areebe Yosefu akaanile paapa wabwe e Kosieni, mala boola mu sibala sia Kosieni.

²⁹Yosefu arekekha kamakaari kewe, mala acha khukhwakaanila Isiraeli raraawe mu Kosieni. Amwakaanila mala amukwa mwikosi alililamo khulwe siise.

³⁰Isiraeli aboolela Yosefu ali, “Luno nakhafwa khefwe, sikila nakhuboone, mala namanyile ndi ewe osiliio omulamu.”

³¹Yosefu aboolela bawandaaye nende be munju eya raraawe ali, “Ndaniina nje mboolele Farao, ndi ‘Bawandaayase ne be nju eya paapa wase bababeele mu sibala sia Kanaani, bechile khwise.

³²Ne babaandu bano bali babaayi be chikhaafu, mala bechile ne kiminyele kiabwe ne kamatuuli kabwe, ne bibiindu bioosi nibio bali nabio.’

³³Farao ne amulaanga mala ne amureeba ali, ‘Kimilimo kienywe kili siina?’

³⁴Mumukobosia muli, ‘Bakholi bowo bali babaayi be chikhaafu khukhwama mu buele khukhwola luno luri, efwe ne bapaapa befwe.’ Nio mumenye mu sibala sia Kosieni, sikila buli omwaayi owe chikhaafu ali sibiilisio khu mu Misiri.”